ಇಬ್ಬರೂ ಸ್ಪರ್ಧಾ ಕೋಣೆ ಸೇರಿದರು. ಕಲಾಧರ ‘ಇರುಳು ಪೂರ ಕಷ್ಟಪಡುವ ಬದಲು ನಸುಕಿನಲ್ಲಿ ಎದ್ದು ನಿರ್ಣಾಯಕರು ಬರುವುದರೊಳಗೆ ಅದ್ಭುತವಾದ ವಸ್ತುಗಳನ್ನು ತಯಾರಿಸಬಲ್ಲೆ’ ಎಂದುಕೊಂಡು ಆ ಹತ್ತಿಹೊರೆಯನ್ನೇ ತಲೆದಿಂಬು ಹಾಸಿಗೆಯನ್ನಾಗಿ ಮಾಡಿಕೊಂಡು ಮಲಗಿಬಿಟ್ಟ. ಸುಶಾಮ ತನ್ನ ಹತ್ತಿಹೊರೆಯಿಂದ ಹತ್ತಿ ತೆಗೆದು ತಡಕಾಡುತ್ತ ವಸ್ತು ತಯಾರಿಸಲು ಶುರುಮಾಡಿದ. ನಸುಕು ಹರಿದಾಗ ಲಗುಬಗೆಯಿಂದ ಎದ್ದ ಕಲಾಧರ ಅತ್ಯುತ್ತಮವಾಗಿ ಕಲಾಕೃತಿ ನಿರ್ವಿುಸಿದ. ಇಬ್ಬರೂ ನಿರ್ಣಾಯಕರ ದಾರಿ ಕಾಯತೊಡಗಿದರು. ಅಷ್ಟರಲ್ಲಿ ಸ್ಪರ್ಧೆಯಲ್ಲಿ ಸುಶಾಮ ವಿಜಯಿಯಾಗಿದ್ದಾನೆ ಎಂಬ ಉದ್ಘೋಷ ಸಭೆಯಲ್ಲಿ ಮೊಳಗಿದಾಗ ಕಲಾಧರ ಕೋಪಗೊಂಡು ಅಲ್ಲಿಗೆ ತೆರಳಿ ‘ಇದು ಮೋಸ, ನಿರ್ಣಾಯಕರು ಬಂದು ನೋಡಿ ನಿರ್ಣಯಮಾಡದೇ ಹೇಗೆ ಫಲಿತಾಂಶ ನೀಡಿದಿರಿ..?!’ ಎಂದು ಕೂಗಿದ. ಆಗ ಅಲ್ಲೇ ಕುಳಿತಿದ್ದ ಸೂರ್ಯದೇವ ನಸುನಗುತ್ತ ‘ಈ ಕೊನೆಯ ಸ್ಪರ್ಧೆಯ ನಿರ್ಣಾಯಕನಾಗಿ ನಾನು ಬಂದಿದ್ದೆ. ಇರುಳ ಸರಿಸಿ ಬೆಳಕು ಹರಿಸುತ್ತ ನಾನು ನಿಮ್ಮಲ್ಲಿಗೆ ಬಂದಾಗ ನೀನು ನಿದ್ರಿಸುತ್ತಿದ್ದೆ. ಆದ್ದರಿಂದ ನೀನು ನಿದ್ರಿಸಲೆಂದು ಬಳಸಿದ ಆ ಹತ್ತಿ ತಲೆದಿಂಬು, ಹಾಸಿಗೆಯನ್ನೇ ನಿನ್ನ ಕಲಾಕೃತಿ ಎಂದು ಸ್ಪರ್ಧೆಗೆ ಪರಿಗಣಿಸಬೇಕಾಯಿತು. ಆದರೆ ಸುಶಾಮ ಬಹಳಷ್ಟು ಕಲಾಕೃತಿಗಳನ್ನು ತಯಾರಿಸಿದ್ದ. ಆದ್ದರಿಂದ ಅವನು ವಿಜಯಶಾಲಿಯಾದ’ ಎಂದ.
