ನಿರ್ವಹಣೆ: ಬಳ್ಳಿಗಳಿಗೆ ಕೊಟ್ಟಿಗೆ ಗೊಬ್ಬರ, ಕುರಿಗೊಬ್ಬರ ಹಾಗೂ ಒಣ ಎಲೆಗಳು ಪ್ರಮುಖ ಪೋಷಕಾಂಶ. ಬೆಳೆಗಳಿಗೆ ಯಾವುದೇ ರೋಗಬಾಧೆ ಕಾಡದಿದ್ದರೂ ಮುಂಜಾಗ್ರತಾ ಕ್ರಮವಾಗಿ ವಾರ್ಷಿಕವಾಗಿ ಒಮ್ಮೆ ಮಾತ್ರ ಮೈಲತುತ್ತು ಸುಣ್ಣ ಬೆರಸಿ ಔಷಧ ಸಿಂಪಡಣೆ ಮಾಡಿದರೆ ಬೇರೆ ಯಾವ ಖರ್ಚಿಲ್ಲ. ಬಳ್ಳಿಯ ಹೂವುಗಳಿಗೆ ಸ್ವಯಂ ಪರಾಗಸ್ಪರ್ಶ ಸಾಧ್ಯವಿಲ್ಲದ ಕಾರಣ ಕೈಯಿಂದಲೇ ಪರಾಗಸ್ಪರ್ಶ ಮಾಡಿಸುವುದೊಂದೇ ಈ ಬೆಳೆಯಲ್ಲಿ ಕಷ್ಟದ ಕೆಲಸ ಎನ್ನುತ್ತಾರೆ ಮಂಜುನಾಥ್. ಪ್ರತಿ ಬಳ್ಳಿಯಲ್ಲಿ 10 ಗ್ರಾಂನಿಂದ 3 ಕೆ.ಜಿ.ವರೆಗೆ ಇಳುವರಿ ಪಡೆಯಬಹುದಾಗಿದೆ. ಅಡಕೆ ಮರಗಳಿಗೆ ವೇಗವಾಗಿ ಹಬ್ಬುವುದರಿಂದ ಮೆಣಸಿನ ಬಳ್ಳಿಗಳಿಗೆ ಪರ್ಯಾಯವಾಗಿ ವೆನಿಲ್ಲಾ ಬೆಳೆಯಬಹುದು ಎಂಬುದು ಇವರ ಕಿವಿಮಾತು. ಮಾರ್ಚ್ನಿಂದ ಮೇ ಅಂತ್ಯದವರೆಗೆ ಹೂವು ಬಿಡುವ ಬಳ್ಳಿಗಳಿಂದ ಜನವರಿಯಲ್ಲಿ ಕಾಯಿಗಳನ್ನು ಕಟಾವು ಮಾಡಬಹುದಾಗಿದೆ. ಮಾರ್ಚ್ನಿಂದ ಮುಂಗಾರು ಮಳೆ ಬರುವವರೆಗೆ ಹನಿ ನೀರಾವರಿ ವ್ಯವಸ್ಥೆ ಕಲ್ಪಿಸುವುದು ಉತ್ತಮ ಎಂಬ ಅಭಿಪ್ರಾಯ ಬೆಳೆಗಾರರದ್ದು. ತಮಿಳುನಾಡು, ಆಂಧ್ರಪ್ರದೇಶದಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ವೆನಿಲ್ಲಾ ಬೆಳೆಯನ್ನು 8/8 ವಿಸ್ತೀರ್ಣದಲ್ಲಿ ದ್ರಾಕ್ಷಿ ಬೆಳೆಯ ಮಾದರಿಯಲ್ಲಿ ಬೆಳೆಯುತ್ತಾರೆ. ಆದರೆ, ಇಲ್ಲಿ 6/6 ಅಳತೆಯಲ್ಲಿ ನೆರಳಿನ ಮರಗಳಿಗೆ ಬಳ್ಳಿಗಳನ್ನು ಹಬ್ಬಿಸುವ ಮೂಲಕ ಬೆಳೆಯಲಾಗುತ್ತಿದೆ. ಸದ್ಯ ವೆನಿಲ್ಲಾ ಬೀನ್ಸ್ ಪ್ರತಿ ಕೆ.ಜಿ.ಗೆ 1800 ರೂ.ಗಳಿಂದ 2000 ರೂ.ವರೆಗೆ ದರ ಇದೆ. ಈ ಬಾರಿ 250 ಬಳ್ಳಿಗಳಿಂದ 110 ಕೆ.ಜಿ. ವೆನಿಲ್ಲಾ ಬೆಳೆದಿದ್ದು, 1800 ರೂ.ಗಳಂತೆ ಮನೆಗೆ ಬಂದು ಚೆನ್ನೈ ಮೂಲದ ಕಂಪನಿ ಖರೀದಿಸಿದೆ ಎನ್ನುತ್ತಾರೆ ಮಂಜುನಾಥ್.
