ಒಂಟೆಗಳು ಸಾಕಷ್ಟು ನೀರು ಕುಡಿಯುತ್ತಿರುವುದರಿಂದ ನೀರಿನ ಹಾಹಾಕಾರ ಹೆಚ್ಚಾಗಿದೆ ಎನ್ನುವ ಕಾರಣದಿಂದ ಅವುಗಳನ್ನು ಕೊಲ್ಲುವಂಥ ಹೀನ ಸ್ಥಿತಿಗೆ ಮನುಷ್ಯ ತಲುಪಿರುವುದು ಶೋಚನೀಯ. ಒಂಟೆಗಳು ದೇಹಸ್ಥಿತಿ ಮತ್ತು ವಾತಾವರಣಕ್ಕೆ ತಕ್ಕಂತೆ ನೀರು ಕುಡಿಯುವುದು ತಪ್ಪಾದರೆ ಮನುಷ್ಯ ವ್ಯರ್ಥವಾಗಿ ದಿನನಿತ್ಯ ಸಾವಿರಾರು ಲೀಟರ್ನ್ನು ಬಳಸುತ್ತಿದ್ದಾನಲ್ಲ ಅವನಿಗೆ ಯಾವ ಶಿಕ್ಷೆ ಕೊಡುತ್ತೀರಾ? ಬೆಳಗ್ಗೆಯಿಂದ ಸಂಜೆಯವರೆಗೂ ತನ್ನ ನಿತ್ಯಕರ್ಮಗಳಿಂದ ಹಿಡಿದು ಮನೆಯ ಅನೇಕ ಕೆಲಸ ಕಾರ್ಯಗಳಿಗೆ ಅಗತ್ಯಕ್ಕಿಂತ ಹೆಚ್ಚು ನೀರು ಬಳಸುತ್ತಿದ್ದಾನಲ್ಲ ಅವನಿಗೆ ಯಾವ ಶಿಕ್ಷೆ ಕೊಡುತ್ತೀರಾ? ಭೂಮಿಯ ಮೇಲೆ ಏನೆಲ್ಲ ಸಮಸ್ಯೆಗಳು, ಅನಾಹುತಗಳು, ಏರುಪೇರುಗಳು ಆಗುತ್ತಿದ್ದರೂ ಅದೆಲ್ಲದಕ್ಕೂ ಮನುಷ್ಯನ ಹಸ್ತಕ್ಷೇಪ ಕಾರಣವೇ ಹೊರತು ಮೂಕಪ್ರಾಣಿಗಳಲ್ಲ. ನೀರಿನ ತತ್ವಾರಕ್ಕೆ ಕಾರಣವಾಗಿರುವ ಮೂಲ ಸಮಸ್ಯೆಯ ಬಗ್ಗೆ ಸರ್ಕಾರ ಚಿಂತನೆ ನಡೆಸಿ, ಒಂಟೆಗಳನ್ನು ಉಳಿಸಲು ಪರ್ಯಾಯ ಯೋಜನೆಯನ್ನು ರೂಪಿಸುವುದು ಮನುಷ್ಯತ್ವದ ಗುಣ.
