ಹಾಗಂತ ಭಾರತ ಕೈಕಟ್ಟಿ ಕುಳಿತಿಲ್ಲ. ಅಮೆರಿಕವು ಅಫ್ಘಾನಿಸ್ತಾನವನ್ನು ಬಿಟ್ಟುಹೋಗುವ ಮಾತನಾಡಿದೊಡನೆ ಭಾರತ ತಾಲಿಬಾನಿಗಳೊಂದಿಗೆ ಮಾತುಕತೆಗೆ ವೇದಿಕೆ ರೂಪಿಸಿಕೊಂಡಿತ್ತು. ತಾಲಿಬಾನಿಗಳೊಂದಿಗೆ ಕತಾರ್, ಇರಾಕ್, ಇರಾನ್, ಪಾಕಿಸ್ತಾನ, ಚೀನಾ, ರಷ್ಯಾಗಳು ಸುಮಧುರ ಬಾಂಧವ್ಯ ಹೊಂದಿವೆ. ಇವುಗಳಲ್ಲಿ ಚೀನಾ ಒಂದನ್ನು ಹೊರತುಪಡಿಸಿದರೆ ಉಳಿದೆಲ್ಲ ರಾಷ್ಟ್ರಗಳು ನಮ್ಮೊಂದಿಗೆ ಸೌಹಾರ್ದ ಸಂಬಂಧವನ್ನೇ ಹೊಂದಿವೆ. ಹೀಗಾಗಿಯೇ ಅಮೆರಿಕದಿಂದ ಮರಳಿ ಬರುತ್ತಿದ್ದ ವಿದೇಶಾಂಗ ಸಚಿವ ಜೈಶಂಕರ್ ಕತಾರ್ನ ಹಣಕಾಸು ಸಚಿವರನ್ನು ಭೇಟಿಮಾಡಿ ರ್ಚಚಿಸಿದ್ದಾರೆ. ಚರ್ಚೆಯ ವಿವರಗಳು ಪೂರ್ಣವಾಗಿ ಲಭ್ಯವಿಲ್ಲವಾದರೂ ಅಫ್ಘಾನಿಸ್ತಾನ ಚರ್ಚೆಯ ವಿಷಯವಾಗಿತ್ತು ಎನ್ನುವುದನ್ನಂತೂ ಇಬ್ಬರೂ ಹೇಳಿಕೊಂಡಿದ್ದಾರೆ. ತಾಲಿಬಾನಿಗಳು ಅಧಿಕಾರಕ್ಕೆ ಬಂದರೆ ಅದನ್ನು ನಿಯಂತ್ರಿಸುವಲ್ಲಿ ನಾವು ಅನುಸರಿಸಬೇಕಾದ ಬಳಸುಮಾರ್ಗವನ್ನು ಆಗಲೇ ಭಾರತ ಹುಡುಕಾಡಲು ಶುರುಮಾಡಿದೆ. ಇರಾನ್ನೊಂದಿಗಿನ ನಮ್ಮ ಬಾಂಧವ್ಯ ಕೆಟ್ಟದಾಗೇನೂ ಇಲ್ಲ. ಅಮೆರಿಕ ಆರ್ಥಿಕ ದಿಗ್ಬಂಧನ ಹೇರಿದಾಗಲೂ ನಾವು ಅವರೊಂದಿಗೆ ಸುಮಧುರವಾದ ವ್ಯವಹಾರವನ್ನೇ ನಡೆಸಿದ್ದೇವೆ. ಈಗ ಅದು ಖಂಡಿತವಾಗಿಯೂ ಬಳಕೆಗೆ ಬರಲಿದೆ. ಹಾಗೆ ನೋಡಿದರೆ, ರಷ್ಯಾ ನಮ್ಮೊಂದಿಗೆ ಘನಿಷ್ಠವಾದ ಸಂಪರ್ಕದಲ್ಲಿದೆ. ತಾಲಿಬಾನ್ ಮೇಲೆ ರಷ್ಯಾ ಹೊಂದಿರುವ ಹಿಡಿತದ ಆಧಾರದ ಮೇಲೆ ನಮಗೆ ಬರಬಹುದಾಗಿರುವ ಸಮಸ್ಯೆಯನ್ನು ಎದುರಿಸಲು ಸಾಕಷ್ಟು ಸುಲಭವಾಗಬಹುದು ಎನಿಸುತ್ತದೆ. ಸಂತಸದ ಸಂಗತಿ ಎಂದರೆ ಭಾರತ ರಷ್ಯಾದ ಮೇಲೆಯಷ್ಟೇ ನಿರ್ಭರವಾಗದೆ ಇತರ ರಾಷ್ಟ್ರಗಳ ಮೂಲಕವೂ ಅಫ್ಘಾನಿಸ್ತಾನದೊಂದಿಗಿನ ಬಾಂಧವ್ಯವನ್ನು ಚೆನ್ನಾಗಿ ಉಳಿಸಿಕೊಳ್ಳುವ ಪ್ರಯತ್ನ ಮಾಡುತ್ತಿದೆ.
