ಇಂಡಿಯಾ ಬ್ರ್ಯಾಂಡೆಡ್ ಈಕ್ವಿಟಿ ಫೌಂಡೇಶನ್ನ ತಾಜಾ ವರದಿಯ ಪ್ರಕಾರ ದೇಶದಲ್ಲಿ 60 ಕೋಟಿ ಜನರು ಆನ್ಲೈನ್ ಆಟಗಳಿಗೆ ದಾಸರಾಗಿದ್ದಾರೆ. ಇದು ಬರೀ ಮನರಂಜನೆಗೆ ಆಡುವ ಆಟವಲ್ಲ. ಬೇಗ ಹಣ ಮಾಡಬೇಕು, ಐಷಾರಾಮಿ ಜೀವನ ಸಾಗಿಸಬೇಕು ಎಂಬ ಭ್ರಮೆಯಲ್ಲಿ ಗೇಮಿಂಗ್ಸ್ ಆಪ್ಗಳಲ್ಲಿ ದುಡ್ಡು ತೊಡಗಿಸಿ ಆಡುವ ಅಪಾಯಕಾರಿ ಆಟ. ದುಡ್ಡು ಮಾಡುವುದರಿರಲಿ, ದಿನದಿಂದ ದಿನಕ್ಕೆ ಸಾಲದ ಪ್ರಮಾಣ ಹೆಚ್ಚುತ್ತ ಹೋಗಿ, ಕೊನೆಗೊಮ್ಮೆ ಅದು ಕುತ್ತಿಗೆಯವರೆಗೂ ಬಂದಾಗ ಮರ್ಯಾದೆಗೆ ಹೆದರಿ ಆತ್ಮಹತ್ಯೆಗೆ ಶರಣಾಗುವ ಘಟನೆಗಳು ಹೆಚ್ಚುತ್ತಲೇ ಇವೆ. ಮಕ್ಕಳು ಈ ಬಗೆಯ ಜೂಜಿಗೆ ದಾಸರಾಗಿರುವುದು ಬಹುತೇಕ ಪ್ರಕರಣಗಳಲ್ಲಿ ತಂದೆ-ತಾಯಿಗೆ ಗೊತ್ತಿರುವುದೇ ಇಲ್ಲ. ಸಾಲದ ಮೊತ್ತ ಹಲವು ಲಕ್ಷ ದಾಟಿದಾಗ ಮನೆಯ ಸದಸ್ಯರು ಏನೂ ಮಾಡದಂಥ ಅಸಹಾಯಕ ಸ್ಥಿತಿ. ಹಾಗಾಗಿ, ಕೊನೆಗೆ ಯುವಕರು ಸಾವಿನ ದಾರಿ ತುಳಿಯುತ್ತಿದ್ದು, ‘ಈ ಮೋಸದಾಟಕ್ಕೆ ನೀವು ಬಲಿಯಾಗಬೇಡಿ’ ಎಂಬ ಸಂದೇಶವನ್ನು ಸಾಯುವ ಮುನ್ನ ನೀಡುತ್ತಿದ್ದಾರೆ. ಮಧ್ಯಮವರ್ಗದ ಮತ್ತು ಗ್ರಾಮೀಣ ಭಾಗದ ಯುವಕರು ಈ ಗೇಮಿಂಗ್ ಬಲೆಗೆ ಸಿಲುಕೊಂಡಿದ್ದು, ಹೊರಬರಲಾರದೆ ಒದ್ದಾಡುತ್ತಿದ್ದಾರೆ.
