ಸಾಧಾರಣವಾಗಿ ರಾಷ್ಟ್ರೀಯ ಮಟ್ಟದ ಸುದ್ದಿಗಳನ್ನು ಅನುಸರಿಸುವವರಿಗೆ ರಾಣಾ ಅಯೂಬ್ ಗೊತ್ತಿರಲೇಬೇಕು. ಕಂಠಮಟ್ಟದವರೆಗೆ ಮೋದಿಯವರ ಕುರಿತಂತೆ ಆಕ್ರೋಶ ತುಂಬಿಕೊಂಡಿರುವ, ರಾಷ್ಟ್ರೀಯತೆಯನ್ನೇ ಉಸಿರಾಡುವ ಪ್ರತಿಯೊಬ್ಬರ ಮೇಲೂ ವಿಷಕಾರುವ ಮಹಿಳೆ ರಾಣಾ ಅಯೂಬ್. ಕರೊನಾದ ಸಂದರ್ಭ ಇಂಥವರಿಗೆ ಹಬ್ಬವಾಗಿಬಿಟ್ಟಿತ್ತು. ಜನರ ಬವಣೆಯನ್ನು ಬಂಡವಾಳವಾಗಿಸಿಕೊಂಡು ಮೋದಿಯನ್ನು ವಿರೋಧಿಸುವ ಸಿರಿವಂತರನ್ನು ತನ್ನ ಗಾಳಕ್ಕೆ ಸಿಕ್ಕಿಸಿಕೊಳ್ಳುವ ಇಂಥವರ ಪ್ರಯತ್ನಕ್ಕೆ ಶಕ್ತಿ ಬಂದಿದ್ದು ಆಗಲೇ. ಮೋದಿಯನ್ನು ಪ್ರೀತಿಸುವವರೆಲ್ಲ ನೇರವಾಗಿ ತಾವೇ ಜನರ ಸಹಾಯಕ್ಕೆ ಧುಮುಕಿದ್ದರು ಅಥವಾ ಮೋದಿಯವರ ನೇತೃತ್ವದಲ್ಲಿ ಸೇವಾಕಾರ್ಯ ಮಾಡುವ ಪಿಎಮ್ ಕೇರ್ಸ್ಗೆ ದಾನ ಕೊಟ್ಟಿದ್ದರು. ವಿದೇಶಗಳಲ್ಲಿದ್ದು ನೇರ ಸಹಾಯ ಮಾಡಲಾಗದ, ಮೋದಿಯ ಕುರಿತಂತೆ ದ್ವೇಷವನ್ನು ಹೊಂದಿರುವ ಮಂದಿ ರಾಣಾ ಅಯೂಬ್ರಂಥವರ ಖೆಡ್ಡಾಕ್ಕೆ ಬಿದ್ದರು. 2020ರ ಏಪ್ರಿಲ್-ಮೇ ತಿಂಗಳಲ್ಲಿ ಮೊದಲ ನಿಧಿ ಸಂಗ್ರಹ ಅಭಿಯಾನ ಆರಂಭಿಸಿದ ರಾಣಾ ಸ್ಲಂನಲ್ಲಿ ವಾಸಿಸುವಂಥವರಿಗೆ ಮತ್ತು ರೈತರಿಗಾಗಿ ತಾನು ಸೇವಾಕಾರ್ಯ ಮಾಡಬೇಕೆಂದಿದ್ದೇನೆ ಎಂದು ಹೇಳಿಕೊಂಡಿದ್ದರು. ಅಭಿಯಾನ ಆರಂಭವಾದ ಎಂಟೇ ದಿನದಲ್ಲಿ 2500 ಕುಟುಂಬಗಳಿಗೆ ಪರಿಹಾರ ಸಾಮಗ್ರಿ ಕೊಟ್ಟಿರುವ ಕುರಿತಂತೆ ಆಕೆ ಟ್ವೀಟ್ ಮಾಡಿದ್ದರು. ಮುಂದಿನ 15 ದಿನಗಳಲ್ಲಿ ಈ ಸಂಖ್ಯೆ 23 ಸಾವಿರ ದಾಟಿತ್ತಲ್ಲದೆ ವಲಸೆ ಕಾರ್ವಿುಕರಿಗೆ, ಆದಿವಾಸಿಗಳಿಗೆ ಸಹಾಯ ಮಾಡಿದ್ದೇನೆಂದು ಹೇಳಿಕೊಂಡರು. ಒಟ್ಟಾರೆ ಈ ಅಭಿಯಾನದಲ್ಲಿ ರಾಣಾ ಸಂಗ್ರಹಿಸಿದ್ದು ಸುಮಾರು ಒಂದೂಕಾಲು ಕೋಟಿ, ಬರೋಬ್ಬರಿ 125 ಲಕ್ಷ! ಇದರಲ್ಲಿ 50 ಲಕ್ಷ ರೂಪಾಯಿಯನ್ನು ತನ್ನ ತಂದೆ ಹೆಸರಿನಲ್ಲಿ ಫಿಕ್ಸ್ ್ಡ ಡೆಪಾಸಿಟ್ ಆಗಿ ಇಟ್ಟರು. ನಿಧಿಯಲ್ಲಿ ಬಳಸದೇ ಉಳಿದಿದ್ದ ಹಣ 57 ಲಕ್ಷದಷ್ಟಿತ್ತು. ಹಾಗಿದ್ದ ಮೇಲೆ ಟ್ವೀಟ್ಗಳಲ್ಲಿ ಹೇಳಿಕೊಂಡಿದ್ದಂತೆ ಸಾವಿರಾರು ಮಂದಿಗೆ ಸಹಾಯ ಮಾಡಿದ ಹಣ ಎಲ್ಲಿಂದ ಬಂತು? ಜೂನ್ ತಿಂಗಳಲ್ಲಿ ನಿಧಿ ಸಂಗ್ರಹಕ್ಕೆ ಎರಡನೇ ಅಭಿಯಾನ ಆರಂಭಿಸಿದರು. ಮೊದಲ ಅಭಿಯಾನದ ಹೊತ್ತಲ್ಲಿ ಬಂದ ಲಕ್ಷಾಂತರ ರೂಪಾಯಿ ಮತ್ತು ಯಾರೂ ಲೆಕ್ಕ ಕೇಳುತ್ತಿಲ್ಲವೆಂಬ ವಿಶ್ವಾಸ ರಾಣಾರ ಮನ ಕೆಡಿಸಿರಲು ಸಾಕು. ಈ ಬಾರಿ ಅಸ್ಸಾಂ, ಬಿಹಾರ ಮತ್ತು ಮಹಾರಾಷ್ಟ್ರಗಳಲ್ಲಿ ಪರಿಹಾರ ಕಾರ್ಯಕ್ಕೆ ಹಣ ಬೇಕೆಂಬುದು ಅವರ ಬೇಡಿಕೆಯಾಗಿತ್ತು. ಈ ಬೇಡಿಕೆಗೆ ಪೀಠಿಕೆಯಾಗಿ ಮಾಡಿದ ಟ್ವೀಟ್ನಲ್ಲಿ 70 ಸಾವಿರ ಕುಟುಂಬಗಳಿಗೆ ಪರಿಹಾರ ಸಾಮಗ್ರಿಗಳನ್ನು ವಿತರಿಸಿರುವುದಾಗಿಯೂ 10 ಸಾವಿರ ವಲಸೆ ಕಾರ್ವಿುಕರನ್ನು ಮನೆಗೆ ತಲುಪಿಸಿರುವುದಾಗಿಯೂ ಹೇಳಿಕೊಂಡರು. ಅಷ್ಟೇ ಅಲ್ಲ, ಎಂಟು ಟನ್ಗಳಷ್ಟು ಆಹಾರ, 80 ಸಾವಿರ ಲೀಟರ್ ಹಾಲು, 50 ಸಾವಿರ ಲೀಟರ್ ಎಣ್ಣೆ, 50 ಸಾವಿರ ಕೇಜಿ ಧಾನ್ಯ ಹಂಚಿದ್ದೇನೆ ಎಂದು ಬಡಾಯಿ ಕೊಚ್ಚಿಕೊಂಡರು. ಆದರೆ ಮೊದಲನೇ ಅಭಿಯಾನ ಮುಗಿಯುವಾಗ ಅವರು ಹೇಳಿದ ಸಂಖ್ಯೆಗೂ ಈಗ ಹೇಳುತ್ತಿರುವ ಸಂಖ್ಯೆಗೂ ಅಜಗಜಾಂತರವಿತ್ತು. ಅವರನ್ನು ಹತ್ತಿರದಿಂದ ಅನುಸರಿಸುತ್ತಿದ್ದ ಕೆಲವರಿಗೆ ಅನುಮಾನ ಶುರುವಾಗಿದ್ದು ಆಗಲೇ. ರಾಣಾ ಹೇಳಿರುವ ಲೆಕ್ಕಾಚಾರದ ಪ್ರಕಾರ 10 ಸಾವಿರ ಕಾರ್ವಿುಕರನ್ನು ಅವರವರ ಮನೆಗೆ ತಲುಪಿಸಲು ಕನಿಷ್ಠ 35 ಲಕ್ಷ ರೂ. ಬೇಕಿತ್ತು. 15 ಸಾವಿರ ಕುಟುಂಬಗಳನ್ನು ಧನಸಹಾಯದ ಮೂಲಕ ಸಾಕಲು ನಾಲ್ಕೂವರೆ ಕೋಟಿಯಾದರೂ ಬೇಕಿತ್ತು. ಇನ್ನು ಅಕ್ಕಿ, ಬೇಳೆ, ಹಾಲು ಇತ್ಯಾದಿಗಳಿಗಾಗಿ ಕನಿಷ್ಠ ಒಂದೂವರೆ ಕೋಟಿ ಅಗತ್ಯವಿತ್ತು. ಆದರೆ ಅವರು ಸಂಗ್ರಹಿಸಿದ್ದು ಒಂದೂಕಾಲು ಕೋಟಿ ಮಾತ್ರ. ಲೆಕ್ಕ ಸರಿ ಹೊಂದುತ್ತಿರಲಿಲ್ಲ. ಆದರೆ ರಾಣಾರ ಹಳಿಯಿಲ್ಲದ ರೈಲು ಮಾತ್ರ ಧಾವಿಸುತ್ತಲೇ ಇತ್ತು. ಈ ಅಭಿಯಾನದಲ್ಲೂ ರಾಣಾಗೆ ಲಕ್ಷಾಂತರ ರೂಪಾಯಿ ಹರಿದುಬಂತು. ವೈಯಕ್ತಿಕ ಖರ್ಚುಗಳಿಗೆ ಈ ಹಣವನ್ನು ರಾಣಾ ಮನಸೋ ಇಚ್ಛೆ ಬಳಸಿದರು. 2021ರ ಮಧ್ಯಭಾಗದಲ್ಲಿ ಕೋವಿಡ್ ಪೀಡಿತರಿಗಾಗಿ ಸಹಕಾರ ಮಾಡುವ ನೆಪದಲ್ಲಿ ಮತ್ತೊಂದು ಅಭಿಯಾನ ಆರಂಭಿಸಿದರು. ಮೂರು ಅಭಿಯಾನಗಳಿಂದ ಸುಮಾರು ಎರಡು ಮುಕ್ಕಾಲು ಕೋಟಿಯಷ್ಟು ಹಣ ಸಂಗ್ರಹಿಸಿದ್ದರು. ಈ ಹೊತ್ತಿನಲ್ಲಿಯೇ ರಾಣಾ ಅಯೂಬ್ ಕಾಂಗ್ರೆಸ್ಸು ಮತ್ತು ಎಡಪಂಥೀಯರ ಮೋದಿ ವಿರೋಧಿ ಕೂಗಿಗೆ ದನಿಯಾಗಿದ್ದು. ಪಿಎಮ್ೇರ್ಸ್ಗೆ ಹಣ ಏಕೆ ಕೊಡಬೇಕು? ಅದಕ್ಕೆ ಲೆಕ್ಕವಿಲ್ಲ, ಎಲ್ಲಿ ಖರ್ಚು ಮಾಡಿದರು ಕೇಳುವವರಿಲ್ಲ ಎಂದೆಲ್ಲ ರಾಣಾ ಬೀಡುಬೀಸಾಗಿಯೇ ಮಾತಾಡಿದ್ದರು. ಗಾಜಿನ ಮನೆಯಲ್ಲಿ ಕುಳಿತು ಕಲ್ಲಿನ ಕೋಟೆಯ ಮೇಲೆ ಕಲ್ಲೆಸೆಯುವ ಅವರ ತಾಕತ್ತನ್ನು ಮೆಚ್ಚಲೇಬೇಕಿತ್ತು ಬಿಡಿ!
