ಬೆಂಗಳೂರು: ‘ಬ್ಯಾಕ್ ಬೆಂಚರ್ಸ್’ ಖ್ಯಾತಿಯ ನಟಿ ಕುಂಕುಮ್ ಹರಿಹರ ಸದ್ಯ ಬೆಳ್ಳಿತೆರೆಯ ಜತೆಗೆ ಕಿರುತೆರೆಯಲ್ಲೂ ಮಿಂಚುತ್ತಿದ್ದಾರೆ. ಹೀಗೆ ಧಾರಾವಾಹಿ ಹಾಗೂ ಸಿನಿಮಾಗಳಲ್ಲಿ ಬಿಜಿಯಾಗಿರುವ ಅವರಿಗೆ ಈ ಬಾರಿಯ ನವರಾತ್ರಿ ತುಂಬ ಸ್ಪೆಷಲ್ ಅಂತೆ. ‘ನಮ್ಮದು ಮರಾಠಿ ಸಂಪ್ರದಾಯ. ಹಾಗಾಗಿ ನಮ್ಮ ಮನೆಯಲ್ಲಿ ನವರಾತ್ರಿ ಆಚರಣೆ ಸ್ವಲ್ಪ ವಿಭಿನ್ನ. ದೇವಿಗೆ ಪೂಜೆ-ಪುನಸ್ಕಾರ, ವ್ರತ ಹಾಗೂ ಆರಾಧನೆ ಸಾಮಾನ್ಯವಾದರೂ ಆಚರಣೆಯಲ್ಲಿ ವಿಭಿನ್ನತೆ ಕಾಣಬಹುದು. ಮನೆಯಲ್ಲಿ ನಾವು ರಾಮಾಯಾಣ, ಮಹಾಭಾರತಗಳ ಕಥೆಗಳು ಸಾರುವ ಗೊಂಬೆಗಳನ್ನು ಕೂರಿಸುತ್ತೇವೆ. ಅಲ್ಲದೇ ಗೊಂಬೆಗಳಿಗೆ ಮದುವೆ ಮಾಡಿಸುವುದು ನಮ್ಮಲ್ಲಿ ವಿಶೇಷ ಎನ್ನಬಹುದು. ಒಂಬತ್ತು ದಿನಗಳ ಕಾಲ ಅಂಬಾ ಭವಾನಿಯ ಪೂಜೆ, ವ್ರತ ಬಳಿಕ ದಾಂಡ್ಯಾ, ಗರ್ಬಾ ಆಡುತ್ತೇವೆ. ಈ ಬಾರಿ ಮೈಸೂರಿಗೆ ತೆರಳಿ ದಸರಾ ವೀಕ್ಷಿಸುವ ಪ್ಲ್ಯಾನ್ ಮಾಡಿದ್ದೇವೆ’ ಎಂದು ಖುಷಿಯಿಂದ ಹೇಳಿಕೊಳ್ಳುತ್ತಾರೆ.
