ನಿಮಗೆ ಯಾವುದೊ ಬಹುಮುಖ್ಯ ಕೆಲಸಕ್ಕಾಗಿ ಅನೇಕರ ನೆರವು ಬೇಕಾಗುತ್ತದೆ. ಅಂಥ ಸಂದರ್ಭದಲ್ಲಿ ನಿಮ್ಮ ಸಂಬಂಧಿಕರಿಂದ ಕೆಲಸ ಮಾಡಿಸಿದರೆ ಹಣ ಉಳಿಯಬಹುದು ಎಂದು ಹೋಗಬೇಡಿ. ಕೆಲಸ ಕೊಟ್ಟಿರೋ ಶುರುವಾಗುತ್ತದೆ ಅವರ ‘ಬಿಜಿ’ನೆಸ್. ಇವತ್ತು ಬಿಜಿ, ನಾಳೆ ಮಾಡುತ್ತೇನೆ ಅಂತನೋ, ಮದುವೆ ಇದೆ ಪುರುಸೊತ್ತು ಇಲ್ಲ, ಎರಡು ದಿನದ ನಂತ್ರ ಕೊಡುತ್ತೇನೆ ಅಂತನೋ ಮುಂದೂಡುತ್ತಲೇ ಇರುತ್ತಾರೆ. ಅವರು ಏನಾದರೂ ಕೈಕೊಟ್ಟರೆ ನೀವು ಜೋರಾಗಿ ಕೇಳುವಂತೆಯೂ ಇಲ್ಲ, ಯಾಕೆಂದರೆ ಸಂಬಂಧ ಹಾಳಾಗುವ ಸಂಭವ ಇರುವುದರಿಂದ. ಒಮ್ಮೆ ಹೀಗೇ ಆಯ್ತು, ತಿಪಟೂರಿನಲ್ಲಿ ಮ್ಯಾಜಿಕ್ ಶೋ ಕ್ಯಾಂಪನ್ನು ಬುಕ್ ಮಾಡಿದ್ದೆ. ನನ್ನ ಸಂಬಂಧಿಕರ ಪ್ರೆಸ್ನಲ್ಲಿ ಪೋಸ್ಟರ್ ಪ್ರಿಂಟ್ಗೆ ಕೊಟ್ಟಿದ್ದೆ. ಆರ್ಡರ್ ತಗೊಳ್ತಾ, ‘ನೀನೇನು ಯೋಚ್ನೆ ಮಾಡ್ಬೇಡಾ, ಹೇಳಿದ ಟೈಮಿಗೆ ಮಾಡಿ ಕೊಡ್ತೇನೆ’ ಅಂತ ಹೇಳಿದ್ದರು. ಶೋ ದಿನ ಹತ್ತಿರ ಬರ್ತಿದ್ದ ಹಾಗೆ ಪ್ರಚಾರ ಶುರು ಮಾಡ್ಬೇಕು, ಪ್ರಿಂಟರ್ ಹತ್ರ ಹೋದ್ರೆ ‘ಮಾಡ್ತೀನಪ್ಪಾ, ಅದ್ಯಾಕೆ ಅಷ್ಟೊಂದು ಟೆನ್ಶನ್ ಮಾಡ್ಕೋತೀಯಾ, ಅದೆಲ್ಲ ಅರ್ಧಗಂಟೆ ಕೆಲ್ಸ ನನ್ ಮಷೀನಿಗೆ’ ಅಂತ ಹೇಳಿ ಪ್ರತಿ ಸಾರಿ ನನ್ನನ್ನು ಸಾಗ ಹಾಕುತ್ತಿದ್ದರು. ಕೊನೆಗೆ ಸಾಕಾಗಿ ನಾನು ರೇಗಿದ್ದಕ್ಕೆ ಅರ್ಧಗಂಟೆ ಕೆಲಸವನ್ನು 72 ಗಂಟೆಯ ನಂತರ ಮಾಡಿಕೊಟ್ಟರು! ಇದರಿಂದಾಗಿ ಪ್ರದರ್ಶನ ಮುಂದೂಡಬೇಕಾಯ್ತು.
