ವಾರ ಭವಿಷ್ಯ: ಈ ರಾಶಿಯವರಿಗೆ ನೀವು ಬದುಕುವ ಮಾರ್ಗಕ್ಕೆ ಬೇಕಾದ ದಾರಿಯನ್ನು ಹುಡುಕಿಕೊಳ್ಳಿ | weekly astrology

ವೃಷಭ:ಈ ರಾಶಿಗೆ ಶುಕ್ರನು ಸ್ವಕ್ಷೇತ್ರದಲ್ಲಿ ಇದ್ದು, ಅಲ್ಲೇ ಸೂರ್ಯನೂ ಇದ್ದಾನೆ. ನಿತ್ಯವೂ ಎಲ್ಲರೂ ಅರಮನೆ ಕಟ್ಟಲು ಆಗುವುದಿಲ್ಲ. ರಾಜಯೋಗವೆಂಬುದು ಕ್ಷಣಾರ್ಧದಲ್ಲಿ ಬಂದು ಯೋಗಭೋಗಗಳನ್ನು ಕೊಟ್ಟು ಜನ್ಮಾಂತರದ ಪುಣ್ಯವು ಇರುವವರೆಗೂ ರಾಜನಾಗಿ ಉಳಿಯುವುದು ಸತ್ಯವಾದ ಮಾತು. ರಾಜಯೋಗ, ಜನಾನುರಾಗವನ್ನು ಬಯಸುವವರು ಅತ್ಯಂತ ಕೌಶಲ್ಯದಿಂದ ಅದನ್ನು ಪಡೆಯುವ ಕಾಲವಿದು. ಕೇವಲ ಇನ್ನು 1 ಸಂವತ್ಸರ ಮಾತ್ರವೇ ಶನಿಯು ಏಕಾದಶದಲ್ಲಿ ಇರುತ್ತಾನೆಂದು ಮರೆಯಬೇಡಿ. ನಿಮ್ಮ ವೈಫಲ್ಯವೇ ನಿಮಗೆ ಅಡ್ಡಗಾಲು ಹಾಕಿ ಬರಬೇಕಾದ ಯೋಗವನ್ನು ತಡೆಯದಂತೆ ನೋಡಿಕೊಳ್ಳಿ. ಕಾಮಾಕ್ಷಿಯನ್ನು ಪ್ರಾರ್ಥಿಸಿ.

ಮಿಥುನ:ಈ ರಾಶಿಗೆ ಈಗಾಗಲೇ ಕಟಕದಲ್ಲಿರುವ ಗುರು ಲಗ್ನದಲ್ಲಿ ವಕ್ರಗತಿಯಲ್ಲಿ ಇದ್ದು, ಗುರು ಸಂಚಾರದಲ್ಲಿ ಯಾವುದನ್ನು ಪಡೆಯಬೇಕಾದರೂ ಶ್ರಮದಿಂದ ಮಾತ್ರವೇ ಸಾಧ್ಯ. ಶ್ರಮ ವಹಿಸಿ ದಾರಿಯನ್ನು ಹಿಡಿದು ಜನ್ಮದಾತರ ಆಶೀರ್ವಾದ ಪಡೆಯಿರಿ. ಲಗ್ನದಲ್ಲಿ ಗುರು ಅಥವಾ ಎರಡನೇ ಮನೆಯಲ್ಲಿ ಇದ್ದಾಗ ಕಾಪಾಡುವವನು ಗುರು ಒಬ್ಬನೇ. ಗುರು ರಾಯರನ್ನು ಪ್ರಾರ್ಥಿಸಿ. ಹಯಗ್ರೀವ ದೇವರನ್ನು ಪೂಜಿಸಿ.

ಕಟಕ:ಗುರುವು ವಕ್ರನಾಗಿ ಅತಿಯಾದ ಕೆಲಸ ಕಾರ್ಯದಲ್ಲಿ ತೊಡಗಿಸುತ್ತಾನೆ. ಹಾಗೆಂದು ಬೆಳಕೂ ಮೂಡದೇ ಇದ್ದಾಗ ಎದ್ದು ಹೊರಡುವುದಲ್ಲ. ಜೀವನದಲ್ಲಿ ಮಾಡುವ ಕೆಲಸಗಳಲ್ಲಿ ಇತಿಮಿತಿ ಇರಬೇಕು. ರಾತ್ರಿಯೆಂಬುದು ಬರುವುದು ಮನುಷ್ಯನ ಪಂಚೇಂದ್ರಿ ಯಕ್ಕೆ ವಿಶ್ರಾಂತಿಗಾಗಿ ಎಂದು ಅರಿತು ಮಿತವಾಗಿ ಕೆಲಸ ಮಾಡಿ. ಗುರುವಿನ ಪ್ರಾರ್ಥನೆ ಇದ್ದರೆ ನಾಳೆಯೆಂಬ ಪ್ರತಿ ದಿನವೂ ಲಭಿಸಿ ಜೀವನವು ಸುಖವಾಗಿ ಸಾಗುತ್ತದೆ.

