ಸಂವತ್ಸರದ ಆರಂಭದಲ್ಲಿ ಜೂ. 1ರವರೆಗೆ ಗುರು ದಶಮದಲ್ಲಿ ಸಂಚರಿಸುತ್ತಾನೆ. ಇದು ವೃತ್ತಿ ಜೀವನಕ್ಕೆ ಶುಭ. ಹೊಸ ಜವಾಬ್ದಾರಿಗಳು, ಬಡ್ತಿಗಳು, ಉದ್ಯೋಗ ಬದಲಾವಣೆ ಮತ್ತು ಮನ್ನಣೆ ಸಾಧ್ಯ. ನಾಯಕತ್ವದ ಪಾತ್ರ, ಸೇವಾ ಮನೋಭಾವ ಬಳಸಲು ಸೂಕ್ತ ಸಮಯ. ಜೂ. 1ರಿಂದ ಗುರು ಕಟಕರಾಶಿಯಲ್ಲಿ ಸಂಚಾರ. ಇದು ಉಚ್ಚ ಗುರು. ಅದ್ಭುತವಾದ ಧನಯೋಗ ಮತ್ತು ಲಾಭಯೋಗವನ್ನು ಅನುಭವಿಸುವಿರಿ. ಹಿರಿಯರಿಂದ ಬಲವಾದ ಬೆಂಬಲ, ಆರ್ಥಿಕ ಬೆಳವಣಿಗೆ. ಸರಿಯಾದ ಮಾರ್ಗದರ್ಶನ ಪಡೆಯಲು ಸೂಕ್ತ ಸಮಯ. ವ್ಯಯ ಭಾವದ ಕೇತು ಸ್ಥಿತ ಆಧ್ಯಾತ್ಮಿಕ ಬೆಳವಣಿಗೆ, ಆಂತರಿಕ ವೈರಾಗ್ಯ, ವಿದೇಶ ಪ್ರಯಾಣ ಅಥವಾ ಏಕಾಂತ ಅನುಭವಗಳನ್ನು ಸೂಚಿಸುತ್ತದೆ, ಗುರು ಸಿಂಹ ಪ್ರವೇಶ ಕೇತುವಿನೊಂದಿಗೆ ಸೇರಿ ಆಧ್ಯಾತ್ಮಿಕತೆ, ಧ್ಯಾನ, ಆಸಕ್ತಿಯನ್ನು ಹೆಚ್ಚಿಸುತ್ತದೆ. ಶನೇಶ್ಚರನ ಸಪ್ತಮ ಸಂಚಾರ ಕಾಲದಲ್ಲಿ ವಿವಾಹ, ದೀರ್ಘಕಾಲೀನ ಸಂಬಂಧಗಳು ಮತ್ತು ಪಾಲುದಾರಿಕೆಗಳಲ್ಲಿ ಕಠಿಣವಾಗಿ ಶ್ರಮಿಸಬೇಕಾಗುತ್ತದೆ. ಒತ್ತಡ, ಜವಾಬ್ದಾರಿ ಹಾಗೂ ಕೆಲವೊಮ್ಮೆ ಒಂಟಿತನ. ಆದರೆ ಇದು ಸಂಬಂಧಗಳಲ್ಲಿ ಮಾನಸಿಕವಾಗಿ ಬೆಳೆಯಲು ಹೆಚ್ಚು ಸಮತೋಲಿತವಾಗಿ ಮತ್ತು ವಾಸ್ತವಿಕವಾಗಿರಲು ಪ್ರೇರೇಪಿಸುತ್ತದೆ. ರಾಹು ಷಷ್ಠದಲ್ಲಿ ಸಂಚಾರ ಮಾಡುವಾಗ ಸ್ಪರ್ಧೆಗಳಲ್ಲಿ ಗೆಲ್ಲಲು ಸುವರ್ಣಾವಕಾಶ. ರಾಜಕೀಯ ಒತ್ತಡ ತಡೆಯಬಲ್ಲಿರಿ, ಧೈರ್ಯವಾಗಿ ಮುನ್ನಡೆಯಲು ದಾರಿ ತೋರುವುದು. ಜೂ. 2ರಿಂದ ಅ. 30ರವರೆಗೆ ಗುರು ಲಾಭದಲ್ಲಿ ಸಂಚಾರ ಮಾಡುವುದರಿಂದ ಈ ಸಮಯದಲ್ಲಿ ವ್ಯಾಪಾರ-ವಹಿವಾಟು ವಿಸ್ತರಣೆಗೆ ಉತ್ತಮ ಸಮಯ. ಈ ಸಮಯದಲ್ಲಿ ಹೊಸ ಶಾಖೆಗಳನ್ನು ತೆರೆಯುವುದು, ಹೊಸ ಉತ್ಪನ್ನಗಳು ಅಥವಾ ಸೇವೆಗಳನ್ನು ಬಿಡುಗಡೆ ಮಾಡುವುದು ಮತ್ತು ದೊಡ್ಡ ಒಪ್ಪಂದಗಳನ್ನು ಚರ್ಚಿಸುವುದು ಮುಂತಾದ ಕೆಲಸಗಳು ಉತ್ತಮ ಫಲಿತಾಂಶ ನೀಡಬಲ್ಲವು.
