ಪಾಳು ಜಮೀನಿನಲ್ಲಿ ಯಶಸ್ವಿ ಕೃಷಿ; 15 ಎಕರೆ ಜಾಗದಲ್ಲಿ ತರಹೇವಾರಿ ಬೆಳೆ ಬೆಳೆದ ಮಂಜೇಗೌಡ..

ಕರೊನಾ ಸಂಕಷ್ಟದ ದಿನಗಳಲ್ಲಿ ಯುವ ಸಮುದಾಯ ಕೃಷಿಯತ್ತ ವಾಲಿದ್ದು, ಹಲವಾರು ಕೃಷಿ ಚಟುವಟಿಕೆಗಳಲ್ಲಿ ತೊಡಗಿಕೊಂಡು ಬದುಕು ರೂಪಿಸಿಕೊಳ್ಳಲು ಮುಂದಾಗಿದ್ದಾರೆ. ತೋಟಗಾರಿಕೆ, ಹಣ್ಣು, ತರಕಾರಿ ಬೆಳೆಯುವುದು, ಹೈನುಗಾರಿಕೆ, ಕುರಿ-ಮೇಕೆ-ಕೋಳಿ ಸಾಕಣೆ ಮಾಡಿ ಯಶಸ್ಸು ಗಳಿಸುತ್ತಿದ್ದಾರೆ.

| ಆರ್.ಶ್ರೀನಿವಾಸ್ ಉಳ್ಳಾವಳ್ಳಿ ಚನ್ನರಾಯಪಟ್ಟಣ

ಹಲವು ವರ್ಷಗಳಿಂದ ಉಳುಮೆ ಕಾಣದೆ ಮಂಟಿಕಲ್ಲು ಹಾಗೂ ಕಾರೆ ಮುಳ್ಳಿನ ಗುಚ್ಚಿಯಿಂದ ಕೂಡಿ ಪಾಳು ಬಿದ್ದಿದ್ದ ಜಮೀನಿನಲ್ಲಿ ಉದ್ಯಮಿಯೊಬ್ಬರು ಕೃಷಿ ಮಾಡಿ ಯಶಸ್ಸಿಯಾಗಿರುವುದಲ್ಲದೆ, ಇತರರಿಗೆ ಮಾದರಿ ಎನಿಸಿದ್ದಾರೆ. ಚನ್ನರಾಯಪಟ್ಟಣ ತಾಲೂಕು ಹಿರೀಸಾವೆ ಹೋಬಳಿ ನಾಗನಹಳ್ಳಿ ಗ್ರಾಮದ ಸಿ.ಮಂಜೇಗೌಡ, ಪಾಳು ಬಿದ್ದಿದ್ದ ತಮ್ಮ 15 ಎಕರೆ ಪ್ರದೇಶದಲ್ಲಿ ಅರಣ್ಯಕೃಷಿಗೂ ಆದ್ಯತೆ ನೀಡುತ್ತಿದ್ದಾರೆ. ಬೆಂಗಳೂರಿನಲ್ಲಿ ಉದ್ಯಮಿಯಾಗಿರುವ ಇವರು, ಹಿರೀಸಾವೆ ಜಿಲ್ಲಾ ಪಂಚಾಯಿತಿ ಕ್ಷೇತ್ರದ ಸದಸ್ಯರಾಗಿದ್ದರು. ಸದಸ್ಯತ್ವ ಅವಧಿ ಮುಗಿದ ಮೇಲೆ ಕೃಷಿಯತ್ತ ಮುಖ ಮಾಡಿದ್ದು, ಪರಿಸರ ಅಭಿವೃದ್ಧಿಯಲ್ಲಿಯೂ ತೊಡಗಿಸಿಕೊಂಡಿದ್ದಾರೆ.

15 ಎಕರೆ ಪೈಕಿ 5-6 ಎಕರೆ ಜಾಗದಲ್ಲಿ ಶುಂಠಿ ಬೆಳೆ ಅಳವಡಿಸಿದರೆ, ಒಂದಷ್ಟು ಭಾಗದಲ್ಲಿ ನೂರಾರು ತೆಂಗು, ಅಡಕೆ ಹಾಗೂ ಬಾಳೆ ನೆಟ್ಟಿದ್ದಾರೆ. ಉಳಿದ ಜಮೀನಿನಲ್ಲಿ ಮಾವು, ಹಲಸು, ದಾಳಿಂಬೆ, ಚಕ್ಕೆ, ಗಸಗಸೆ, ಏಲಕ್ಕಿ, ಸಪೋಟ, ಸೀತಾಫಲ, ಲಕ್ಷ್ಮಣಫಲ, ಚಕ್ಕೋತ, ನೇರಳೆ, ನಿಂಬೆ, ಯಳ್ಳಿ, ಚೆರ್ರಿ, ಬೆಟ್ಟದ ನೆಲ್ಲಿ, ಸೀಬೆ, ಪಪ್ಪಾಯಿ, ರಾಮಫಲ, ಕಿತ್ತಳೆ, ಹುಣಸೆ, ಮೂಸಂಬಿ, ಬಾದಾಮಿ, ಬಟರ್ ಫೂ›ಟ್ ಸೇರಿ ವಿವಿಧ ಬಗೆಯ ನೂರಾರು ಹಣ್ಣಿನ ಗಿಡಗಳನ್ನು ನೆಟ್ಟು ಪೋಷಣೆ ಮಾಡುತ್ತಿದ್ದಾರೆ.

ಇವೆಲ್ಲದರ ನಡುವೆ ಸಾವಿರಾರು ಹೆಬ್ಬೇವು, ತೇಗ, ಹೊಂಗೆ, ಸಿಲ್ವರ್, ಮಹಾಘನಿ, ಕಾಡು ಗೋಡಂಬಿ ಹಾಗೂ ಇನ್ನಿತರ ಗಿಡಗಳನ್ನು ನೆಟ್ಟು ಅರಣ್ಯ ಕೃಷಿ ಅಭಿವೃದ್ಧಿಗೂ ಸಾಕಷ್ಟು ಆದ್ಯತೆ ನೀಡಲಾಗಿದೆ. ಜತೆಗೆ ಔಷಧ ಗುಣ ಹೊಂದಿರುವ ನೂರಾರು ಬಗೆಯ ಗಿಡಗಳನ್ನು ಬೆಳೆಸುತ್ತಿದ್ದಾರೆ. ಎಲ್ಲ ಸಸಿಗಳಿಗೂ ಹನಿ ನೀರಾವರಿ ಪದ್ಧತಿಯಲ್ಲಿ ನೀರಿನ ವ್ಯವಸ್ಥೆ ಮಾಡಲಾಗಿದೆ. ಹಸು, ಕುರಿ ಹಾಗೂ ಕೋಳಿ ಸಾಕಣೆಗೂ ಆದ್ಯತೆ ನೀಡಿದ್ದಾರೆ. ನಾಗನಹಳ್ಳಿ, ಪಿ.ಹೊಸಹಳ್ಳಿ ಗ್ರಾಮದ ತೋಪು ಹಾಗೂ ನಿಂಬೇಹಳ್ಳಿ ಗ್ರಾಮದ ರಸ್ತೆ ಬದಿ 2500ಕ್ಕೂ ಹೆಚ್ಚು ಸಸಿಗಳನ್ನು ನೆಟ್ಟು ಹನಿ ನೀರಾವರಿ ಪದ್ಧತಿ ಅಳವಡಿಸಿ ಪೋಷಣೆ ಮಾಡುವ ಮೂಲಕ ಸಿ.ಮಂಜೇಗೌಡ ಪರಿಸರ ಅಭಿವೃದ್ಧಿಗೂ ಆದ್ಯತೆ ನೀಡಿದ್ದಾರೆ.

ಮಳೆ ನೀರು ಸಂಗ್ರಹಕ್ಕೆ ಕೃಷಿ ಹೊಂಡ: ಮಳೆ ನೀರು ಸಂಗ್ರಹಿಸುವ ಸಲುವಾಗಿ 100 ಅಡಿ ಉದ್ದ, 70 ಅಡಿ ಅಗಲವಾದ ಕೃಷಿ ಹೊಂಡ ನಿರ್ವಿುಸಲಾಗಿದೆ. ಹೊಂಡಕ್ಕೆ ಪಂಪ್​ಸೆಟ್ ಅಳವಡಿಸಿದ್ದು. ಪೈಪ್​ಲೈನ್ ಮೂಲಕ ಗಿಡ, ಮರಗಳಿಗೆ ಹನಿ ನೀರಾವರಿ ಪದ್ಧತಿಯೊಂದಿಗೆ ನೀರು ಪೂರೈಕೆ ಮಾಡುವ ವ್ಯವಸ್ಥೆ ಮಾಡಲಾಗಿದೆ. ಕೃಷಿ ಹೊಂಡದಲ್ಲಿ ಹೆಚ್ಚು ನೀರು ಸಂಗ್ರಹಗೊಂಡಿದ್ದು ಅಂತರ್ಜಲ ಚೇತರಿಕೆಯೊಂದಿಗೆ ಕೊಳವೆಬಾವಿಗಳಲ್ಲಿ ಸಾಕಷ್ಟು ಪ್ರಮಾಣದಲ್ಲಿ ನೀರು ಲಭ್ಯವಾಗುತ್ತಿದೆ ಎನ್ನುತ್ತಾರೆ ಮಂಜೇಗೌಡ.