ಸೆಲೆಬ್ರಿಟಿಗಳಲ್ಲಿ ಆಕರ್ಷಣೆಗಳೂ ಬೇಗ, ಭ್ರಮನಿರಸನಗಳೂ ಅಷ್ಟೇ ವೇಗ. ಅದಕ್ಕೆ ಅವರ ವೃತ್ತಿಜೀವನ, ಜೀವನಶೈಲಿ, ಮನೋಧರ್ಮ, ಹಣ ಎಲ್ಲವೂ ಕಾರಣ. ಸೆಲೆಬ್ರಿಟಿಗಳಲ್ಲಿ ಆತನಿರಲಿ, ಆಕೆಯಿರಲಿ ಅವಲಂಬನೆ ಕಡಿಮೆ, ಸ್ವತಂತ್ರ ಭಾವನೆ ಜಾಸ್ತಿ. ನನ್ನ ಬದುಕು, ನನ್ನ ಶ್ರಮ, ನನ್ನ ಸಾಧನೆ, ಯಾರಿಗೇನು ಕಡಿಮೆ ಎಂಬ ಭಾವನೆ ಅವರಲ್ಲಿ ಸದಾ ಜಾಗೃತವಾಗಿರುತ್ತದೆ. ಜತೆಗೆ ಬದುಕಿನ ಆಕರ್ಷಣೆಗಳು, ನಿರಂತರ ಓಡಾಟದಲ್ಲಿ ಬೆಸೆದುಕೊಳ್ಳುವ ಹೊಸ ಒಡನಾಟಗಳು, ಸನ್ನಿವೇಶಗಳು ಸಂಬಂಧಗಳನ್ನು ಶಿಥಿಲಗೊಳಿಸುತ್ತ ಸಾಗುತ್ತವೆ. ಅದರಲ್ಲೂ ಕ್ರೀಡಾಪಟುಗಳು ವರ್ಷದ ಮುಕ್ಕಾಲು ಭಾಗ ಪ್ರವಾಸಗಳಲ್ಲಿರುತ್ತಾರೆ. ವಿವಾಹವಾದ ಕೆಲವು ವರ್ಷ ಜೋಡಿಹಕ್ಕಿಗಳಂತೆ ದೇಶ- ಜಗತ್ತು ಸುತ್ತಾಡುತ್ತ ಆನಂದಿಸಿದರೂ, ಮಕ್ಕಳಾದಂತೆ, ಕುಟುಂಬ ವಿಸ್ತಾರವಾದಂತೆ ಅಂತರವೂ ಬೆಳೆಯುತ್ತದೆ. ಇದರ ನಡುವೆ ಹೊಸ ಸಂಬಂಧಗಳು ಬೆಳೆಯುತ್ತವೆ. ಇನ್ನು ಅನೇಕ ಸೆಲೆಬ್ರಿಟಿಗಳಲ್ಲಿ ವಿವಾಹವೆನ್ನುವುದು ದುಡುಕಿನ ನಿರ್ಧಾರವೂ ಆಗಿರುತ್ತದೆ.
