ಹಾಗಾದರೆ, ಏನಾಗಿದೆ ಕೊಹ್ಲಿಗೆ? ಏನಾಗಿದೆ ಅವರ ಆಟಕ್ಕೆ? ಅವರು ದೊಡ್ಡ ಮೊತ್ತ ಗಳಿಸಲಾಗದೇ ಇರುವುದಕ್ಕೆ ಅವರ ಆಟದ ಯಾವುದೋ ತಾಂತ್ರಿಕ ಸಮಸ್ಯೆ ಕಾರಣವೆನಿಸುತ್ತಿಲ್ಲ. ದುರದೃಷ್ಟದ ಜತೆಗೆ, ಮಾನಸಿಕವಾಗಿಯೂ ಅವರು ಮೊದಲಿನಂತಿಲ್ಲ ಎಂಬುದೇ ಕಾರಣವಿರುವಂತಿದೆ. ಹೊರಜಗತ್ತಿನ ಕಣ್ಣಿಗೆ ಕೊಹ್ಲಿ ಎಷ್ಟೇ ಸಹಜವಾಗಿ ಕಂಡರೂ; ಜೊತೆ ಆಟಗಾರರೊಂದಿಗೆ ಖುಷಿಖುಷಿಯಾಗಿ ಕಂಡುಬಂದರೂ, ಅಭಿಮಾನಿಗಳೊಂದಿಗೆ ಚೇಷ್ಟೆ, ಆಟದ ನಡುವೆ ಸಿಟ್ಟು, ವಿವಿಧ ಮುಖಭಾವ ಭಂಗಿಗಳಲ್ಲಿ ವ್ಯತ್ಯಾಸ ಕಾಣದಿದ್ದರೂ, ಒಳಗೊಳಗೇ ಕೊಹ್ಲಿ ಕರಗುತ್ತಿರುವುದು ನಿಜ. ಅದ್ಯಾವುದೋ ವೇದನೆ, ಹತಾಶೆ, ಮನೋವ್ಯಥೆ ಅವರನ್ನು ಹಿಡಿದಿಟ್ಟಿರುವಂತಿದೆ. ಭಾರತೀಯ ಕ್ರಿಕೆಟ್ನ ಅತ್ಯಂತ ಯಶಸ್ವಿ ನಾಯಕನಾಗಿದ್ದರೂ, ಐಸಿಸಿ ಟೂರ್ನಿಗಳಲ್ಲಿ ದೊರಕದ ಯಶಸ್ಸು, ಐಪಿಎಲ್ ನಾಯಕರಾಗಿ ವೈಫಲ್ಯಗಳು ಹೊಣೆಗಾರಿಕೆಯೇ ಬೇಡ ಎಂಬ ಹಂತಕ್ಕೆ ಅವರನ್ನು ತಂದು ನಿಲ್ಲಿಸಿದವು. ಇನ್ನು ಹೊಣೆಗಾರಿಕೆಯನ್ನು ಸ್ವತಃ ತೊರೆಯುವುದು ಒಂದು ರೀತಿಯಾದರೆ, ಏಕದಿನ ನಾಯಕತ್ವವನ್ನು ಬಲವಂತವಾಗಿ ಕಿತ್ತುಕೊಳ್ಳುವಂಥ ಪರಿಸ್ಥಿತಿ ನಿರ್ವಣವಾಗಿದ್ದು, ಅವರನ್ನು ಇನ್ನಷ್ಟು ಘಾಸಿಗೊಳಿಸಿತು. ಕ್ರಿಕೆಟಿಗನಾಗಿ ಎಷ್ಟೇ ಮೇರು ಸಾಧನೆ ಮಾಡಿದ್ದರೂ, ಯಾರೊಬ್ಬರೂ ತಂಡ, ಸಂಸ್ಥೆಗಿಂತ ದೊಡ್ಡವರಲ್ಲ. ಹೀಗಿರುವಾಗ ಬಿಸಿಸಿಐನ ಅಧಿಕಾರ ಸ್ಥಾನದಲ್ಲಿರುವವರ ವಿರುದ್ಧ ಆರೋಪಗಳನ್ನು ಮಾಡಿ ಕೊಹ್ಲಿ ಬಹಿರಂಗ ಜಟಾಪಟಿಗಿಳಿದಿದ್ದು ಬ್ಯಾಟಿಂಗ್ ಮೇಲೆ ಮತ್ತಷ್ಟು ಒತ್ತಡ ಹೇರಿತು. ಶ್ರೇಷ್ಠ ಆಟಗಾರನಾಗಿದ್ದರೂ, ನಾಯಕನಾಗಿ ವೀಕ್ ಎಂಬ ಟೀಕೆಯನ್ನು ಸುಳ್ಳು ಮಾಡಲಾಗದೆ, ದಕ್ಷಿಣ ಆಫ್ರಿಕಾ ಪ್ರವಾಸದಿಂದ ಸೋತು ಮರಳಿದ್ದು ಹತಾಶೆ ಹೆಚ್ಚಿಸಿತು. ವ್ಯಕ್ತಿಗತವಾಗಿ ರೋಹಿತ್ ಶರ್ಮ- ವಿರಾಟ್ ಕೊಹ್ಲಿ ಸಂಬಂಧ ಯಾವ ರೀತಿ ಇದೆಯೋ ಅವರಿಬ್ಬರಿಗೇ ಗೊತ್ತು. ಆದರೆ, ಮಾಧ್ಯಮಗಳಲ್ಲಿ, ಸಾಮಾಜಿಕ ಜಾಲತಾಣಗಳಲ್ಲಿ ರೋಹಿತ್ ವರ್ಸಸ್ ವಿರಾಟ್ ಎಂಬ ಅಭಿಮಾನಿಗಳ ಯುದ್ಧವೇ ನಡೆದಿದ್ದು ಇಬ್ಬರಿಗೂ ಒಳಿತು ತರಲಿಲ್ಲ. ಇಬ್ಬರೂ ಪ್ರತೀ ಇನಿಂಗ್ಸ್ನಲ್ಲೂ ವಿಫಲರಾಗುವಂತೆಯೇ ಇಲ್ಲ ಎಂಬ ಒತ್ತಡದಿಂದ ಕಣಕ್ಕಿಳಿಯುವಂತಾಯಿತು. ಇವೆಲ್ಲವೂ ಅನಗತ್ಯ, ಅನಪೇಕ್ಷಿತ ಒತ್ತಡಗಳಿಗೆ, ತಳಮಳಗಳಿಗೆ ಕಾರಣವಾದವು.
