ಮನೆ ಕೆಲಸದವಳು, ಇಸ್ತ್ರಿ ಅಂಗಡಿಯವರು, ದುರಸ್ತಿ ಮಾಡುವವರು, ವಾಹನ ಚಾಲಕರು ಕೈ ಕೊಡುವುದು ತೀರಾ ಸಾಮಾನ್ಯ. ಬೆಂಗಳೂರಿನಲ್ಲಿ ಕಾರ್ಪೆಂಟರು, ಇಲೆಕ್ಟ್ರೀಶಿಯನ್ನು, ಪ್ಲಂಬರು ಹೇಳಿದ ಸಮಯಕ್ಕೆ ಬರುತ್ತಾರೆ ಅಂದರೆ ಯಾರೂ ನಂಬರು! ಕೈ ಕೊಡುವ ಕಲೆ ಕೆಲವು ಸಾಹಿತಿಗಳಿಗೂ ಗೊತ್ತಿದೆ. ಕಾರ್ಯಕ್ರಮಕ್ಕೆ ಬರಲು ಒಪ್ಪಿಕೊಂಡು ಕೊನೆ ಘಳಿಗೆಯಲ್ಲಿ ಅನಾರೋಗ್ಯ ಅಥವಾ ಇನ್ನಾವುದೋ ಸುಳ್ಳು ಕಾರಣ ಹೇಳಿ ಕೈ ಕೊಡುವ ಸಾಹಿತಿಗಳು ಸಾಕಷ್ಟು ಸಂಖ್ಯೆಯಲ್ಲಿ ಇದ್ದಾರೆ. ಸಮಾರಂಭಕ್ಕೆ ಒಂದು ವಾರ ಇರುವಾಗ ಮುಖ್ಯ ಅತಿಥಿಗಳಾಗಿ ಬನ್ನಿ ಎಂದು ಯಾರಾದರೂ ನನ್ನನ್ನು ಕರೆದರೆ, ಮೊದಲು ಒಪ್ಪಿಕೊಂಡವರು ಕೈ ಕೊಟ್ಟಿದ್ದಾರೆ ನಾನು ಸ್ಟೆಪ್ನಿ ಎಂಬುದು ಸ್ಪಷ್ಟ. ಸಾಹಿತಿಗಳಿಗೆ ಹೋಲಿಸಿದರೆ ಕಲಾವಿದರು ಕೈ ಕೊಡುವುದು ಕಡಿಮೆ. ಏಕೆಂದರೆ ಅವರು ಮುಂಗಡ ತೆಗೆದುಕೊಂಡಿರುತ್ತಾರೆ. ಕೈ ಕೊಡುವುದು ಇನ್ನೊಬ್ಬರು ನಮ್ಮ ಮೇಲೆ ಇಟ್ಟಿರುವ ವಿಶ್ವಾಸಕ್ಕೆ ಬಗೆಯುವ ದ್ರೋಹ. ಆದರೂ ಅದೀಗ ಎಷ್ಟು ಸಾಮಾನ್ಯವಾಗಿದೆ ಎಂದರೆ ಯಾರೂ ಆ ಬಗ್ಗೆ ಹೆಚ್ಚು ತಲೆ ಕೆಡಿಸಿಕೊಳ್ಳುವುದಿಲ್ಲ. ಅಧಿಕ ಬಡ್ಡಿ ನೀಡುತ್ತೇವೆ ಎಂದು ಜನರನ್ನು ನಂಬಿಸಿ ಠೇವಣಿ ಸಂಗ್ರಹಿಸುವ ಫೈನಾನ್ಸ್ ಕಂಪೆನಿಗಳು, ಸಹಕಾರಿ ಸಂಘಗಳು ಇದ್ದಕ್ಕಿದ್ದಂತೆ ಬಾಗಿಲು ಮುಚ್ಚಿ ಗ್ರಾಹಕರಿಗೆ ಕೈ ಕೊಟ್ಟ ಸುದ್ದಿ ಆಗಾಗ ಪತ್ರಿಕೆಗಳಲ್ಲಿ ಬರುತ್ತಲೇ ಇರುತ್ತದೆ. ಇಂಥ ವಂಚನೆಗಳ ಬಗ್ಗೆ ಜನರು ನಾಲ್ಕು ದಿನ ರೋಷಾವೇಶದಿಂದ ಮಾತಾಡಿ ನಂತರ ತಣ್ಣಗಾಗುತ್ತಾರೆ. ರಾಷ್ಟ್ರೀಕೃತ ಬ್ಯಾಂಕುಗಳು ಗ್ರಾಹಕರಿಗೆ ಕೈ ಕೊಡುವುದಿಲ್ಲ. ಆದರೆ ಕೆಲವು ಗ್ರಾಹಕರು ಬ್ಯಾಂಕಿಗೆ ಕೈ ಕೊಡುತ್ತಾರೆ.
