ಬೆಲೆ ಏರಿಕೆಯ ನಾಗಾಲೋಟದಲ್ಲಿ ನಾಳೆ ಭೂಮಿಯ ಬೆಲೆ ಇಂದಿನ ಹತ್ತರಷ್ಟಾಗುವುದರಿಂದ ಪರಿಹಾರಕ್ಕೆ ಕಾಸಿನ ಬೆಲೆಯೂ ಇರುವುದಿಲ್ಲ. ಭೂಮಿಯನ್ನು ಉತ್ತು ಗೊತ್ತೇ ವಿನಃ ಅದನ್ನು ಸುರಕ್ಷಿತವಾಗಿ ಮುಂದಿನ ದಿನಗಳಲ್ಲಿ ಇಟ್ಟುಕೊಳ್ಳುವುದು ರೈತಾಪಿ ಜನಕ್ಕೆ ಗೊತ್ತಿಲ್ಲ. ಪರಿಹಾರದ ಹಣ ಬಂದರೂ ಅದರ ಸದ್ಬಳಕೆ ತಿಳಿಯದು. ಹಿಂದೆ ಕೃಷಿಕರಲ್ಲದವರು ಭೂಮಿ ಕೊಳ್ಳುತ್ತಿದ್ದಿಲ್ಲ. ಉದ್ಯಮಿಗಳು ಕೃಷಿ ಭೂಮಿಯನ್ನು ಕೃಷಿಯೇತರ ಭೂಮಿಯಾಗಿ ಮಾರ್ಪಡಿಸಿಕೊಳ್ಳಬೇಕಾಗಿತ್ತು. ಆದರೆ ಇತ್ತೀಚಿನ ಕಾನೂನಿನ ಪ್ರಕಾರ ಕೃಷಿಕನಲ್ಲದವನೂ ಕೃಷಿ ಭೂಮಿ ಕೊಳ್ಳಲು ಆಸ್ಪದವಿದೆ. ಈಗ ಕೃಷಿ ಮಾಡುವಲ್ಲಿ ಬದಲಾವಣೆಯಾಗಿ ಎತ್ತು ಬಂಡಿ ನೇಗಿಲು ಹಳ್ಳಿಗಳಲ್ಲಿ ಕಡಿಮೆಯಾಗಿದೆ. ಟ್ರಾ್ಯಕ್ಟರ್, ಬಿತ್ತುವ ಯಂತ್ರ, ಉಳುವ ಯಂತ್ರ ಬಂದು ಶ್ರೀಮಂತ ರೈತರು ಮಾತ್ರ ಕೃಷಿ ಮಾಡಲು ಸಾಧ್ಯ ಎಂಬಂತಾಗಿದೆ. ಸಣ್ಣಪುಟ್ಟ ರೈತರು ವ್ಯವಸಾಯ ಮಾಡುವಂತೆಯೇ ಇಲ್ಲ. ಇದರಿಂದ ಭೂಮಿ ಮಾರಿಕೊಂಡರೆ ಮುಂದೆ ಅವರ ಗತಿ ಅಧೋಗತಿ. ಹೀಗಾಗಿ, ಭೂಮಿ ಮಾರಿ ಭೂರಹಿತನಾಗುವ ಚಿಕ್ಕ ರೈತನನ್ನು ‘ನಿವೃತ್ತಿ ಹೊಂದಿದ ರೈತ’ ಎಂದು ಪರಿಗಣಿಸಿ ಅವನಿಗೂ ಪಿಂಚಣಿ ಕೊಡುವ ವ್ಯವಸ್ಥೆಯಾದರೆ ನಿವೃತ್ತ ಸರ್ಕಾರಿ ನೌಕರನಂತೆ ಅವನೂ ಸುಖ ಸಂಸಾರ ನಡೆಸಲು ಸಾಧ್ಯ. ಇದರ ಬಗ್ಗೆ ಸರ್ಕಾರ ಗಂಭೀರವಾಗಿ ಚಿಂತನೆ ನಡೆಸಬೇಕು. ರೈತ ಸಂಘಗಳೂ ಸಣ್ಣ ರೈತರ ಭದ್ರತೆಗಾಗಿ ಪಿಂಚಣಿ ಯೋಜನೆ ಜಾರಿಗೆ ತರುವತ್ತ ಸರ್ಕಾರಕ್ಕೆ ಒತ್ತಾಯ ಮಾಡಲಿ.
