ಲೆಕ್ಕಾಚಾರ ಸರಿ, ಆದರೆ: ನನ್ನ ಶಿಷ್ಯ ಸೂರ್ಯ ಕ್ರೂಸ್ ಶಿಪ್ಗಳಲ್ಲಿ ಮ್ಯಾಜಿಕ್ ಶೋಗಳನ್ನು ಮಾಡಿ ಚೆನ್ನಾಗಿ ದುಡ್ಡು ಸಂಪಾದಿಸಿ ವಾಪಸ್ ಬಂದ. ಬಂದವನೇ ಒಂದು ಸೂಪರ್ ಐಡಿಯಾ, ಲಕ್ಷಗಟ್ಟಲೆ ದುಡ್ಡು ಮಾಡಬಹುದೆಂದು ಹೇಳಿದ-‘ಅಮೆಜಾನ್ಗೆ 10 ಕೋಟಿ ಸಬ್ಸ್ಕೈ›ಬರ್ಸ್ ಇದ್ದಾರೆ, ಇದರಲ್ಲಿ ಒಂದು ಪರ್ಸೆಂಟ್ ಜನ ಆದ್ರೂ ನಮ್ಮ ಮ್ಯಾಜಿಕ್ ಕಿಟ್ ತಗೊಂಡ್ರೆ ಒಂದಕ್ಕೆ ನೂರು ರೂಪಾಯಿ ಲಾಭ ಸಿಕ್ಕಿದ್ರೂ ಕೋಟಿ ಮಾಡ್ಬಹುದು’ ಅಂದ. ಲೆಕ್ಕಾಚಾರ ಏನೋ ಸರಿಯಾಗಿಯೇ ಇತ್ತು. ಅದು ಹರೋಗರ ಜಾತ್ರೆಯ ನನ್ನ ಅನುಭವವನ್ನು ನೆನಪಿಸಿತು. ಶಿವಮೊಗ್ಗದ ಗುಡ್ಡೇಕಲ್ಲಿನಲ್ಲಿ ಪ್ರತಿವರ್ಷ ಹರೋಗರ ಜಾತ್ರೆ ನಡೀತದೆ. ನನಗಾಗ ಹದಿನೈದನೇ ವಯಸ್ಸು. ಮ್ಯಾಜಿಕ್ ಶೋಗಳನ್ನು ಪ್ರಾರಂಭಿಸಿದ್ದೆ ಅಷ್ಟೆ. ಆಗ ನಮ್ಮೂರಲ್ಲಿ ಅಚ್ಯುತ ರಾವ್ ಅನ್ನೋ ಟೇಲರ್ ಇದ್ರು. ಅವರು ಒಂದಿನ ‘ಅಲ್ಲಿ ಇಲ್ಲಿ ಶೋ ಮಾಡ್ತಾ ಯಾಕೋ ಒದ್ದಾಡ್ತೀಯಾ? ಮಾಡಿದ್ರೆ ಹರೋಗರ ಜಾತ್ರೆಯಲ್ಲಿ ಮಾಡ್ಬೇಕು, ಲಕ್ಷಗಟ್ಟಲೆ ಸಂಪಾದಿಸ್ಬಹುದು’ ಅಂದ್ರು. ನಾನು ಆಸೆಗಣ್ಣಿಂದ ಅವರನ್ನೇ ನೋಡಿದೆ. ‘ನೋಡಪ್ಪಾ, ಜಾತ್ರೆ ದಿನ ಒಂದು ಲಕ್ಷವಾದ್ರೂ ಜನ ಬರ್ತಾರೆ. ಟಿಕೆಟ್ಗೆ ಐದು ರೂಪಾಯಿ ಇಟ್ರೂನೂ ಐದು ಲಕ್ಷ ಆಯ್ತು, ಬೇಡಾ ಐವತ್ತು ಸಾವಿರ ಜನಾ ಅಂತ್ಲೇ ಅಂದ್ಕೊಳ್ಳೋಣ, ಆಗ್ಲೂ ಎರಡೂವರೆ ಲಕ್ಷ ಆಯ್ತು, ಬೇಡಪ್ಪ, ಬರೇ ಹತ್ತು ಪರ್ಸೆಂಟ್ ಜನಾನೇ ಬಂದ್ರೂ ಐವತ್ತು ಸಾವಿರ ಸಿಗುತ್ತಲ್ಲಾ?’ ಅಂದಾಗ ಮನಸ್ಸು ಒಪ್ಪಿತು. ‘ಬೆಳಗ್ಗೆ ಸಿಕ್ಕಾಪಟ್ಟೆ ಜನಸಂದಣಿ ಇರುತ್ತೆ. ವೆಹಿಕಲ್ ತಗೊಂಡು ಹೋಗೊಕ್ಕೆ ಆಗೋಲ್ಲಾ. ಅದಕ್ಕೆ ರಾತ್ರೀನೇ ಹೋಗಿ ಟೆಂಟ್ ಹಾಕ್ಬೇಕು. ಟಿಕೆಟ್ ಕೊಡೋದಕ್ಕೆ ನಾನೂ ಬರ್ತೀನಿ’ ಎಂದೂ ಸೇರಿಸಿದರು. ರಾತ್ರಿನೇ ನನ್ನ ಗಿಟಾರಿಸ್ಟ್ ಪ್ರೇಮ್ುಮಾರ್, ಡ್ರಮ್ಮರ್ ಪಡಿಯಾರ್, ಮೈಕ್ ಕಾಮತ್ ಹಾಗೂ ನನ್ನ ತಮ್ಮ ಚಿದ್ದುವಿನೊಡನೆ ಹೋಗಿ ಟೆಂಟ್ ಹಾಕಿ ಸೊಳ್ಳೆಗಳೊಂದಿಗೆ ಮಲಗಿದ್ವಿ. ನಿದ್ರೆ ಇಲ್ಲದೇ ರಾತ್ರಿ ಕಳೆದು, ಬೇಗ ಎದ್ದು ಬ್ಯಾನರ್ ಕಟ್ಟಿ ಮೈಕಲ್ಲಿ ಪ್ರಚಾರಾನೂ ಶುರು ಮಾಡಿದ್ವಿ. ಟೆಂಟ್ ಹೊರಗೆ ಎತ್ತರದಲ್ಲಿ ಸ್ಟೇಜಿನ ಮೇಲೆ ಮ್ಯಾಜಿಕ್ ತೋರಿಸ್ತಾ ನಿಂತ್ಕೊಂಡೆ. ಗಂಟೆ ಹತ್ತಾಯ್ತು, ಹನ್ನೆರಡಾಯ್ತು, ಗಲ್ಲಕ್ಕೆ ತ್ರಿಶೂಲ ಚುಚ್ಚಿಕೊಂಡ ಕೆಲವರು ಮೈಮೇಲೆ ದೇವರು ಬಂದಂತೆ ಹರೋಗರಾ ಹರೋಗರಾ ಎಂದು ನರ್ತಿಸುತ್ತಿದ್ದರೆ ಇನ್ನು ಕೆಲವರು ಅವರನ್ನು ಹಿಡಿದುಕೊಂಡು ದೇವಸ್ಥಾನದ ಕಡೆಗೆ ಹೋಗ್ತಾ ಇದ್ರು. ನಾವು ನಿರಾಶೆಯಿಂದ ಹ್ಯಾಪ್ ಮೋರೆ ಹಾಕ್ಕೊಂಡು ಕೂತಿದ್ವಿ. ಅಚ್ಯುತ ರಾಯರು ‘ಇವ್ರಿಗೆ ರೇಟು ಸ್ವಲ್ಪ ಜಾಸ್ತಿ ಆಯ್ತೇನೋ ಅನ್ಸುತ್ತೆ’ ಅಂದ್ರು. ರೇಟು ಇಳಿಸುತ್ತಾ ಕೊನೆಗೆ 5 ರೂಪಾಯಿಂದ 50 ಪೈಸೆಗೆ ಬಂದು ತಲುಪಿದೆ. ಸಂಜೆ ಆಗ್ತಾ ಬಂತು. ಊಹೂಂ ಬೋಣಿನೇ ಆಗಲಿಲ್ಲ. ಕೊನೆಗೆ ಅಂಗಡಿ ಹಾಕಿದವರಿಗಾಗಿ ಒಂದು ಶೋ ಉಚಿತವಾಗಿ ಮಾಡಿದೆ. ಅತ್ತ ಅಚ್ಯುತ ರಾಯರು ಮಾಯವಾಗಿದ್ದರು! ಯಾರಾದ್ರೂ ಅಂಕಿ-ಅಂಶಗಳ ಮೇಲೆ ಲಾಭದ ಲೆಕ್ಕ ಹಾಕಿದ್ರೆ ಅದೆಲ್ಲ ಕೈಗೂಡುತ್ತೆ ಅಂತ ಅಂದ್ಕೋಬೇಡಿ. ಅಂಥ ಲೆಕ್ಕಕ್ಕೆ ನಾವು ‘ಅಚ್ಯುತ್ ರಾವ್ ಲೆಕ್ಕ’ ಅಂತ ಹೆಸರಿಟ್ಟಿದ್ದೀವಿ.
