ಬದುಕು ಭಗವಂತ ನಮಗೆ ಕೊಟ್ಟ ಒಂದು ಉತ್ತಮ ಅವಕಾಶ. ಅದನ್ನು ನಮ್ಮ ಕೈಯಾರೆ ಹಾಳು ಮಾಡಿಕೊಳ್ಳಬಾರದು. ಎಷ್ಟು ಸಾಧ್ಯವೋ ಅಷ್ಟು ಉತ್ತಮ ರೀತಿಯಲ್ಲಿ ಬದುಕಬೇಕು. ಸತ್ತಾಗ ನಾಲ್ಕು ಜನರಿಂದ ಒಳ್ಳೆಯ ಮಾತುಗಳು ಬರಬೇಕೇ ಹೊರತು, ಆತ ಸತ್ತದ್ದು ಒಳ್ಳೆಯದೇ ಆಯಿತು ಅನ್ನುವ ಹಾಗೆ ಬದುಕಬಾರದು. ಉಗ್ರಗಾಮಿಗಳು, ಭಯೋತ್ಪಾದಕರು ಸತ್ತಾಗ ಯಾರೂ ಅವರಿಗಾಗಿ ಮಿಡಿಯುವುದಿಲ್ಲ. ಆದರೆ ಕೆಲ ಮಹಾನ್ ವ್ಯಕ್ತಿಗಳು, ಸಾಧು-ಸಂತರು, ಪರೋಪಕಾರಿಗಳು ನಿಧನರಾದಾಗ ಸಾವಿರಾರು ಜನರು ದುಃಖ ವ್ಯಕ್ತಪಡಿಸುತ್ತಾರೆ. ಮೊನ್ನೆಯಷ್ಟೇ ಭಾರತದ ಖ್ಯಾತ ಉದ್ಯಮಿ ರತನ್ ಟಾಟಾ ನಮ್ಮನ್ನಗಲಿದ್ದಾರೆ. ಅವರ ಅಗಲುವಿಕೆ ದೇಶಕ್ಕೆ ಬಹುದೊಡ್ಡ ನಷ್ಟ. ಅಂತಹ ವ್ಯಕ್ತಿಯ ಸಾವಿಗೆ ಎಲ್ಲರೂ ಕಂಬನಿ ಸುರಿಸಿದ್ದಾರೆ. ಅವರು ದೇಶದ ಪ್ರಮುಖ ವ್ಯಾಪಾರ ಉದ್ಯಮಿ, ಲೋಕೋಪಕಾರಿಯಾಗಿ ಖ್ಯಾತರಾದವರು ಮಾತ್ರವಲ್ಲದೆ ಭಾರತದ ಉದ್ಯಮವನ್ನು ವಿಶ್ವದಾದ್ಯಂತ ಹಬ್ಬಿಸಿ ವಿಶ್ವವೇ ಭಾರತದತ್ತ ತಿರುಗಿ ನೋಡುವಂತೆ ಮಾಡಿದವರು. ಅವರ ಯಶಸ್ಸಿನ ಕಥೆಯು ನಮಗೆಲ್ಲ ಸ್ಪೂರ್ತಿಯಾಗಿದೆ. ಟಾಟಾ ಗ್ರೂಪ್ ಭಾರತದ ಪ್ರತಿಷ್ಠಿತ ಬಹುರಾಷ್ಟ್ರೀಯ ಸಂಘಟಿತ ಸಂಸ್ಥೆಯಾಗಿದ್ದು ವಾಹನ, ಉಕ್ಕು, ಮಾಹಿತಿ ತಂತ್ರಜ್ಞಾನ, ದೂರಸಂಪರ್ಕ ಮುಂತಾದ ವಿವಿಧ ಕ್ಷೇತ್ರಗಳಲ್ಲಿ ಕಾರ್ಯ ನಿರ್ವಹಿಸುತ್ತಿದೆ. ಅದು ಸ್ಥಾಪನೆಯಾದದ್ದು 1868ರಲ್ಲಿ. ಟಾಟಾ ಸನ್ಸ್ನ ಜೆಆರ್ಡಿ ಟಾಟಾ ಅಧ್ಯಕ್ಷ ಪದವಿಯಿಂದ ಕೆಳಗಿಳಿದ ನಂತರ ಅವರ ಉತ್ತರಾಧಿಕಾರಿಯಾಗಿ 1990-91ರಲ್ಲಿ ರತನ್ ಟಾಟಾ ಅಧಿಕಾರ ವಹಿಸಿಕೊಳ್ಳುತ್ತಾರೆ. ಅವರು ತಮ್ಮ ವೃತ್ತಿ ಜೀವನದಲ್ಲಿ ಸಾಕಷ್ಟು ಏಳುಬೀಳುಗಳನ್ನು ಕಂಡವರು. ಸೋಲು ಸಮಸ್ಯೆಗಳಿಗೆ ಜಗ್ಗದೆ, ಯಶಸ್ಸಿಗೆ ಹಿಗ್ಗದೆ ಎಲ್ಲವನ್ನೂ ಸಮಚಿತ್ತದಿಂದ ಸ್ವೀಕರಿಸಿ ಹೊಸ ಹೊಸ ಆಲೋಚನೆಗಳ ಮೂಲಕ ಜನಮನವನ್ನು ಗೆದ್ದವರು. ದೇಶದ ಜೊತೆಗೆ ಸದಾ ಇದ್ದು ಸಂಕಷ್ಟದ ಪರಿಸ್ಥಿತಿಯಲ್ಲಿ ಕೈಲಾದಷ್ಟು ನೆರವು ನೀಡಿದವರು. ಅವರ ದೂರದೃಷ್ಟಿ, ನಾಯಕತ್ವ, ಸಾಮಾಜಿಕ ಜವಾಬ್ದಾರಿ, ಅಪಾಯ ಅಥವಾ ಸಮಸ್ಯೆಗಳನ್ನು ಎದುರಿಸುವ ಛಾತಿ, ವೈಫಲ್ಯವನ್ನು ಮೆಟ್ಟಿ ನಿಲ್ಲುವ ಬಗೆ ಇವೆಲ್ಲ ನಾವು ಅವರಿಂದ ಕಲಿಯಬೇಕಾದಂತಹ ವಿಷಯವಾಗಿದೆ.
