ಇಷ್ಟೆಲ್ಲದ್ದಕ್ಕೆ ಹಣ ಎಲ್ಲಿಂದ ಬರಬೇಕು? ಹಾಗಾಗಿಯೇ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ದರ ಕಡಿಮೆಯಾದರೂ ತೆರಿಗೆ ಕಡಿತ ಮಾಡಿಲ್ಲ ಎಂಬ ಪ್ರಾಮಾಣಿಕ ಮಾತನ್ನು ಕೇಂದ್ರ ಸರ್ಕಾರ ಹೇಳಿದೆ. ಇಂಧನಕ್ಕೆ ವಿಧಿಸುತ್ತಿರುವ ಸುಮಾರು ಶೇ.60 ತೆರಿಗೆಯಲ್ಲಿ ಶೇ.40 ಕೇಂದ್ರ ಸರ್ಕಾರಕ್ಕೆ, ಶೇ.20 ರಾಜ್ಯ ಸರ್ಕಾರಕ್ಕೆ ಲಭಿಸುತ್ತದೆ ಎಂಬುದು ಮೇಲ್ನೋಟಕ್ಕೆ ಕಾಣುತ್ತದೆ. ಇದೇ ಕಾರಣಕ್ಕೆ ಅನೇಕರು ಕೇಂದ್ರ ಸರ್ಕಾರ ತೆರಿಗೆ ಕಡಿತ ಮಾಡುತ್ತಿಲ್ಲ ಎಂದು ಆಪಾದಿಸುತ್ತಾರೆ. ಆದರೆ ಹಣಕಾಸು ಆಯೋಗದ ಶಿಫಾರಸಿನ ಮೇರೆಗೆ, ಇಂಧನ ಸೇರಿ ರಾಜ್ಯಗಳಿಂದ ದೊರೆತ ಎಲ್ಲ ತೆರಿಗೆಯಲ್ಲೂ ಶೇ.42ನ್ನು ರಾಜ್ಯಗಳಿಗೆ ಕೇಂದ್ರ ಸರ್ಕಾರ ಹಿಂದಿರುಗಿಸುತ್ತದೆ. ಉದಾಹರಣೆಗೆ 100 ರೂ. ಪೆಟ್ರೋಲ್ ದರದಲ್ಲಿ ಮೂಲ ದರ 40 ರೂ. ಇದ್ದರೆ, ಉಳಿದ 60 ರೂ. ತೆರಿಗೆ. ಇದರಲ್ಲಿ 20 ರೂ. ರಾಜ್ಯಕ್ಕೆ, 40 ರೂ. ಕೇಂದ್ರಕ್ಕೆ ಹಂಚಿಕೆಯಾಗುತ್ತದೆ. ನಂತರ ಕೇಂದ್ರದ 40 ರೂ.ನಲ್ಲಿ ಶೇ. 42 ಅಂದರೆ 16.8 ರೂ. ಮತ್ತೆ ರಾಜ್ಯಕ್ಕೆ ಸಲ್ಲಿಕೆಯಾಗುತ್ತದೆ. ಅಂದರೆ ರಾಜ್ಯಕ್ಕೆ ಒಟ್ಟು 36.8 ರೂ., ಕೇಂದ್ರಕ್ಕೆ 23.2 ರೂ. ಲಭಿಸುತ್ತದೆ. ಇದರ ಜತೆಗೆ, ಗ್ರಾಮ ಪಂಚಾಯಿತಿಗಳಿಗೆ ಕೇಂದ್ರ ನೇರವಾಗಿ ಹಣ ಹಂಚಿಕೆ ಮಾಡುತ್ತದೆ. ಹಾಗೆಂದು ರಾಜ್ಯ ಸರ್ಕಾರಗಳು ತೆರಿಗೆ ಕಡಿಮೆ ಮಾಡಲಿ ಎಂದಲ್ಲ, ಬದಲಿಗೆ ಆರೋಪ ಮಾಡುವವರು ಸರಿಯಾದ ಮಾಹಿತಿಯಿಲ್ಲದೆ ಮಾತನಾಡುತ್ತಿದ್ದಾರೆ ಎಂಬುದಕ್ಕಾಗಿ ತಿಳಿಸಿದ್ದೇನೆ.
ಕಾಂಗ್ರೆಸ್ ನಾಯಕರು ತಮ್ಮ ಹಾಗೂ ತಮ್ಮಜತೆಗಿನ ಮೈತ್ರಿ ಸರ್ಕಾರವಿರುವ ಮಹಾರಾಷ್ಟ್ರ, ರಾಜಸ್ಥಾನ ಮುಂತಾದ ರಾಜ್ಯಗಳಲ್ಲಿ ಏಕೆ ಇಂಧನ ತೆರಿಗೆ ಕಡಿತ ಮಾಡುತ್ತಿಲ್ಲ? ಕರೊನಾ ಲಾಕ್ಡೌನ್ನಿಂದಾಗಿ ಕೈಗಾರಿಕೆಗಳು ಬಂದ್ ಆಗಿರುವ ಕಾರಣ ಆದಾಯದ ಮೂಲಗಳು ಕುಸಿದಿದ್ದು, ಕರೊನಾ ಕಾರಣಕ್ಕೆ ಆರೋಗ್ಯ ಕ್ಷೇತ್ರದ ಮೇಲಿನ ವೆಚ್ಚ ಹೆಚ್ಚಿದೆ. ಈ ಕಾರಣದಿಂದಾಗಿ ರಾಜ್ಯ ಸರ್ಕಾರಗಳೂ ಇಂಧನ ತೆರಿಗೆ ಇಳಿಸುವ ಸ್ಥಿತಿಯಲ್ಲಿಲ್ಲ. ಇಲ್ಲಿ ಆ ಪಕ್ಷ ಈ ಪಕ್ಷ ಎಂದು ದೂರುವ ಸಮಯವಲ್ಲ. ನಿಜಸ್ಥಿತಿಯನ್ನು ಅರ್ಥಮಾಡಿಕೊಳ್ಳಬೇಕು.
ಇದೀಗ ಸರ್ಕಾರದ ಮುಂದೆ ಇನ್ನೊಂದು ಸವಾಲಿದೆ. ದೇಶದ ಕೈಗಾರಿಕಾ ೇತ್ರ ಸ್ತಬ್ಧವಾಗಿರುವುದರಿಂದ ಕಾರ್ಮಿಕರಿಗೆ ಉದ್ಯೋಗಗಳಿಲ್ಲದಂತಾಗಿದೆ. ಹೂಡಿಕೆ ಮಾಡುವವರ ಕೈ ಬರಿದಾಗಿರುವುದರಿಂದ ಆರ್ಥಿಕ ಚಟುವಟಿಕೆ ