ನನ್ನ ಕೈಗೆ ಸಿಕ್ಕಿಬಿದ್ದಿ ಛಲೋ ಆತು, ನಿಮ್ಮಪ್ಪನ ಕೈಗೆ ಸಿಕ್ಕಿದ್ದರೆ ಏನ್ ಗತಿ?: ಬಸವರಾಜ

ಬಾಲ್ಯದಿಂದಲೂ ನನಗೆ ಪಟಾಕಿ ಹಾರಿಸುವುದು ಎಂದರೆ ಬಲು ಪ್ರೀತಿ. ಪಟಾಕಿ ತರಲು ಅಪ್ಪ ಹಣ ಕೊಡುತ್ತಿರಲಿಲ್ಲ. ಹಾಗಾಗಿ ದೇವರಮನೆ ಜಗುಲಿ ಮೇಲೆ ಅಮ್ಮ ಕಟ್ಟಿದ ತೆಂಗಿನಕಾಯಿ ಬಟ್ಟೆಯೊಳಗೆ ಇಟ್ಟ ಚಿಲ್ಲರೆ ಹಣವನ್ನು ನಾನು ದಿನವೂ ತೆಗೆದುಕೊಳ್ಳುತ್ತಾ ಪಟಾಕಿ ಖರೀದಿಸಿ ದೂರದ ಪ್ರದೇಶದಲ್ಲಿ ಹಾರಿಸುತ್ತಿದ್ದೆ. ಒಂದು ದಿನ ಹಾಗೆಯೇ ತೆಂಗಿನಕಾಯಿಯ ಗಂಟಿನಲ್ಲಿರುವ ಹಣವನ್ನು ತೆಗೆದುಕೊಳ್ಳಲು ಹೋದಾಗ ಅಮ್ಮನ ಕೈಗೆ ಸಿಕ್ಕಿ ಬಿದ್ದೆ. ಅಮ್ಮ ಒಂದು ವೇಳೆ ನನ್ನನ್ನು ಅಪ್ಪನ ಕೈಗೆ ಒಪ್ಪಿಸಿದ್ದರೆ ಸಿಕ್ಕಾಪಟ್ಟೆ ಏಟು ತಿನ್ನುತ್ತಿದ್ದೆ. ಆದರೆ ತಾಯಿ ಪ್ರೀತಿಯೇ ಬೇರೆ. ಪಕ್ಕದ ಕೊಠಡಿಗೆ ನನ್ನನ್ನು ಎಳೆದುಕೊಂಡು ಹೋಗಿ ಕೆನ್ನೆಗೆ ಎರಡು ಏಟು ಬಾರಿಸಿದಳು.

| ಬಸವರಾಜ ಜಿ. ಪುರಾಣಿಕಮಠ ಬೈಲಹೊಂಗಲ