ಸಿಂಹ:12ರಲ್ಲಿ ಗುರು ವಕ್ರನಾಗಿದ್ದಾನೆ. ಉಚ್ಚ ರಾಶಿಯಲ್ಲಿ ಇರುವಾಗ ಗುರು ವಕ್ರನಾಗಿದ್ದರೂ ಅತಿಯಾದ ತೊಂದರೆ ಕೊಡುವುದಿಲ್ಲ. ಆದರೆ ನಿತ್ಯವೂ ಗುರು ಪ್ರಾರ್ಥನೆ ಇದ್ದರೆ ನಿಮ್ಮನ್ನು ಯಾರೂ ಏನೂ ಮಾಡಲು ಆಗುವುದಿಲ್ಲ. ಮನುಷ್ಯನಿಗೆ ಊಟ ಉಪಾಹಾರ ಎಷ್ಟು ಬೇಕೋ ಕಣ್ಣಿಗೆ ನಿದ್ದೆಯೂ ಅಷ್ಟೇ ಬೇಕು. ಅದರಂತೆ ದೈವ ಬಲ ಇದ್ದರೆ ಗುರು ಸಂಚಾರವು ಸಲೀಸಾಗಿ ನಡೆದು ಶೇ. 70ರಷ್ಟು ಅಧಿಕ ಶುಭ ಫಲವನ್ನು ಅನುಭವಿಸಬಹುದು.

ಕನ್ಯಾ:ಈ ರಾಶಿಯವರಿಗೆ ವಕ್ರ ಷಷ್ಠ ಶನಿ. 11ರಲ್ಲಿ ವಕ್ರೀ ಗುರು. ಹೀಗಿದ್ದಾಗ ಫಲಾಫಲ ವನ್ನು ಕೊಡಲು ಗ್ರಹಗಳಿಗೆ ಶಕ್ತಿಯು ಸಾಲುವುದಿಲ್ಲ. ಸಪ್ತಮ, ಅಷ್ಟಮದ ಶನಿಯನ್ನು ದಾಟುವುದು ಹುಡುಗಾಟದ ಮಾತಲ್ಲ. ದೇವತಾ ಪ್ರಾರ್ಥನೆ ಇರಲಿ. ಶನಿ ಸಂಚಾರ ಸಮಯದಲ್ಲಿ ಎಚ್ಚರಿಕೆಯಿಂದ ಸಾಗಿರಿ. ದತ್ತಾಷ್ಟಕವನ್ನು ಪಠಿಸಿ.

ತುಲಾ:ಕಟಕ ರಾಶಿಯಲ್ಲಿ ಗುರು ಉಚ್ಚನಾಗಿದ್ದರೂ ವಕ್ರಗತಿಯಲ್ಲಿ ಇರುವುದರಿಂದ ನಿಮ್ಮ ಕೆಲಸ ಕಾರ್ಯದಲ್ಲಿ ಯಾವ ಅಡಚಣೆಯೂ ಉಂಟಾಗುವುದಿಲ್ಲ. ನಿಮ್ಮ ಒಡನಾಟ ಸಜ್ಜನರೊಂದಿಗೆ ಇರಲಿ. ಇಷ್ಟಪಟ್ಟ ಕೆಲಸವು ದಡ ಮುಟ್ಟುತ್ತದೆ. ಖಡ್ಗಮಾಲಾ ಸ್ತೋತ್ರವನ್ನು ಪಾರಾಯಣ ಮಾಡಿ.

ವೃಶ್ಚಿಕ:ಕುಜನು ಸ್ವಕ್ಷೇತ್ರದಲ್ಲಿ ಇದ್ದು, ವ್ಯಾಪಾರವು ಕೈಗೂಡಲು ಸುಬ್ರಹ್ಮಣ್ಯನಿಗೆ ಶರಣಾಗುವುದೇ ದೊಡ್ಡ ಸೇವೆ ಎಂದು ತಿಳಿದು ವಿಶೇಷವಾಗಿ ಷಣ್ಮುಖನನ್ನು ಪೂಜಿಸಿ. ಬ್ರಹ್ಮಚಾರಿಗೆ ವಸ್ತ್ರ, ಫಲವನ್ನು ಕೊಟ್ಟು ಷಷ್ಠಿಯಂದು ಅನುಗ್ರಹ ಪಡೆಯಿರಿ. ಬಾಲರೂಪಿ ಸುಬ್ರಹ್ಮಣ್ಯನೇ ನಿಮ್ಮ ಆಸೆಯನ್ನು ಪೂರೈಸುತ್ತಾನೆ.

ಧನುಸ್ಸು: ಡಿಸೆಂಬರ್ ಐದನೇ ತಾರೀಖು ಗುರುವು ಮಿಥುನ ರಾಶಿಗೆ ಬಂದು ಧನುರ್ ರಾಶಿಗೆ ಸಪ್ತಮದಲ್ಲಿ ವಕ್ರಗತಿಯಲ್ಲಿ 2026ರ ಮಾರ್ಚ್ 26ರವರೆಗೆ ಇರುತ್ತಾನೆ. ಈ ಸಂದರ್ಭದಲ್ಲಿ ನೀವು ನಿಮ್ಮ ಸಂಪಾದನೆ ವೃದ್ಧಿಸಿಕೊಂಡು ಜನಹಿತ ಕೆಲಸವನ್ನು ಮಾಡಿ ಹಾಗೂ ನೀವು ಬದುಕುವ ಮಾರ್ಗಕ್ಕೆ ಬೇಕಾದ ದಾರಿಯನ್ನು ಹುಡುಕಿಕೊಳ್ಳಿ.

ಮಕರ: ಗುರುವು ಡಿ. 5ರಿಂದ 6ನೇ ಮನೆಗೆ ಬಂದು ಸೇರುತ್ತಾನೆ. 6ನೇ ಮನೆಯಲ್ಲಿ ವಿಶೇಷ ಫಲ ಕೊಡುವುದಿಲ್ಲ. ಮನಸ್ಸಿಗೆ ಹಿತವಿಲ್ಲದಾಗ ಯಾವ ಕೆಲಸಕ್ಕೂ ಮನಸ್ಸು ಮುದುಡಿಕೊಂಡಿರುತ್ತದೆ. ಈ ಸಂದರ್ಭ ಗುರು ಚರಿತ್ರೆಯ 14ನೇ ಅಧ್ಯಾಯ ಸರ್ವ ಸಂಕಟ ಪರಿಹಾರ ಅಧ್ಯಾಯವನ್ನು ನಿತ್ಯವೂ 2026ರ ಮಾ. 26ರವರೆಗೂ ಓದಲೇಬೇಕು. ನೀವು ಏನಾದರೂ ಸಾಧಿಸಲು ಸಾಧ್ಯವಾಗುತ್ತದೆ. ದೃಢವಾದ ಮನಸ್ಸಿರಲಿ. ಸಂಕಲ್ಪವೂ ಸತ್ಯವಾಗಿರಲಿ.

ಕುಂಭ:ಶನಿಗ್ರಹವು ವಕ್ರದಲ್ಲಿದ್ದು, ನ. 26ರ ಮಾರ್ಗಶಿರ ಶುದ್ದ ಷಷ್ಠಿ ದಿನದಂದು ನೇರವಾಗುತ್ತಾನೆ. ಕಡೆಯ ಭಾಗದ ಶನಿ ಸಂಚಾರದಲ್ಲಿ ಅಲ್ಪ ಸುಖವನ್ನು ಕೊಟ್ಟು ಮನೋಜಾಗ್ರತೆ ಪರಿಶೀಲಿಸುತ್ತಾನೆ. ದೇವರ ದೇವ ಮಹಾದೇವ ನನ್ನು ಪೂಜಿಸಿ. ಗುರುವಿನ ಅನುಗ್ರಹ ಪಡೆದರೆ ಬಾಳಿನಲ್ಲಿ ನೀವು ಗೆದ್ದಂತೆ. ಮನುಷ್ಯನು ಸುಖವಾಗಿರಬೇಕು. ಶಾಂತನಾಗಿರಲೂಬೇಕು. ಶಾಂತಿ, ಸುಖಕ್ಕಾಗಿ ಇಷ್ಟ ಕಾರ್ಯಂ ಸಿದ್ಧಿಃ ಗುರುಸ್ಮರಣ ಮಾತ್ರೇಣ.

ಮೀನ: ಶನಿಯ ಮಧ್ಯಭಾಗದ ಸಂಚಾರದಲ್ಲಿ ನೀವು ಇದ್ದೀರಿ. ಅದರಲ್ಲೂ ಶನಿಯು ನಿಮಗೆ ನಿತ್ಯವೂ ಒಂದಲ್ಲ ಒಂದು ಪರೀಕ್ಷೆಯನ್ನು ಒಡ್ಡುತ್ತಾನೆ. ಅದನ್ನು ಎದುರಿಸಿ ನೀವು ಉತ್ತೀರ್ಣರಾಗಲೆಂದು. ‘ಶುದ್ಧ ಅಭ್ಯಾಸಂ ದೈವಮಾರ್ಗೆಣ.’ ಅಂದರೆ ದೇವರನ್ನು ಸ್ಮರಿಸುವುದು ಪೂಜಿಸುವುದು ಏಕಾಗ್ರತೆಯಿಂದ ಜಪ ಮಾಡುವುದು ನಮ್ಮನ್ನು ನಾವು ಸ್ವಾಧೀನದಲ್ಲಿ ಇಟ್ಟುಕೊಂಡು ನಮ್ಮ ಕೆಲಸವನ್ನು ಪೂರ್ಣ ಮಾಡಿಕೊಳ್ಳುವುದಕ್ಕೆ. ದತ್ತಾತ್ರೇಯ ಗುರುಚರಿತ್ರೆಯ 11ನೇ ಅಧ್ಯಾಯ ತಪ್ಪದೇ ಓದಿರಿ.