ಉನ್ನತ ಯಶಸ್ಸು ನಮ್ಮದಾಗಬೇಕು ಎಂದರೆ ನಮ್ಮನ್ನು ನಾವು ಅರಿತುಕೊಳ್ಳಬೇಕು. ನಮ್ಮ ಶಕ್ತಿ, ಸಾಮರ್ಥ್ಯಗಳನ್ನೇ ಅರಿತುಕೊಳ್ಳದಿದ್ದರೆ ಸಾಧನೆಯ ಹಾದಿಯಲ್ಲಿ ಸಾಗಲು ಹೇಗೆ ಸಾಧ್ಯ? ಅಷ್ಟಕ್ಕೂ, ವಿದ್ಯಾವಂತರಿರಲಿ, ಅವಿದ್ಯಾವಂತರಿರಲಿ ಎಲ್ಲರಲ್ಲೂ ಜೀವನವನ್ನು ರೂಪಿಸಿಕೊಳ್ಳುವ ಒಂದು ಶಕ್ತಿ ಇರುತ್ತದೆ. ಅದನ್ನು ಗುರುತಿಸಿ, ಆ ಸಾಮರ್ಥ್ಯದ ಬಲದಿಂದ ಸಾಧನೆಯ ಏಣಿಯನ್ನು ಹತ್ತಬೇಕು. ಕೀಳರಿಮೆ, ಹತಾಶೆ, ನಿರಾಶೆ ಬದಿಗಿಟ್ಟು ನಮ್ಮನ್ನು ನಾವು ಮುಕ್ತವಾಗಿ ಅವಲೋಕಿಸಿಕೊಳ್ಳಬೇಕು. ಆಗಲೇ ವ್ಯಕ್ತಿತ್ವ ಅರಳಲು ಸಾಧ್ಯವಾಗುತ್ತದೆ. ಮುಖ್ಯವಾಗಿ, ತರುಣರು ಸಕಾಲದಲ್ಲಿ ಅವರ ಸಾಮರ್ಥ್ಯ ಅರಿತುಕೊಂಡು, ಮುಂದೆ ನಡೆದರೆ ಸರಿಯಾದ ದಾರಿಯಲ್ಲಿ ಬದುಕನ್ನು ಕಟ್ಟಿಕೊಂಡು, ಸಂತೃಪ್ತಿಯಿಂದ ಬಾಳಲು ಸಾಧ್ಯ.
