ಇಂತಹ ಅನೇಕ ವಿಷಯಗಳು ನಮ್ಮ ಪುರಾಣದಲ್ಲಿ, ವ್ಯವಹಾರದಲ್ಲಿ ಸಿಗುತ್ತವೆ. ನಮ್ಮ ನಂಬಿಕೆಗಳೇನೆಂದರೆ, ವ್ಯವಹಾರದಲ್ಲಿ ಯಾವುದೋ ಕಾರಣಕ್ಕೆ ವಿರೋಧವಾಗಿರಬಹದು, ಉದಾಹರಣೆಗೆ ಯಾರಿಗೋ ಒಬ್ಬರಿಗೆ ಹಣ ಕೊಟ್ಟಿರುತ್ತೀರಿ, ಅದನ್ನು ಹಿಂದಿರುಗಿಸಲು ಹೇಳಿದಾಗ, ‘ನಾಳೆ ಕೊಡುತ್ತೇನೆ, ನಾಳಿದ್ದು ಕೊಡುತ್ತೇನೆ’ ಎಂದು ಮುಂದೂಡುತ್ತ ಹೋಗಬಹುದು. ಇಂತಹ ಸಂದರ್ಭದಲ್ಲಿ ತಕ್ಷಣ ಪ್ರತಿಕ್ರಿಯೆಯನ್ನು ಕಾಣುತ್ತೇವೆ. ಸಿಕ್ಕಾಪಟ್ಟೆ ಬೈದು ಬಿಡುತ್ತಾರೆ, ಹೊಡೆದಾಡಿಕೊಳ್ಳುತ್ತಾರೆ, ದೇವರ ಹೆಸರು ಹೇಳಿ ಶಾಪ ಕೊಟ್ಟು ಬಿಡುತ್ತಾರೆ. ಅಥವಾ ಈ ಹಣ ವಸೂಲಿ ಮಾಡೋದಕ್ಕೆ ಅಂತ ಇರುವ ಕೆಲವು ಏಜೆನ್ಸಿ ಅಥವಾ ವ್ಯಕ್ತಿಗಳಿಗೆ ಹೇಳಿ, ‘ಹೇಗಾದರೂ ಮಾಡಿ ವಸೂಲಿ ಮಾಡಿಕೊಂಡು ಬಾ, ನಿನಗೆ ಇಷ್ಟು ಕಮಿಶನ್ ಕೊಡುತ್ತೇನೆ’ ಎನ್ನುತ್ತಾರೆ, ಇದರಿಂದಾಗಿ, ಈ ವಸೂಲಿಗಾರ ಸಾಲ ಪಡೆದವರನ್ನು ಕೆಟ್ಟ ಮಾತುಗಳಿಂದ ಹೀಯಾಳಿಸಬಹುದು. ಮನಸ್ಸು ನೋಯಿಸಬಹುದು, ಹಲ್ಲೆ ಮಾಡಬಹುದು. ಆದರೆ, ಇಲ್ಲಿ ಅವರ ವ್ಯವಹಾರದ ಸತ್ಯತೆ ಅರಿಯುವುದು ಅವಶ್ಯ. ಅನೇಕ ಮಂದಿ ವ್ಯವಹಾರದಲ್ಲಿ ಸಮಸ್ಯೆಗಳನ್ನು ಉಂಟು ಮಾಡಿಕೊಂಡಿರುತ್ತಾರೆ. ಅವರು ಸಾಲಗಾರರ ಬಳಿ ಸಮಸ್ಯೆಯನ್ನು ವಿವರಿಸಿದಾಗ, ಸರಿಯಾದ ಉತ್ತರ ನೀಡಿದಾಗ ಸಮಸ್ಯೆ ಪರಿಹಾರವಾಗುತ್ತದೆ.
