ಇದನ್ನು ಎದುರಿಸುವ ಬಗೆ ಹೇಗೆ? ಸನಾತನ ಧರ್ಮದ ಮುಖ್ಯ ಘಟಕವಾದ ಕುಟುಂಬದ ಜೀವನದ ಸ್ವಾಸ್ಥ್ಯ, ಸಂಸ್ಕೃತಿಯನ್ನು ಸಂರಕ್ಷಿಸುವುದು ಹೇಗೆ? ಎಂಬ ಪ್ರಶ್ನೆಗಳಿಗೆ ಸಾಮಾಜಿಕ ಕಳಕಳಿಯುಳ್ಳ ರಾಷ್ಟ್ರಪ್ರೇಮಿಗಳು ಉತ್ತರ ಕಂಡುಕೊಳ್ಳಲೇಬೇಕಾದ ತುರ್ತು ಪರಿಸ್ಥಿತಿ ಬಂದೊದಗಿದೆ. ಅದಕ್ಕಾಗಿ ಗೃಹಸ್ಥಧರ್ಮದ ಮೌಲ್ಯಗಳು ಮತ್ತು ಸನಾತನ ಋಷಿ ಆದರ್ಶವನ್ನು ಪುನರುಜ್ಜೀವನಗೊಳಿಸಬೇಕಾದ ಅಗತ್ಯ ಇಂದು ಹಿಂದೆಂದಿಗಿಂತಲೂ ಹೆಚ್ಚಾಗಿರುವುದನ್ನು ಮನಗಾಣದಿದ್ದರೆ ಅಪಾಯ ಕಟ್ಟಿಟ್ಟ ಬುತ್ತಿ. ಆದ್ದರಿಂದ ಈ ಸಂದರ್ಭಕ್ಕೆ ಅತ್ಯಗತ್ಯವಾದ ಸ್ಪೂರ್ತಿಯನ್ನೂ, ಶಕ್ತಿಯನ್ನೂ, ಮಾರ್ಗದರ್ಶನವನ್ನೂ ಸನಾತನ ಸಂಸ್ಕೃತಿಯ ಜ್ಞಾನದ ಗಣಿಗಳಾದ ಭಗವದ್ಗೀತೆ, ಉಪನಿಷತ್ತುಗಳು, ರಾಮಾಯಣ, ಮಹಾಭಾರತ, ಮಹಾ ಸಂತರ ಜೀವನ ಚರಿತ್ರೆಗಳು, ಶ್ರೀರಾಮಕೃಷ್ಣ- ಶ್ರೀಮಾತೆ ಶಾರದಾದೇವಿ, ಸ್ವಾಮಿ ವಿವೇಕಾನಂದರ ಜೀವನ, ವ್ಯಕ್ತಿತ್ವ, ಸಂದೇಶಗಳಿಂದ ಪಡೆಯಲು ಹಿಂಜರಿದರೆ ಘೊರ ದುರಂತವೇ ಸಮಾಜವನ್ನು ನುಂಗಲು ಕಾಯುತ್ತಿದೆ ಎಂಬ ಅರಿವು ವ್ಯಾಪಕವಾಗಬೇಕಾಗಿದೆ. ಮಕ್ಕಳ ಭವಿಷ್ಯ ಉಜ್ವಲವಾಗಬೇಕು; ಯುವಜನಾಂಗ ಕತ್ತಲೆಯಲ್ಲಿ ನರಳಿ ಕೆಸರಿನಲ್ಲಿ ಬೀಳಬಾರದು; ಗೃಹಸ್ಥ ಜೀವನ ಮರಳಿ ತನ್ನ ಗಟ್ಟಿತನವನ್ನು ಪಡೆಯಬೇಕು.
