ಸ್ವಲ್ಪ ಹಿಂದಕ್ಕೆ ಹೋಗೋಣ. ಅದು 2014 ಮೇ ನಲ್ಲಿ ನರೇಂದ್ರ ಮೋದಿ ಪ್ರಧಾನಿ ಆಗಿ ಪ್ರಮಾಣವಚನ ಸ್ವೀಕರಿಸಿದ ಸಂದರ್ಭ. ದೇಶಾದ್ಯಂತ ಸಂಭ್ರಮದ ವಾತಾವರಣ ನೆಲೆಸಿತ್ತು. ಅನಂತಕುಮಾರ್ 2 ಲಕ್ಷಕ್ಕೂ ಅಧಿಕ ಮತಗಳ ಅಂತರದಿಂದ ಬೆಂಗಳೂರು ದಕ್ಷಿಣ ಕ್ಷೇತ್ರದಿಂದ ಆರನೇ ಬಾರಿಗೆ ಸಂಸದರಾಗಿ ಲೋಕಸಭೆ ಪ್ರವೇಶಿಸಿದ್ದರು. ಮೋದಿ ಪ್ರಧಾನಿಯಾದ ದಿನವೇ ಅನಂತಕುಮಾರ್ ಕ್ಯಾಬಿನೆಟ್ ಸಚಿವರಾಗಿ ಪ್ರಮಾಣವಚನ ಸ್ವೀಕರಿಸಿದರು. ಅಟಲ್ ಬಿಹಾರಿ ವಾಜಪೇಯಿ ಸಂಪುಟದಲ್ಲಿ ವಿಮಾನಯಾನ ಸಚಿವರಾಗಿದ್ದ ಅನಂತಕುಮಾರ್ ಈ ಹೊಸ ಖಾತೆಯ ಬಗ್ಗೆ ಏನು ಹೇಳುತ್ತಾರೆ ಎಂಬ ಕುತೂಹಲ ತುಂಬ ಜನರಲ್ಲಿತ್ತು. ಹಾಗಾಗಿ, ಅದೇ ದಿನ ಅವರು ಪತ್ರಿಕಾಗೋಷ್ಠಿ ಉದ್ದೇಶಿಸಿ ಮಾತನಾಡಿದರು. ರಾಸಾಯನಿಕ ಗೊಬ್ಬರ ಖಾತೆ ಅಡಿಯಲ್ಲೇ ಪ್ಲಾಸ್ಟಿಕ್ಗೆ ಸಂಬಂಧಿಸಿದ ನೀತಿನಿರೂಪಣೆಯೂ ಸೇರಿಕೊಂಡಿತ್ತು. ‘ಎಲ್ಲ ರೈತರಿಗೂ ಯೂರಿಯಾ ಸಿಗುವಂತೆ ಮಾಡಲಾಗುವುದು, ನಮ್ಮಲ್ಲೇ ಹೆಚ್ಚೆಚ್ಚು ಉತ್ಪಾದಿಸಲು ಉತ್ತೇಜನ ನೀಡಲಾಗುವುದು’ ಎಂದೆಲ್ಲ ವಿವರಿಸಿದ ಬಳಿಕ ಸಂಸ್ಕೃತ ಶ್ಲೋಕ ವೊಂದನ್ನು ಉಲ್ಲೇಖ ಮಾಡಿ, ಅದನ್ನು ಇಂದಿನ ಸ್ಥಿತಿಗೆ ಅನ್ವಯಿಸುತ್ತ ‘ಅಣುರೇಣು ತೃಣಕಾಷ್ಟದಲ್ಲೂ ಇಂದು ಪ್ಲಾಸ್ಟಿಕ್ ಇದೆ. ಅದು ನಮಗೆ ವರದಾನ. ಪ್ಲಾಸ್ಟಿಕ್ ಎಂದು ಮೂಗು ಮುರಿಯಬೇಡಿ’ ಎಂದರು. ಆ ಮಾತು ಕೇಳುತ್ತಿದ್ದಂತೆ ಅಲ್ಲೇ ಕೊನೆ ಸಾಲಿನಲ್ಲಿ ಕುಳಿತಿದ್ದ ನಾನೂ ಅಚ್ಚರಿಗೊಳಗಾದೆ. ಏಕೆಂದರೆ, ಆಗಲೇ (2014) ಬೆಂಗಳೂರಿನಲ್ಲಿ ನಾವು ಪ್ಲಾಸ್ಟಿಕ್ ವಿರುದ್ಧ ನಡೆಸುತ್ತಿದ್ದ ಆಂದೋಲನ ಹತ್ತು ವರ್ಷಗಳನ್ನು ಪೂರೈಸಿತ್ತು. ‘ಅದಮ್ಯ ಚೇತನ’ದ ಅನ್ನಪೂರ್ಣ ಅಡಿಗೆಮನೆಯನ್ನು ಶೂನ್ಯತ್ಯಾಜ್ಯ ವಾಗಿ ಪರಿವರ್ತಿಸಿ, ಪ್ಲಾಸ್ಟಿಕ್ ಬಳಕೆಯನ್ನು ಆದಷ್ಟು ಕಡಿಮೆ ಮಾಡಲಾಗಿತ್ತು. ಹೀಗಿರುವಾಗ ಅನಂತಕುಮಾರ್ ಹೀಗೇಕೆ ಹೇಳುತ್ತಿದ್ದಾರೆ ಎಂದು ಯೋಚಿಸಿದೆ. ಅವರೇ ಮುಂದುವರಿದು, ‘ನಮ್ಮ ಸ್ಯಾಟ್ಲೈಟ್ಗಳಿಗೆ, ಅದರ ಬಿಡಿ ಭಾಗಗಳಿಗೆ, ಬಸ್, ರೈಲುಗಳಲ್ಲಿ, ಔಷಧ ತಯಾರಿಕೆ, ಕೃಷಿ ಉಪಕರಣ, ಮಕ್ಕಳ ಆಟಿಕೆ ತಯಾರಿಕೆಗೂ ಪ್ಲಾಸ್ಟಿಕ್ ಅಗತ್ಯವಾಗಿದೆ. ಅಷ್ಟೇ ಏಕೆ ಹೃದಯದ ರಕ್ತನಾಳಕ್ಕೆ ಅಳವಡಿಸುವ ಜೀವರಕ್ಷಕ ಸ್ಟಂಟ್ ಕೂಡ ಪ್ಲಾಸ್ಟಿಕ್ನಿಂದ ಮಾಡಿರುವಂಥದ್ದು’ ಎಂದರು.
