ವಿಶ್ವ ನೃತ್ಯ ದಿನವನ್ನು ಆಚರಿಸುವ ಸಂದರ್ಭದಲ್ಲಿ ಕರೊನಾದ ರುದ್ರ ತಾಂಡವ ನಡೆದಿದೆ. ಸೋಂಕು ಹರಡಿದರೆ ಎಂದು ಜೋರಾಗಿ ಉಸಿರಾಡಲು ಭಯ, ಏನಾಗುವುದೋ ಎಂಬ ಭೀತಿಯಿಂದ ತಲೆ ಭಾರ, ಕಟ್ಟಿ ಹಾಕಿದಂತಿರುವ ಕೈ-ಕಾಲು-ಮನ! ಮುಂದಿನ ಕ್ಷಣ ಹೇಗೋ ಏನೋ ಎಂಬ ಆತಂಕದಿಂದ ದಿನ ಎಣಿಸುತ್ತಾ, ಎಲ್ಲಿಂದ ಏನು ಸುದ್ದಿ ಬರುತ್ತದೋ ಎಂದು ಹೆದರುತ್ತಾ, ಇಡೀ ಬದುಕೇ ನಾಲ್ಕು ಗೋಡೆಗಳ ಮಧ್ಯೆ ಬಂಧಿಯಾಗಿರುವಾಗ ‘ನೃತ್ಯದ ಪ್ರಸ್ತಾಪವೇ’ ಎನ್ನಬೇಡಿ. ಇಂಥ ಸಂಕಷ್ಟದ ಪರಿಸ್ಥಿತಿಯಲ್ಲೂ ದೇಹ-ಮನಸ್ಸನ್ನು ನಿಯಂತ್ರಣದಲ್ಲಿಡಲು, ಬದುಕಿಗೆ ಹೊಸ ಚೈತನ್ಯ ನೀಡಲು ನೃತ್ಯ ಸಹಾಯಕ. ಏಕೆಂದರೆ ನೃತ್ಯ ಕೇವಲ ಕೈಕಾಲುಗಳ ತಾಳಬದ್ಧ ಚಲನೆಯಲ್ಲ. ಅದು ದೇಹ- ಮನಸ್ಸು- ಭಾವನೆ ಎಲ್ಲವೂ ಒಟ್ಟಾಗಿ ನಡೆಯುವ ಚಟುವಟಿಕೆ. ಆ ಮೂಲಕ ತನ್ನ ಸಂತೋಷ, ಭಯ, ನಿವೇದನೆ, ಪ್ರೀತಿ ಹೀಗೆ ಎಲ್ಲಾ ಭಾವನೆಗಳನ್ನು ಇತರರೊಂದಿಗೆ ಹಂಚಿಕೊಳ್ಳಲು ಬಳಸುವ ಶಕ್ತಿಯುತ ಸಂವಹನ ಮಾಧ್ಯಮ. ದೇಹ-ಬುದ್ಧಿ-ಭಾವನೆಗಳ ಸಾಮರಸ್ಯ ಬೇಡುವ ನೃತ್ಯ ಯಾವುದೇ ಶೈಲಿಯದ್ದಾದರೂ ಸಮಗ್ರ ಆರೋಗ್ಯದ ಮೇಲೆ ಪರಿಣಾಮ ಬೀರಬಲ್ಲದು ಎಂಬುದು ನಿರೂಪಿತ ಸತ್ಯ. ಕೋವಿಡ್19ರ ಸಂಕಷ್ಟದ ಸಮಯದಲ್ಲಿ ನೃತ್ಯವು ಮನೆಯಲ್ಲಿದ್ದೇ ದೇಹಕ್ಕೆ ಉತ್ತಮ ವ್ಯಾಯಾಮ, ಒತ್ತಡ ಹೊರಹಾಕುವ ದಾರಿ, ದೈಹಿಕ ಅಂತರವಿದ್ದೂ ಸಾಮಾಜಿಕವಾಗಿ ಬೆರೆಯುವ ಮಾರ್ಗ ಹೀಗೆ ಎಲ್ಲವೂ ಆಗಬಲ್ಲದು!
