ಬಣ್ಣ ಬಣ್ಣದ ಕೌಶಲ; ಯುವಯುಗ ವಿಫಲ

ಉದ್ಯಮಕ್ಕೆ ಅಗತ್ಯವಿರುವ ಕೌಶಲಯುಕ್ತ ಅಭ್ಯರ್ಥಿಗಳು ಸಿಗುತ್ತಿಲ್ಲ ಎಂಬ ಬಲವಾದ ವಾದದ ನಡುವೆ ಸರ್ಕಾರ ಕಾಲಕಾಲಕ್ಕೆ ವಿವಿಧ ಉಪಕ್ರಮ ಕೈಗೊಳ್ಳುತ್ತಿದೆ. ಅದು ಎಷ್ಟರ ಮಟ್ಟಿಗೆ ಸಫಲವಾಗುತ್ತವೆ ಎಂಬ ಸ್ಪಷ್ಟ ಉತ್ತರ ಹುಡುಕುವ ಗೋಜಿಗೆ ಯಾರೂ ಹೋಗುತ್ತಿಲ್ಲ. ಆದರೆ, ಅಂಕಿ-ಸಂಖ್ಯೆಗಳು ಮಾತ್ರ ಈ ಪ್ರಯತ್ನ ಫಲಪ್ರದವಾಗಿಲ್ಲ ಎಂದೇ ಹೇಳುತ್ತಿವೆ. ಈ ಕುರಿತ ವಿಸ್ತೃತ ವರದಿ ಇಲ್ಲಿದೆ.

| ಶ್ರೀಕಾಂತ್ ಶೇಷಾದ್ರಿ ಬೆಂಗಳೂರು

ಬೃಹತ್ ಜನಸಂಖ್ಯೆ ಇರುವ, ಅದರಲ್ಲೂ ಯುವ ಜನತೆಯನ್ನು ಹೊಂದಿರುವ ಭಾರತದಲ್ಲಿ ನಿರುದ್ಯೋಗದ್ದೇ ಸಮಸ್ಯೆ. ಉದ್ಯೋಗ, ಕೌಶಲದ ಬಗ್ಗೆ ರಾಜಕೀಯ ಪಕ್ಷಗಳು ದೊಡ್ಡ ದೊಡ್ಡ ಭರವಸೆ ನೀಡುತ್ತವೆ, ಬಣ್ಣ ಬಣ್ಣದ ಕಸನು ಬಿತ್ತುತ್ತವೆ. ಆದರೆ, ಅಧಿಕಾರದ ಅವಕಾಶ ಸಿಕ್ಕಾಗ ಅದನ್ನು ಈಡೇರಿಸುವಲ್ಲಿ ಎಡವುತ್ತವೆ. ಇದಕ್ಕೊಂದು ತಾಜಾ ಇಲ್ಲಿದೆ. ಕೌಶಲದ ಅಂತರ ಪರಿಹರಿಸಲು ಮತ್ತು ಐಟಿ, ಐಟಿಇಎಸ್ ವಲಯದಲ್ಲಿ ಖಚಿತವಾದ ಉದ್ಯೋಗ ನಿಯೋಜನೆಗಳಿಗಾಗಿ ಕರ್ನಾಟಕ ಇನ್ನೋವೇಷನ್ ಆಂಡ್ ಟೆಕ್ನಾಲಜಿ (ಕಿಟ್ಸ್) ಮೂಲಕ 43,000 ಮತ್ತು ಕಿಯೋನಿಕ್ಸ್ ಮುಖೇನ 67 ಸಾವಿರ ಸೇರಿ 1.10 ಲಕ್ಷ ಮಂದಿಗೆ ಕೌಶಲ ತರಬೇತಿ ನೀಡಲು ‘ಯುವಯುಗ’ ಕಾರ್ಯಕ್ರಮವನ್ನು ಸರ್ಕಾರ 2017ರಲ್ಲಿ ಘೋಷಿಸಿತ್ತು. ಆದರೆ, ಇದು ಸಂಪೂರ್ಣ ಮಕಾಡೆ ಮಲಗಿದ್ದು, ಈಗ ಬೆಳಕಿಗೆ ಬಂದಿದೆ. ಅಂದಹಾಗೆ ಹಣ ಮಾತ್ರ ಖರ್ಚಾಗಿದೆ. 2017ರ ಜೂನ್​ನಲ್ಲಿ ಮಾರ್ಗಸೂಚಿಯು ತರಬೇತಿ ಕೇಂದ್ರಗಳ ಮಾನ್ಯತೆ ಕಲ್ಪಿಸಿತ್ತು. 18 ತರಬೇತಿ, ಉದ್ಯಮ ಪಾಲುದಾರರನ್ನು ಕಿಟ್ಸ್ ನೇಮಿಸಿದ್ದರೆ, ತರಬೇತಿ ನೀಡಲು ಅಸ್ತಿತ್ವದಲ್ಲಿರುವ ಫ್ರಾಂಚೈಸಿಗಳನ್ನು ಕಿಯೋನಿಕ್ಸ್ ತೊಡಗಿಸಿತು. ಕಿಟ್ಸ್ ಮತ್ತು ತರಬೇತು ಪಾಲುದಾರರ ನಡುವಿನ ಎಮ್​ಎ ಕೋರ್ಸ್ ಶುಲ್ಕದ ಮೇಲೆ ಹಂತಹಂತದ ಪಾವತಿ ಮಾಡಿದ್ದು, ನೋಂದಣಿಯಲ್ಲಿ 10 ಪ್ರತಿಶತ, ತರಬೇತಿ ಪೂರ್ಣಗೊಳಿಸಿದ ನಂತರ 70 ಪ್ರತಿಶತ, ಉದ್ಯೋಗಾವಕಾಶ ಒದಗಿಸಿದ ಮೇಲೆ 20 ಪ್ರತಿಶತ ನೀಡುವುದೆಂದು ನಿರ್ಧಾರವಾಗಿತ್ತು. ಇಲಾಖೆಯು ಈ ಕಾರ್ಯಕ್ಕೆ 11.81 ಕೋಟಿ ರೂ. ಮುಡುಪಾಗಿರಿಸಿದ್ದು (2017-18), 1.42 ಕೋಟಿ ರೂ. ವೆಚ್ಚವಾಗಿದೆ. 10.39 ಕೋಟಿ ಬಾಕಿ ಮೊತ್ತವನ್ನು ಮಾರ್ಚ್ 2021ರಲ್ಲಿ ಕಿಟ್ಸ್ ಉಳಿತಾಯ ಖಾತೆಯಲ್ಲಿ ಉಳಿದಿದೆ. ಸದ್ಯ 23,225 ಜನರಿಗೆ (2017-18)ತರಬೇತಿ ಪೂರ್ಣಗೊಳಿಸಿದೆ ಎಂದು ವರದಿ ಬಿಟ್ಟರೆ, ಹೆಚ್ಚಿನ ಮಾಹಿತಿ ಇಲ್ಲ.

ಇನ್ನೊಂದು ಗಂಭೀರ ವಿಚಾರ ಎಂದರೆ ಯಾವುದೇ ತರಬೇತಿ ಕೇಂದ್ರಗಳು ಅಥವಾ ಫ್ರಾಂಚೈಸಿಗಳು ನ್ಯಾಷನಲ್ ಸ್ಕಿಲ್ ಡೆವಲಪ್​ವೆುಂಟ್ ಕಾರ್ಪೆರೇಷನ್, ಸೆಕ್ಟರ್ ಸ್ಕಿಲ್ ಕೌನ್ಸಿಲ್​ನಿಂದ ಮಾನ್ಯತೆ ಪಡೆದಿರಲಿಲ್ಲ. ಇದರಲ್ಲಿ ಹಲವಾರು ತರಬೇತಿ ಕಾರ್ಯಕ್ರಮಗಳು ಕಾಲೇಜು ವಿದ್ಯಾರ್ಥಿಗಳಿಗೆ ಪೂರಕ ಕೋರ್ಸ್​ಗಳಾಗಿವೆ ಮತ್ತು ನಿರ್ದಿಷ್ಟವಾಗಿ ಉದ್ಯೋಗದ ಕಡೆಗೆ ನಿರ್ದೇಶಿಸಲಾಗಿಲ್ಲ ಎಂಬ ಸಂಗತಿಯನ್ನು ಕೌಶಲಾಭಿವೃದ್ಧಿ ಪ್ರಾಧಿಕಾರ ವಿವರಿಸಿರುವುದು ಮತ್ತೊಂದು ಸೋಜಿಗದ ಸಂಗತಿ. ಕಿಟ್ಸ್​ನ ತರಬೇತು ಪಾಲುದಾರರಿಗೆ ಕೋರ್ಸ್ ಶುಲ್ಕದ ಶೇ.80 ಪಾವತಿಸಲಾಗಿದೆ. ಅಂದರೆ 39.55 ಲಕ್ಷ ಮತ್ತು ಅವರಿಗೆ ಉದ್ಯೋಗಾವಕಾಶ ದೊರೆತ ನಂತರ ಪಾವತಿಸಬೇಕಾದ ಬಾಕಿ ಶೇ.20 ತ್ಯಜಿಸಲು ನಿರ್ಧರಿಸಿ ಕಾಲ್ಕಿತ್ತರು. ಹೀಗಾಗಿ ತರಬೇತಿ ಪಡೆದವರು ಯೋಜನೆಯ ಪ್ರಧಾನ ಉದ್ದೇಶವಾಗಿದ್ದ ಉದ್ಯೋಗಾವಕಾಶದಿಂದ ವಂಚಿತರಾಗಿದ್ದಾರೆ. ಇಲಾಖೆ ಮಾತ್ರ, ಹೆಚ್ಚಿನ ವಿದ್ಯಾರ್ಥಿ ಗಳು ಉನ್ನತ ಶಿಕ್ಷಣ, ಸ್ವಯಂ ಉದ್ಯೋಗ ಇತ್ಯಾದಿಗಳಿಗೆ ಹೋದ ಕಾರಣ ಯಾವುದೇ ನೇಮಕಾತಿ ವರದಿ ಮಾಡಿಲ್ಲ ಎಂದು ಹೇಳಿದೆ. ಎಷ್ಟು ವಿದ್ಯಾರ್ಥಿಗಳು ಈ ರೀತಿ ಉನ್ನತ ಶಿಕ್ಷಣಕ್ಕೆ ಹೋಗಿದ್ದಾರೆಂಬ ದತ್ತಾಂಶ ಇಲಾಖೆ ಬಳಿ ಇಲ್ಲ.

1. ಕೃತಕ ಬುದ್ಧಿಮತ್ತೆ (ಆರ್ಟಿಫಿಷಿಯಲ್ ಇಂಟಲಿಜೆನ್ಸ್) ಮತ್ತು ದತ್ತಾಂಶ ವಿಜ್ಞಾನ (ಡೇಟಾ ಸೈನ್ಸ್) ಕುರಿತು ಶ್ರೇಷ್ಠತಾ ಕೇಂದ್ರ 2018ರಲ್ಲಿ ಪ್ರಾರಂಭವಾಯಿತು. ಇದಕ್ಕೆ 14.80 ಕೋಟಿ ರೂ. ನಿಗದಿ ಮಾಡಿದ್ದು, 5.40 ಕೋಟಿ ರೂ. ಖರ್ಚಾಗಿದೆ. ವಾರ್ಷಿಕ ಗುರಿಯ ಪ್ರಕಾರ ಮೊದಲ ವರ್ಷಕ್ಕೆ 1 ಸಾವಿರ, ಎರಡನೇ ವರ್ಷಕ್ಕೆ 4 ಸಾವಿರ, ಐದನೇ ವರ್ಷ ಕೊನೆಗೆ ಒಟ್ಟು 35 ಸಾವಿರ ತರಬೇತಿ ನೀಡಬೇಕಿತ್ತು. ಆದರೆ, 1400 ವೃತ್ತಿಪರರು ತರಬೇತಿ ಪಡೆದಿದ್ದಾರೆ ಎಂದು ಹೇಳಲಾಗಿದ್ದರೂ 12 ಅವಧಿಗಳಲ್ಲಿ 11 ಸೆಷನ್​ಗಳನ್ನು ವಿಭಿನ್ನ ಅಭ್ಯರ್ಥಿಗಳಿಗೆ ಕೇವಲ ಒಂದು ದಿನದ ತರಬೇತಿ ಅವಧಿಗಳಾಗಿವೆ ಎಂಬುದು ಬಹಿರಂಗವಾಗಿದೆ. ಅವುಗಳನ್ನು ನಿಯಮಿತ ತರಬೇತಿ ಕೋರ್ಸ್​ಗಳೆಂದು ಪರಿಗಣಿಸಲು ಸಾಧ್ಯವಾಗುವುದಿಲ್ಲ. ಪ್ರಮಾಣಪತ್ರ ಸಹ ನೀಡಲಾಗಿಲ್ಲ.
2. ಏರೋಸ್ಪೇಸ್ ಮತ್ತು ಡಿಫೆನ್ಸ್​ಗಾಗಿ ಇದ್ದ ಶ್ರೇಷ್ಠತಾ ಕೇಂದ್ರ ಯೋಜನೆ ಪ್ರಾರಂಭವಾಗಿದ್ದು 2017ರಲ್ಲಿ. ಯೋಜನೆ ವೆಚ್ಚ 33.46 ಕೋಟಿ ರೂ. ಆಗಿದ್ದರೆ 31.05 ಕೋಟಿ ರೂ. ಖರ್ಚಾಗಿದೆ. ವಾರ್ಷಿಕ ಗುರಿ 1600 ಇಂಜಿನಿಯರ್ಸ್​ಗೆ ಉನ್ನತ ಮಟ್ಟದ ತರಬೇತಿ ಮತ್ತು ಕೌಶಲಾಭಿವೃದ್ಧಿ ನೀಡಬೇಕಿತ್ತು. ಒಟ್ಟು 768 ಅಭ್ಯರ್ಥಿಗಳಿಗೆ ಮಾತ್ರ ತರಬೇತಿ ನೀಡಲಾಗಿದೆ.
3. ಸೈಬರ್ ಭದ್ರತೆಗಾಗಿ ಇರುವ ಶ್ರೇಷ್ಠತಾ ಕೇಂದ್ರ 2018ರ ಸೆಪ್ಟೆಂಬರ್​ನಲ್ಲಿ ಆರಂಭವಾಗಿದ್ದು, 4.93 ಕೋಟಿ ರೂ. ವೆಚ್ಚ ಮಾಡಲಾಗಿದೆ. ವಾರ್ಷಿಕ ಗುರಿ 4000 ಮಂದಿಗೆ ತರಬೇತಿ ನೀಡಬೇಕಿತ್ತು. 2018-19ರಲ್ಲಿ ಸಾಧಿಸಿದ್ದು 310, 2019-20ರಲ್ಲಿ ಸಾಧಿಸಿದ್ದು 1073, 2020-21ರಲ್ಲಿ 8272. ಇದನ್ನು ಆನ್​ಲೈನ್ ವೆಬಿನಾರ್​ಗಳ ಮೂಲಕ ಮಾಡಲಾಗಿದೆ. ಯಾವುದೇ ಮೌಲ್ಯಮಾಪನ ನಡೆಸಲಾಗಿಲ್ಲ. ಸೈಬರ್ ಭದ್ರತೆಯಲ್ಲಿ ನಡೆಸಲಾದ ನಾಲ್ಕು ಕೋರ್ಸ್​ಗಳು (5-9 ದಿನಗಳ ಅವಧಿ) ಮಾತ್ರ ಮೌಲ್ಯಮಾಪನಕ್ಕೆ ಒಳಪಟ್ಟಿದೆ. ಈ ನಾಲ್ಕು ಕೋರ್ಸ್​ಗಳಿಗೆ ಹಾಜರಾಗಿದ್ದು 837 ಅಭ್ಯರ್ಥಿಗಳ ಪೈಕಿ 73 ಮಂದಿ ಮಾತ್ರ ಮೌಲ್ಯಮಾಪನದಲ್ಲಿ ತೇರ್ಗಡೆಯಾಗಿದ್ದಾರೆ. ಪಠ್ಯಕ್ರಮದ ವಿವರಗಳು ಪಠ್ಯ ಸಾಮಗ್ರಿಗಳ ಅನುಮೋದನೆ, ಮಾನ್ಯತೆ, ಕೌಶಲ ಸಂಸ್ಥೆಯಿಂದ ಮಾನ್ಯತೆ, ಇತ್ಯಾದಿಗಳನ್ನು ಇಲಾಖೆ ಪಡೆದಿಲ್ಲ. ಹೀಗಾಗಿ ತರಬೇತಿ ಪಡೆದ ವ್ಯಕ್ತಿಗಳು ಮಾನ್ಯತೆ ಕೊರತೆಯಿಂದ ಪ್ರಯೋಜನವಾಗಿಲ್ಲ.
4. ಎವಿಜಿಸಿ ವಲಯಕ್ಕೆ ಇದ್ದ ಶ್ರೇಷ್ಠತಾ ಕೇಂದ್ರವು 24.14 ಕೋಟಿ ರೂ. ಖರ್ಚು ಮಾಡಿದ್ದು, 82 ಅಭ್ಯರ್ಥಿಗಳ ಮೊದಲ ಬ್ಯಾಚ್​ಗೆ 2018ರ ಒಳಗೆ ತರಬೇತಿ ನೀಡಬೇಕಿತ್ತು. ಮೂರನೇ ಬ್ಯಾಚ್​ಗೆ 318 ಅಭ್ಯರ್ಥಿಗಳಿಗೆ 2019ರ ಒಳಗೆ ತರಬೇತಿ ನೀಡಬೇಕಿತ್ತು. ಗುರಿ ಸಾಧನೆಯೇ ಇಲ್ಲ.
5. ಕೃತಕ ಬುದ್ಧಿಮತ್ತೆ ಮತ್ತು ರೊಬೊಟಿಕ್ಸ್​ಗಾಗಿ ಶ್ರೇಷ್ಠತಾ ಕೇಂದ್ರಕ್ಕೆ ಯೋಜನೆ ವೆಚ್ಚ 34.35 ಕೋಟಿ ರೂ. ನಿಗದಿಪಡಿಸಿದ್ದು 8.52 ಕೋಟಿ ರೂ. ವೆಚ್ಚವಾಗಿದೆ. ವಾರ್ಷಿಕ ಗುರಿ 1000 ಜನರಿಗೆ ತರಬೇತಿ ನೀಡಬೇಕಿತ್ತು. 2018ರ ಯೋಜನೆಯಾದರೂ ಒಡಂಬಡಿಕೆಗೆ ಸಹಿಯಾಗಿದ್ದು 2019ರಲ್ಲಿ. ಅದೂ 2020-21ರಿಂದ ಸಲ್ಲುವ ರೀತಿ ಸಹಿ ಮಾಡಲಾಗಿದೆ. ಸರ್ಕಾರ ಈಗಾಗಲೆ 8.52 ಕೋಟಿ ರೂ. ಬಿಡುಗಡೆ ಮಾಡಿದೆ.

ಶ್ರೇಷ್ಠತೆ ಕೇಂದ್ರಗಳ ಕನಿಷ್ಠ ಪ್ರಗತಿ: ಅಭಿವೃದ್ಧಿ ಹೊಂದುತ್ತಿರುವ ತಂತ್ರಜ್ಞಾನಗಳನ್ನು ಗಮನದಲ್ಲಿಟ್ಟುಕೊಂಡು ಸಾಮರ್ಥ್ಯ ನಿರ್ವಣಕ್ಕೆ ಒತ್ತು ನೀಡಲು ಮತ್ತು ಕೈಗಾರಿಕೆಗಳು, ಉದ್ಯಮಿಗಳ ಸಹಯೋಗದೊಂದಿಗೆ ಕೌಶಲಾಭಿವೃದ್ಧಿಯ ಮೂಲಕ ಅಗತ್ಯ ತಾಂತ್ರಿಕ ಸಂಪನ್ಮೂಲಗಳನ್ನು ರಚಿಸಲು ಇಲಾಖೆಯು ಸೆಂಟರ್ ಫಾರ್ ಎಕ್ಸಲೆನ್ಸ್ ಗಳನ್ನು ಸ್ಥಾಪಿಸಿದೆ. ಅವು ನಿರೀಕ್ಷಿತ ಪ್ರಗತಿ ಸಾಧಿಸಿಲ್ಲ. ಹಣ ಮಾತ್ರ ಖರ್ಚಾಗಿದೆ. ನ್ಯಾಸ್​ಕಾಮ್ ಡಸಾಲ್ಟ್, ಐಐಐಟಿ ಬೆಂಗಳೂರು ಮತ್ತು ಅಸೋಸಿಯೇಷನ್ ಆಫ್ ಬೆಂಗಳೂರು ಅನಿಮೇಷನ್ ಇಂಡಸ್ಟ್ರಿ ನಂತರ ಪ್ರಮುಖ ಉದ್ಯಮ ಪಾಲುದಾರರು ಶ್ರೇಷ್ಠತಾ ಕೇಂದ್ರಗಳನ್ನು ನಿರ್ವಹಿಸುತ್ತಾರೆ. ಬೆಂಗಳೂರಿನಲ್ಲಿ 74.04 ಕೋಟಿ ರೂ. ವೆಚ್ಚದಲ್ಲಿ ಐದು ಸಿಇಒಗಳನ್ನು ಸ್ಥಾಪಿಸಲಾಗಿತ್ತು.

https://www.vijayavani.net/idli-dosa-batter-supply-on-fermentation-on-the-go-concept/

https://www.vijayavani.net/rajyothsava-award-list-annouced-from-gok/