ಬ್ಯಾಂಕ್ ರಾಷ್ಟ್ರೀಕರಣ, ಜನಧನ್ ಖಾತೆಗಳ ಮೂಲಕ ಶ್ರೀಸಾಮಾನ್ಯರಿಗೆ ಬ್ಯಾಂಕ್ಗಳ ಬಾಗಿಲನ್ನು ತೆರೆದ ಸರ್ಕಾರ ಗ್ರಾಮೀಣ ಕ್ಷೇತ್ರದ ಕಡಿಮೆ ಶಿಕ್ಷಿತ ಜನಸಾಮಾನ್ಯರಿಗೆ ಸುಲಲಿತವಾಗಿ ಬ್ಯಾಂಕಿಂಗ್ ಸೇವೆ ಸಿಗುವಂತೆ ಮಾಡಬೇಕಾಗಿದೆ. ಆಯಾ ಪ್ರಾದೇಶಿಕ ಭಾಷೆಯಲ್ಲಿ ವ್ಯವಹಾರ ಮಾಡುವ ಅನುಕೂಲಕರ ವಾತಾವರಣವಿಲ್ಲದೇ ಗ್ರಾಮೀಣ ಮಹಿಳೆಯರು ಮತ್ತು ಕಡಿಮೆ ಶಿಕ್ಷಿತ ವರ್ಗದ ಜನರು ಬ್ಯಾಂಕಿಂಗ್ ಸೇವೆ ಪಡೆಯಲು ಮುಂದೆ ಬರಲಾರರು. ಸರ್ಕಾರದ ಪ್ರತಿಷ್ಠಿತ ಯೋಜನೆಗಳಾದ ‘ಪ್ರಧಾನಮಂತ್ರಿ ಮುದ್ರಾ ಸಾಲ’, ‘ಉದ್ಯೋಗ ಸೃಜನ ಕಾರ್ಯಕ್ರಮ’ (PMEGP) ಮೊದಲಾದ ಸಾಲ ಯೋಜನೆಗಳು, ಸಾಮಾಜಿಕ ಸುರಕ್ಷತಾ ಯೋಜನೆಗಳಾದ ಪ್ರಧಾನಮಂತ್ರಿ ಜೀವನ್ಜ್ಯೋತಿ ವಿಮಾ ಯೋಜನೆ (PMJBY), ಪ್ರಧಾನಮಂತ್ರಿ ಸುರಕ್ಷಾ ವಿಮಾ ಯೋಜನೆ (PMSBY), ಅಟಲ್ ಪೆನ್ಷನ್ ಯೋಜನೆಗಳು ಜನಸಾಮಾನ್ಯರಿಗೆ ತಲುಪಿಸಬೇಕಾದ ಬ್ಯಾಂಕ್ಗಳು ಪ್ರಾದೇಶಿಕ ಭಾಷೆಯಲ್ಲಿ ವ್ಯವಹರಿಸುವಂತಾಗಬೇಕು. ಈ ನಿಟ್ಟಿನಲ್ಲಿ ಬ್ಯಾಂಕಿಂಗ್ ನೇಮಕಾತಿ ವ್ಯವಸ್ಥೆಯಲ್ಲಿ ಪ್ರಾದೇಶಿಕ ಭಾಷಾಜ್ಞಾನಕ್ಕೆ ಒತ್ತು ಸಿಗುವಂತೆ ಸೂಕ್ತ ಬದಲಾವಣೆ ತುರ್ತಾಗಿ ಜಾರಿಯಾಗಬೇಕಿದೆ.
