ಸಾಕ್ಷಿ, ಪುರಾವೆ, ಆಧಾರ ಎಂಬಿತ್ಯಾದಿ ಪ್ರಮಾಣಗಳನ್ನು ಬದುಕಿನ ವಿಭಿನ್ನ ಸಂದರ್ಭಗಳಲ್ಲಿ ಅನಿವಾರ್ಯವಾಗಿ ಬಳಸಲೇಬೇಕಾದ ಸನ್ನಿವೇಶಗಳು ಉದ್ಭವಿಸುತ್ತವೆ. ಅನೇಕ ವಿಚಾರಗಳಿಗೆ ಆಧಾರ ಏನೆಂದು ಜಗತ್ತಿಗೆ ಹೇಳಬೇಕಾಗಿ ಬರುತ್ತದೆ. ಸಾಕ್ಷ್ಯಕ್ಕೆ ಅಷ್ಟೊಂದು ಮಹತ್ವವಿದೆ. ಪುರಾವೆ ಬೇಕಾಗುವಂತಹ ರೀತಿಯಲ್ಲಿ ಮಾತ್ರ ಅನೇಕ ಪರಿವರ್ತನೆಗಳಾಗಿವೆ. ಅದು ಜಗತ್ತಿನಲ್ಲಾಗುತ್ತಿರುವ ಬದಾಲಾವಣೆಗಳ ದ್ಯೋತಕ. ರಾಜ್ಯದ ಮಾಜಿ ಶಿಕ್ಷಣ ಹಾಗೂ ಕಾನೂನು ಸಚಿವರು ನನ್ನಲ್ಲಿ ಹೇಳಿದ್ದ ಮಾತು ಅದೆಷ್ಟು ಮಾರ್ವಿುಕವಾಗಿವೆ ನೋಡಿ. ಹಿಂದೆಲ್ಲಾ ಓರ್ವವ್ಯಕ್ತಿಯ ಗುಣನಡತೆಗಳು ಅಥವಾ ಹವ್ಯಾಸ, ಅಭ್ಯಾಸಗಳು ಸರಿಯಿಲ್ಲವೆಂದು ಇತರರಲ್ಲಿ ಹೇಳಬೇಕಾದರೆ ಸಾಕ್ಷಿ ನೀಡಬೇಕಾಗಿತ್ತು. ಆದರೆ ಇಂದು ವ್ಯಕ್ತಿಯೊಬ್ಬ ಸರಿಯಿದ್ದಾನೆ ಎಂದು ಹೇಳಲು ಸಾಕ್ಷ್ಯ ಕೊಡಬೇಕಾದ ಪರಿಸ್ಥಿತಿಯಿದೆ! ನೈತಿಕತೆ, ಸಂಬಂಧಗಳು, ವ್ಯವಹಾರಗಳು ಯಾವ ರೀತಿಯಲ್ಲಿ ತಳಮಟ್ಟಕ್ಕೆ ಹೋಗುತ್ತಿವೆ ಎಂದು ಅರ್ಥೈಸಿಕೊಳ್ಳಲು ಬೇರೆ ನಿದರ್ಶನಗಳೇ ಬೇಡ.
