‘‘2013ರಲ್ಲಿ ಈ ಇಕೋ ವಿಲೇಜ್ ಕೆಲಸ ಆರಂಭವಾಯಿತು. 850 ಮಿ.ಮೀ. ಸರಾಸರಿ ಮಳೆಯ ಈ ಭಾಗದಲ್ಲಿ ನೀರ ಸುಸ್ಥಿರತೆಗೆ ಮೊದಲ ಆದ್ಯತೆ ನೀಡುವ ತೀರ್ಮಾನ ಕೈಗೊಳ್ಳಲಾಯಿತು. ಅದಕ್ಕಾಗಿ ಇಡೀ ಜಮೀನಿನ ನೀರ ಹಾದಿಗಳಲ್ಲಿ ಅಡ್ಡಾಡಿ ನೀರ ಹರಿವಿನ ನಕಾಶೆ ಮಾಡಿದೆವು’’ ಎಂದು ನೆನೆಯುತ್ತಾರೆ ಯೋಜನಾ ವಿಭಾಗದ ಮುಖ್ಯಸ್ಥ ಹರ್ಷವರ್ಧನ ಶೀಲವಂತ್. ಕೆರೆ ಹಾಗೂ ಹೊಂಡಗಳ ನಿರ್ವಣಕ್ಕೆ 18 ಲಕ್ಷ ರೂ. ವೆಚ್ಚವಾಗಿದೆ. ಮೂರು ತಿಂಗಳ ಕೆಲಸ. ಇದರ ಪರಿಣಾಮ ಇಲ್ಲಿನ ಮೂರು ಕೊಳವೆ ಬಾವಿಗಳು ಹಾಗೂ ಸುತ್ತಮುತ್ತಲ ರೈತರ ಹಲವು ಕೊಳವೆಬಾವಿಗಳೂ ಮರುಪೂರಣಗೊಂಡಿವೆ. ಅಂತರ್ಜಲ ಮಟ್ಟ ಹೆಚ್ಚಿದೆ. ಇಕೋ ಗ್ರಾಮದಲ್ಲಿ 16 ವಿವಿಧ ರೀತಿಯ ಸುಸ್ಥಿರ ಅಭಿವೃದ್ಧಿ ಮಾದರಿಗಳ ಪ್ರಾತ್ಯಕ್ಷಿಕೆ ಇದೆ. ಮಳೆ ನೀರು ಸಂಗ್ರಹ, ಛಾವಣಿ ನೀರು ಹಿಡಿಯುವುದು, ತೆರೆದ ಬಾವಿ ಮತ್ತು ಕೊಳವೆ ಬಾವಿಗಳ ಪುನಶ್ಚೇತನ, ತಾರಸಿ ತೋಟ, ತರಕಾರಿ ಹಿತ್ತಿಲು, ವಿವಿಧ ರೀತಿಯ ಸಾವಯವ ಗೊಬ್ಬರಗಳು, ಅಡುಗೆ ಮನೆ ತ್ಯಾಜ್ಯದಿಂದ ಗ್ಯಾಸ್ ಉತ್ಪಾದನೆ ಮತ್ತು ಬಳಕೆ, ಅಡುಗೆ ಮನೆ ಕೊಳಾಯಿಯ ನೀರನ್ನು ತರಕಾರಿ ತೋಟಕ್ಕೆ ಸಂರ್ಪಸುವುದು, ಮನೆ ಬಳಕೆಗೆ ಬೇಕಾದ ಔಷಧೀಯ ಸಸ್ಯಗಳ ಕಿರು ಉದ್ಯಾನ ಇತ್ಯಾದಿಗಳು ಅದರಲ್ಲಿ ಸೇರಿವೆ. ಉದ್ದೇಶ ಏನೆಂದರೆ ಒಂದು ಕುಟುಂಬಕ್ಕೆ ಕಡಿಮೆ ವೆಚ್ಚದಲ್ಲಿ ಜೀವಿಸಲು ಅಗತ್ಯವಾದ ಮಾದರಿಗಳನ್ನು ಪರಿಚಯಿಸುವುದು. ಇಕೋ ಗ್ರಾಮಕ್ಕೆ ಸರ್ಕಾರಿ ಶಾಲಾ ಮಕ್ಕಳಿಗೆ ಉಚಿತ ಪ್ರವೇಶವಿದೆ. ಕಳೆದ ಮೂರು ವರ್ಷಗಳಲ್ಲಿ ಸುಮಾರು 3500 ಸರ್ಕಾರಿ ಶಾಲೆಯ ಮಕ್ಕಳು ಭೇಟಿ ನೀಡಿದ್ದಾರೆ. ಇತರರಿಗೆ ಪ್ರವೇಶ ಶುಲ್ಕ ಉಂಟು.
