ನಗರೀಕರಣದ ಪ್ರಭಾವ: ಮೈಸೂರು ನಗರಕ್ಕೆ ಹತ್ತಿರವಿರುವ ಹಳ್ಳಿಗಳಲ್ಲಿ ನಗರೀಕರಣದ ಪರಿಣಾಮದ ಬಗ್ಗೆ ಜನರ ಜತೆ ಸಮಾಲೋಚನೆ ನಡೆಸಲಾಯಿತು. ಕೃಷಿ ಭೂಮಿಗಳನ್ನು ರಿಯಲ್ ಎಸ್ಟೇಟ್ಗೋಸ್ಕರ ಮಾರಾಟ ಮಾಡಿ, ತಕ್ಷಣಕ್ಕೆ ಒಂದಿಷ್ಟು ದೊಡ್ಡ ಮೊತ್ತದ ಹಣ ಪಡೆದ ಜನರ ಜೀವನ ಶೈಲಿ ಬದಲಾಗಿದೆ. ವಿಲಾಸಿ ಜೀವನಕ್ಕೆ ಹೊಂದಿಕೊಂಡ ಹಲವು ಕುಟುಂಬಗಳಲ್ಲಿ ಕೃಷಿ ಭೂಮಿ ಮಾರಾಟದಿಂದ ಬಂದ ಹಣ ಕರಗುತ್ತಿದ್ದಂತೆ ಮುಂದೆ ಜೀವನಕ್ಕೆ ಏನು ಆಧಾರ ಎಂಬ ಚಿಂತೆ ಕಾಡುತ್ತಿದೆ. ರಿಯಲ್ ಎಸ್ಟೇಟ್ ಎಂಬ ಮಾಫಿಯಾ ನಗರಕ್ಕೆ ಹತ್ತಿರವಿರುವ ಹಳ್ಳಿಗಳ ಜನರ ಬದುಕನ್ನು ಕಿತ್ತುಕೊಂಡಿದೆ, ಮಾತ್ರವಲ್ಲ, ಹೊಸ ರೀತಿಯ ಸಮಸ್ಯೆಗಳು ಉದ್ಭವಿಸುವುದಕ್ಕೂ ಕಾರಣವಾಗಿದೆ ಎಂಬುದು ಈ ನಡಿಗೆಯ ವೇಳೆ ಕಂಡ ಸತ್ಯ.
