ಇಂಥ ಸಂಕಷ್ಟದಲ್ಲೂ, ಜೆ.ಟಿ.ಎನ್ ಇಂಟರ್ನ್ಯಾಷನಲ್ 500 ಮಿಲಿಯನ್ ಸಿಂಗಾಪುರ ಡಾಲರ್ನಷ್ಟು ವಹಿವಾಟು ನಡೆಸಿತು ಎಂಬುದು ಸಣ್ಣ ವಿಚಾರವಲ್ಲ. ಏರ್ ಷೋ ನಡೆಯುತ್ತಿರುವಾಗ ಸಿಂಗಾಪುರದ ಜನತೆ ಮತ್ತು ಅಧಿಕೃತ ಸಂದರ್ಶಕರಿಗೆ ನಿಯಮಿತ ಆರೋಗ್ಯ ತಪಾಸಣೆ ನಡೆಯಿತು. ಪ್ರತಿಯೊಂದು ಹೋಟೆಲ್, ರೆಸ್ಟೋರೆಂಟ್, ವಾಣಿಜ್ಯ ಕೇಂದ್ರ... ಹೀಗೆ ಎಲ್ಲಿ ಹತ್ತಕ್ಕಿಂತ ಹೆಚ್ಚು ಜನ ಸೇರುತ್ತಾರೋ ಅಲ್ಲಿ ಉಷ್ಣತೆ ತಪಾಸಣೆ ಹಾಗೂ ಸ್ಕ್ರೀನಿಂಗ್ ನಡೆಸಿತು. ಆರೋಗ್ಯ ತಪಾಸಣೆ ಕೇಂದ್ರಗಳು ಮೆಟ್ರೋ ರೈಲು, ಬಸ್ ನಿಲ್ದಾಣಗಳಲ್ಲಿ ಕಾರ್ಯನಿರ್ವಹಿಸಿದವು. ವಿಮಾನ ನಿಲ್ದಾಣದಲ್ಲಿ ತೋರಿದಷ್ಟೇ ಎಚ್ಚರವನ್ನು ಈ ಎಲ್ಲ ಪ್ರದೇಶಗಳಲ್ಲೂ ವಹಿಸಲಾಗುತ್ತಿತ್ತು. ಏರ್ ಷೋ ನಡೆಯುವ ಸ್ಥಳದಲ್ಲಂತೂ ಮತ್ತಷ್ಟು ಬಿಗು. ಈ ಪರಿಸ್ಥಿತಿಯಲ್ಲೇ, ಹಲವಾರು ರಾಷ್ಟ್ರಗಳ ವಿಮಾನಗಳ ಪ್ರದರ್ಶನ ಗಮನ ಸೆಳೆದು, ನೆರೆದ ಸಾವಿರಾರು ಜನರನ್ನು ರೋಮಾಂಚನ ಗೊಳಿಸಿದವು. ಚೀನಾದ 15 ವಿಮಾನಗಳು ಮತ್ತು ಸಿಂಗಾಪುರದ ಪಾಲ್ಗೊಳ್ಳುವಿಕೆ ನಡೆದದ್ದು ವಿಶೇಷವೇ ಸರಿ. ರಸ್ತೆ, ಮಾಲ್, ಅಂಗಡಿ, ಹೋಟೆಲ್ಗಳಲ್ಲಿ ಜನಸಂದಣಿಯು, ಮಾಸ್ಕ್ಧಾರಣೆಯೊಂದಿಗೆ ಕಂಡುಬಂದರೂ ಹೆಚ್ಚೇನೂ ಭಯದ ವಾತಾವರಣ ಕಂಡುಬರಲಿಲ್ಲ. ಆದರೆ, ಫೆಬ್ರವರಿ 16ರ ನಂತರ ಚೀನಾ, ಸಿಂಗಾಪುರ ಸೇರಿ ಹಲವು ರಾಷ್ಟ್ರಗಳಲ್ಲಿ ಮತ್ತೆ ಕರೊನಾ ವೈರಸ್ ಭೀತಿ ಮರುಕಳಿಸಿದ್ದು ಸತ್ಯ. ಅದೇನಿದ್ದರೂ, ಬಂದ ಸಂದರ್ಭವನ್ನು ಧೃತಿಗೆಡದೆ ಎದುರಿಸುವ ವಿಶ್ವಾಸವನ್ನು ಸರ್ಕಾರ ಮತ್ತು ಜನರು ಒಟ್ಟಾಗಿ ತೋರುವುದು ಮುಖ್ಯ. ಈ ನಿಟ್ಟಿನಲ್ಲಿ ಸಿಂಗಾಪುರ ತೋರಿದ ಸ್ಪೂರ್ತಿ ಮಾದರಿಯೇ ಸರಿ.
