ದೇಶದ ರಕ್ಷಣಾ ವ್ಯವಸ್ಥೆ, ಆಂತರಿಕ ಭದ್ರತೆ, ಸಾರ್ವಭೌಮತೆ ಇತ್ಯಾದಿ ಸೂಕ್ಷ್ಮ ವಿಷಯಗಳ ಮಾಹಿತಿಗೆ ಸಂಬಂಧಿಸಿದ ಕಾನೂನು ಮುಖ್ಯವಾಗಿ ‘ಅಧಿಕೃತ ರಹಸ್ಯಗಳ ಕಾಯ್ದೆ’, ‘ಭಾರತೀಯ ಸಾಕ್ಷಾ್ಯಧಾರಗಳ ಕಾಯ್ದೆ’ ಹಾಗೂ ಇತ್ತೀಚಿನ ದಿನಗಳಲ್ಲಿ ‘ಮಾಹಿತಿ ಹಕ್ಕು ಕಾಯ್ದೆ’- ಇವುಗಳಲ್ಲಿ ಅಡಕವಾಗಿವೆ. ಪ್ರಜಾತಂತ್ರದಲ್ಲಿ ಸರ್ಕಾರದ ಎಲ್ಲ ನಡವಳಿಕೆ ಹಾಗೂ ವ್ಯವಹಾರಗಳ ಬಗ್ಗೆ ಪ್ರಜೆಗಳಿಗೆ ಮಾಹಿತಿ ದೊರಕಬೇಕು, ಸರ್ಕಾರದ ಕಾರ್ಯವೈಖರಿಯಲ್ಲಿ ಪಾರದರ್ಶಕತೆ ಇರಬೇಕು ಎಂದು ನ್ಯಾಯಾಲಯ ಮುಂಚಿನಿಂದಲೂ ನಿಲುವು ತೆಗೆದುಕೊಂಡಿದೆ. 2005ರಲ್ಲಿ ಮಾಹಿತಿ ಹಕ್ಕು ಕಾಯ್ದೆ ಜಾರಿಯಾದ ಮೇಲೆ ಪ್ರಜೆಗಳ ಈ ಹಕ್ಕಿಗೆ ಮತ್ತಷ್ಟು ಪುಷ್ಟಿ ಸಿಕ್ಕಿದೆ. ಆದರೆ ಎಂದೆಂದಿಗೂ ನ್ಯಾಯಾಲಯ ಸತತವಾಗಿ ಎತ್ತಿಹಿಡಿದಿರುವ ಒಂದು ನೀತಿಯೇನೆಂದರೆ ದೇಶದ ಸುರಕ್ಷತೆ, ಭದ್ರತೆ ಆದಿಯಾಗಿ ಸೂಕ್ಷ್ಮ ವಿಚಾರಗಳಿಗೆ ಸಂಬಂಧಿಸಿದ ಮಾಹಿತಿಗಳು ವಿಶೇಷ ಸವಲತ್ತುಗಳಿಗೊಳಪಟ್ಟಿವೆ, ಆದ್ದರಿಂದ ಅಂಥ ಸೂಕ್ಷ್ಮ ಮಾಹಿತಿಯನ್ನು ಬಹಿರಂಗಪಡಿಸುವ ಬಾಧ್ಯತೆ ಸರ್ಕಾರಕಿಲ್ಲ ಎಂದು.
