ನಿವೇಶನದ ಆವರಣದಲ್ಲಿ ಯಾವ ಸಸ್ಯ ನೆಡಬೇಕು ? : ನಿವೇಶನದ ಆವರಣದಲ್ಲಿ ಇಂತಹುದೇ ಸಸ್ಯಗಳನ್ನು ನೆಡಬೇಕೆಂಬ ನಿಯಮವಿಲ್ಲ. ಕಾರಣ ಸಸ್ಯಗಳು ಮನುಷ್ಯನಿಗೆ ಬೇಕಾದ ಶುದ್ಧ ಆಮ್ಲಜನಕವನ್ನು ಪೂರೈಸುವುದರಿಂದ ಯಾವುದೇ ಸಸ್ಯಗಳನ್ನು ಬೇಕಾದರೂ ಮನೆಯ ಸುತ್ತಮುತ್ತ ನೆಡಬಹುದು. ಆದರೆ, ಕೆಲವೊಂದಿಷ್ಟು ಸಸ್ಯಗಳಲ್ಲಿ ಔಷಧೀಯ ಗುಣವಿದ್ದು, ಅವುಗಳ ಉಪಯೋಗವನ್ನು ಅರಿತು ಅಂತಹ ಗಿಡಗಳನ್ನು ಹೆಚ್ಚಾಗಿ ಬೆಳೆಸುವುದರಿಂದ ಆ ಮನೆಯಲ್ಲಿ ವಾಸ ಮಾಡುವವರಿಗೆ ಹೆಚ್ಚು ಪ್ರಯೋಜನವಾಗುತ್ತದೆ. ಉದಾಹರಣೆಗೆ ತುಳಸಿಗಿಡವನ್ನು ಅಂಗಳದಲ್ಲಿ ಬೆಳೆಸುವ ಪದ್ದತಿ ಸಾಕಷ್ಟು ಮನೆಯಲ್ಲಿದೆ. ತುಳಸಿ ಗಿಡದಲ್ಲಿ ಔಷಧೀಯ ಗುಣ ಹೇರಳವಾಗಿರುವುದರಿಂದ ಅಂಗಳದಲ್ಲಿ ಮಾತ್ರವಲ್ಲದೆ ಮನೆಯ ಸುತ್ತಲೂ ನೆಡುವುದರಿಂದ ಅಸ್ತಮಾ, ಶ್ವಾಸಕೋಶ ಸಂಬಂಧಿ ಆರೋಗ್ಯ ಸಮಸ್ಯೆ ಇರುವವರಿಗೆ ಹೆಚ್ಚು ಉಪಯೋಗವಾಗಲಿದೆ. ಜತೆಗೆ ಫಲಗಳನ್ನು ನೀಡುವ ಯಾವುದೇ ಗಿಡಗಳನ್ನು ನೆಡುವುದು ಕೂಡ ಉತ್ತಮ. ಶುದ್ಧಗಾಳಿಯೊಂದಿಗೆ ಹಣ್ಣು-ಕಾಯಿಗಳನ್ನು ನೀಡುತ್ತವೆ.
