ಭಾರತವನ್ನು ಸ್ವಾವಲಂಬಿಯಾಗಿಸುವ ಚರ್ಚೆ ಇತ್ತೀಚಿನ ದಿನಗಳಲ್ಲಿ ಗರಿಗೆದರಿದೆ. ಪ್ರಮುಖ ಕ್ಷೇತ್ರಗಳಲ್ಲಿ ವಿದೇಶಗಳ ಮೇಲಿನ ಅವಲಂಬನೆಯನ್ನು ತಪ್ಪಿಸುವ ಜತೆಗೆ, ಇಲ್ಲಿನ ಪಾರಂಪರಿಕ ಗೃಹಉದ್ಯೋಗ ಸೇರಿ, ಹಲವಾರು ವಲಯಗಳನ್ನು ಸಬಲೀಕರಣಗೊಳಿಸುವುದು ಇದರ ಉದ್ದೇಶ. ಪ್ರಧಾನಿ ನರೇಂದ್ರ ಮೋದಿ ಇದಕ್ಕೆ ‘ಆತ್ಮನಿರ್ಭರ ಭಾರತ’ವೆಂದು ಕರೆದು, ಈ ಉದ್ದೇಶಕ್ಕಾಗಿ ಕೆಲಸ ಮಾಡುವ ಶಕ್ತಿಗಳು ಹೆಚ್ಚಬೇಕಿವೆ ಎಂದು ಕರೆ ನೀಡಿದರು. ಅದರ ಪರಿಣಾಮವೂ ಈಗಾಗಲೇ ಹಲವಾರು ಕ್ಷೇತ್ರಗಳಲ್ಲಿ ಸ್ಪಷ್ಟವಾಗಿ ಗೋಚರವಾಗುತ್ತಿದೆ. ಚೀನಾದಿಂದ ಆಮದನ್ನು ತಗ್ಗಿಸುವ ಪ್ರಯತ್ನ ಆರಂಭವಾಗಿದೆ. ರಕ್ಷಣೆ, ಬೃಹತ್, ಮಧ್ಯಮ ಕೈಗಾರಿಕೆಗಳಲ್ಲಿ ದೇಶೀಯತೆಗೆ ಒತ್ತು ನೀಡಲಾಗಿದೆ. ಇಷ್ಟು ಮಾತ್ರವಲ್ಲದೆ, ನಮ್ಮ ಸಂಪ್ರದಾಯಕ್ಕೆ ಅನುರೂಪವಾದ ಚಟುವಟಿಕೆಗಳಿಗೆ ವೃತ್ತಿಪರ ಮತ್ತು ಆರ್ಥಿಕತೆಯ ಸ್ಪರ್ಶ ನೀಡುತ್ತಿರುವುದು ಮಹತ್ವದ ಬೆಳವಣಿಗೆ. ಇದರ ಭಾಗವಾಗಿಯೇ, ಕಳೆದ ಕೆಲ ವರ್ಷಗಳಿಂದ ಚೀನಾದ ಪಟಾಕಿಯನ್ನು, ಆ ದೇಶದ ಇತರ ಉತ್ಪನ್ನಗಳನ್ನು ಬಹಿಷ್ಕರಿಸಲಾಗುತ್ತಿದೆ. ಈ ಪ್ರಯತ್ನ ಜನಾಂದೋಲನದ ಸ್ವರೂಪವೂ ಪಡೆದುಕೊಳ್ಳುತ್ತಿರುವುದು ಉತ್ತಮ ಬೆಳವಣಿಗೆ.
