ನವದೆಹಲಿ: ಅವತಾರ್ ದಿ ವೇ ಆಫ್ ವಾಟರ್ ನಾಳೆ ಚಿತ್ರಮಂದಿರಗಳಲ್ಲಿ ಕಾಣಿಸಿಕೊಳ್ಳಲಿದೆ. ಇದು ಬರೀ ಮದುವೆ ಊಟದಲ್ಲಿನ ಉಪ್ಪಿನಕಾಯಿ ಥರ. ಈಗ ಅವತಾರ್ 3,4, ಹಾಗೂ 5ನೇ ಭಾಗಕ್ಕೆ ಡಿಸ್ನಿ ಹಸಿರು ನಿಶಾನೆ ಕೊಟ್ಟಿದೆ. ಆದರೆ ಇನ್ನೊಂದು ಹೆಜ್ಜೆ ಮುಂದೆ ಹೋಗಿರುವ ಜೇಮ್ಸ್ ಕ್ಯಾಮರೂನ್, ಅವತಾರ್ 6 ಮತ್ತು 7 ಕ್ಕಾಗಿ ಯೋಜನೆಗಳನ್ನು ಹೊಂದಿದ್ದಾರೆ!
ಅವತಾರ್ ಮೊದಲ ಬಾರಿಗೆ ಚಿತ್ರಮಂದಿರಗಳಲ್ಲಿ ಹಿಟ್ ಆಗಿ 13 ವರ್ಷಗಳಾಗಿದೆ. ಜೇಮ್ಸ್ ಕ್ಯಾಮರೂನ್ ನಿರ್ದೇಶಿಸಿದ್ದ ಟೈಟಾನಿಕ್ ಸಿನಿಮಾದ ದಾಖಲೆ ಮುರಿದು ಸಾರ್ವಕಾಲಿಕವಾಗಿ ಅತಿ ಹೆಚ್ಚು ಗಳಿಕೆ ಮಾಡಿದ ಚಲನಚಿತ್ರವಾಗಿ ಹೊರಹೊಮ್ಮಿತ್ತು.
ಅಂದಿನಿಂದ ಕ್ಯಾಮರೂನ್, ಮೂಲ ನಾಯಕರಾದ ಸ್ಯಾಮ್ ವರ್ತಿಂಗ್ಟನ್ ಮತ್ತು ಜೊಯ್ ಸಲ್ಡಾನಾ ಜೇಕ್ ಮತ್ತು ನೆಯ್ಟಿರಿ ಪಾತ್ರದಲ್ಲಿ ಮುಂದಿನ ಸಿನಿಮಾಗಳಿಗಾಗಿ ದಣಿವರಿಯದೆ ಕೆಲಸ ಮಾಡುತ್ತಿದ್ದಾರೆ. ಅವತಾರ್: ದಿ ವೇ ಆಫ್ ವಾಟರ್, 22 ನೇ ಶತಮಾನದ ಮಧ್ಯಭಾಗದಲ್ಲಿ ಪಂಡೋರಾ ಗ್ರಹದಲ್ಲಿ ತಮ್ಮ ಮಕ್ಕಳೊಂದಿಗೆ ಕುಟುಂಬ ಜೀವನ ಮಾಡುತ್ತಿರುವ ನಾವಿ ದಂಪತಿಗಳ ಕಥೆ. ಅವತಾರ್ ಚಿತ್ರದ ಮುಂದಿನ ಭಾಗಗಳು ಇದೇ ರೀತಿಯ ಎಳೆ ಹೊಂದಿದ್ದರೂ ಬೇರೆ ರೀತಿಯ ಕಥೆಗಳು ಇರಲಿವೆ ಎನ್ನಲಾಗಿದೆ.
ಸ್ಟೀಫನ್ ಲ್ಯಾಂಗ್ ಅವತಾರ್: ದಿ ವೇ ಆಫ್ ವಾಟರ್ ಮತ್ತು ಅದರ ಮೂರು ಫಾಲೋ-ಅಪ್‌ಗಳಲ್ಲಿ ಖಳನಾಯಕ ಕರ್ನಲ್ ಮೈಲ್ಸ್ ಕ್ವಾರಿಚ್ ಆಗಿ ಮರಳುತ್ತಾರೆ. ಈಗ ಅವತಾರ: ದಿ ವೇ ಆಫ್ ವಾಟರ್ನ ಕಥೆ, ಪಂಡೋರಾ ಗ್ರಹದ ಜಲವಾಸಿ ಜೀವನ ಮತ್ತು ಬುಡಕಟ್ಟು ಮೆಟ್‌ಕೈನಾ ಕಡೆಗೆ ಗಮನ ಹರಿಸುತ್ತೆ.
ಡಿಸ್ನಿ, ಇತ್ತೀಚಿನ ಸ್ಟಾರ್ ವಾರ್ಸ್ ಚಲನಚಿತ್ರಗಳೊಂದಿಗೆ ಮಾಡಿದಂತೆಯೇ ಪ್ರತಿ ಎರಡು ವರ್ಷಗಳಿಗೊಮ್ಮೆ ಅವತಾರ್ ಸೀಕ್ವೆಲ್ ಅನ್ನು ಬಿಡುಗಡೆ ಮಾಡಲು ಯೋಜನೆ ರೂಪಿಸುತ್ತಿದೆ. ಅವತಾರ್ 3 ಡಿಸೆಂಬರ್ 20, 2024 ರಂದು, ಅವತಾರ್ 4 ಅನ್ನು ಡಿಸೆಂಬರ್ 18, 2026 ರಂದು ಮತ್ತು ಅವತಾರ್ 5 ಅನ್ನು ಡಿಸೆಂಬರ್ 22, 2028 ರಂದು ಬಿಡುಗಡೆ ಮಾಡಲು ಡಿಸ್ನಿ ತಯಾರಾಗಿ ಕುಳಿತಿದೆ.
ಈ ನಡುವೆ ಅವತಾರ್ 6 ಮತ್ತು 7 ನಿರ್ಮಿಸಲು ತಯಾರಾಗುತ್ತಿರುವ ಬಗ್ಗೆ ಕ್ಯಾಮರೂನ್ ಇತ್ತೀಚಿನ ಸಂದರ್ಶನಗಳಲ್ಲಿ ಹೇಳಿಕೊಂಡಿದ್ದಾರೆ. ಆದರೂ ಅವರು ಅವತಾರ್ 3ರ ನಂತರ ಈ ಚಿತ್ರ ಸರಣಿ ಮುಂದುವರೆಯುತ್ತಾ ಎನ್ನುವುದರ ಬಗ್ಗೆ ಅವರಿಗೇ ಖಚಿತವಾಗಿ ತಿಳಿದಿಲ್ಲ. ಕಾರಣ ಇಷ್ಟೇ, ಜನ ಪಂಡೋರಾ ಗ್ರಹವನ್ನು, ಅದರ ಕಥೆಯನ್ನು ಇನ್ನಷ್ಟು ನೋಡಲು ಬಯಸುತ್ತಾರಾ ಎನ್ನುವ ಪ್ರಶ್ನೆ ಅವರನ್ನು ಕಾಡುತ್ತಿದೆ.
ಈ ಮಧ್ಯೆ, ಅವತಾರ್ 4 ನ ಮೂರನೇ ಒಂದು ಭಾಗವನ್ನು ಈಗಾಗಲೇ ಶೂಟ್ ಮಾಡಲಾಗಿದೆ. ಕಾರಣ ಇಷ್ಟೇ, ಬಾಲನಟರ ಪ್ರಾಯ ಹೆಚ್ಚಾದಷ್ಟೂ ಕಥೆಗೆ ಅವರ ವಯಸ್ಸನ್ನು ಹೊಂದಿಸುವುದ ಕಷ್ಟ ಆಗುತ್ತೆ. ಈಗ ಅವತಾರ 4, 5 ಚಿತ್ರಗಳ ಯಶಸ್ಸು ಅವತಾರ 3ರ ಯಶಸ್ಸಿನ ಮೇಲೆ ಅವಲಂಬಿತವಾಗಿದೆ. (ಏಜೆನ್ಸೀಸ್)