ಬೆಳೆ ಸಾಲದ ಮೇಲಿನ ಮನ್ನಾ ಹೊರತಾಗಿಯೂ ರೈತರ ಮೇಲಿನ ಸಾಲದ ಭಾರ ಕಡಿಮೆಯಾದಂತೆ ಕಾಣಿಸುತ್ತಿಲ್ಲ. ಎನ್ಪಿಎ ಪ್ರಮಾಣ ಹೆಚ್ಚುವುದು ಒಂದು ಕಡೆಯಾದರೆ, ಸಾಲ ವಸೂಲಿಗೆ ನಿಧಾನಗತಿಯ ಧೋರಣೆ ಬ್ಯಾಂಕಿಂಗ್ ವ್ಯವಸ್ಥೆ ಮೇಲೆ ಪರಿಣಾಮ ಬೀರುತ್ತಿದೆ. ಸದ್ಯ ಲಭ್ಯವಿರುವ ಮಾಹಿತಿ ಪ್ರಕಾರವೇ ನೋಡುವುದಾದರೆ, ರಾಷ್ಟ್ರೀಕೃತ ಬ್ಯಾಂಕ್ಗಳಲ್ಲಿ 41 ಸಾವಿರಕ್ಕೂ ಮಿಕ್ಕಿದ ಎನ್ಪಿಎ ಪ್ರಕರಣ ಬಗೆಹರಿಯುವ ಹಂತ ದಾಟದೇ ಬಾಕಿಯಾಗಿದೆ. ಅಂದರೆ ಸಾಲ ಮರುಪಾವತಿಯೂ ಆಗುತ್ತಿಲ್ಲ, ವರ್ಷದಿಂದ ವರ್ಷಕ್ಕೆ ಈ ಪಟ್ಟಿಗೆ ಸೇರುವ ಸಂಖ್ಯೆಯೂ ಹೆಚ್ಚಾಗುತ್ತಿದೆ, ಸಮಸ್ಯೆ ಪರಿಹರಿಸಬೇಕಾದ ಪಾಲುದಾರರಾದ ಅಧಿಕಾರಿಗಳು ಸಹಕಾರ ನೀಡುತ್ತಿಲ್ಲ. ಈ ಬೆಳವಣಿಗೆ ಹಣಕಾಸು ಸಂಸ್ಥೆಗಳನ್ನು ಕಂಗಾಲು ಮಾಡಿದ್ದು, ಸರ್ಕಾರದ ನೆರವು ಬಯಸಿವೆ. ಕಳೆದ ಆರ್ಥಿಕ ವರ್ಷವೊಂದರಲ್ಲೇ 15,949 ಪ್ರಕರಣ ಸರ್ಕಾರದ ಹಂತದಲ್ಲಿ ಬಾಕಿಯಾಗಿರುವುದು ಕಂಡುಬಂದಿದೆ. ಹಿಂದಿನ ಮೂರು ವರ್ಷಕ್ಕೆ ಹೋಲಿಸಿದರೆ 2020-21ರ ಒಂದೇ ವರ್ಷದಲ್ಲಿ ಬಾಕಿ ಸಂಖ್ಯೆ ಹೆಚ್ಚು ಎಂಬುದು ಗಮನಾರ್ಹ ಸಂಗತಿ. ಕೃಷಿ ಸಂಬಂಧಿ ಸಾಲಗಳು ಅನುತ್ಪಾದಕ ಪ್ರಮಾಣ ವರ್ಷದಿಂದ ವರ್ಷಕ್ಕೆ ಹೆಚ್ಚಾಗುತ್ತಿರುವ ಬೆನ್ನಲ್ಲೇ ಸಾಲ ವಸೂಲಿಗೆ ಕಾನೂನಿನಲ್ಲಿ ಬಿಗಿ ಕ್ರಮದ ಅಗತ್ಯತೆಯನ್ನು ಬ್ಯಾಂಕ್ಗಳು ಪ್ರತಿಪಾದಿಸಿದ್ದು ರಾಜ್ಯ ಸರ್ಕಾರದ ಮುಂದೆ ಪ್ರಸ್ತಾವನೆ ಮುಂದಿಟ್ಟಿವೆ. ಕೃಷಿ ಸಂಬಂಧಿತ ಸಾಲ ವಸೂಲಿ ವೇಳೆ ರೈತರಿಗೆ ರಕ್ಷಣೆ ನೀಡುವ ಉದ್ದೇಶದಿಂದ ರಾಜ್ಯದಲ್ಲಿ ಕಾನೂನು 46 ವರ್ಷಗಳಿಂದಲೂ ಜಾರಿಯಲ್ಲಿದೆ. ‘ಕರ್ನಾಟಕ ಕೃಷಿ ಸಾಲ ಕಾರ್ಯಾಚರಣೆಗಳು ಮತ್ತು ಇತರ ನಿಬಂಧನೆಗಳು 1974’ ಅಡಿಯಲ್ಲಿ ಬ್ಯಾಂಕ್ಗಳ ಸಾಲ ವಸೂಲಾತಿ ನಡೆದುಕೊಂಡುಬಂದಿದೆ. ಅದರೆ, ಇದರಲ್ಲಿರುವ ನಿಯಮಗಳು ಸಾಲ ವಸೂಲಾತಿಯನ್ನು ಸಲೀಸು ಮಾಡುತ್ತಿಲ್ಲ, ಬ್ಯಾಂಕಿಂಗ್ ವ್ಯವಸ್ಥೆ ಹಾಳಾಗುತ್ತಿದೆ ಎಂಬುದು ಬ್ಯಾಂಕರ್ಗಳ ಕಳವಳವಾಗಿದೆ. ರೈತನೊಬ್ಬ ಕೃಷಿ ಸಾಲ ಬಾಕಿ ಉಳಿಸಿಕೊಂಡು ಅನುತ್ಪಾದಕ ಪಟ್ಟಿಗೆ ಸೇರಿತೆಂದರೆ ಅದನ್ನು ಅಷ್ಟು ಸುಲಭವಾಗಿ ವಸೂಲು ಮಾಡುವ ಅವಕಾಶ ಈಗಿಲ್ಲ. ತನ್ನದೇ ಆದ ಪ್ರಕ್ರಿಯೆ ಇದೆ. ಬ್ಯಾಂಕ್ಗಳು ಪ್ರಕ್ರಿಯೆಯಲ್ಲಿ ಕಷ್ಟಪಡುವಂತಾಗಿದೆ, ಇದೇ ಕಾರಣಕ್ಕೆ ಅನುತ್ಪಾದಕ ಸಾಲದ ಸಂಖ್ಯೆ ದೊಡ್ಡದಾಗುತ್ತಿದೆ ಎಂದು ರಾಜ್ಯ ಲೀಡ್ ಬ್ಯಾಂಕ್ ಅಧಿಕಾರಿಗಳು ಅಭಿಪ್ರಾಯ ವ್ಯಕ್ತಪಡಿಸುತ್ತಾರೆ.
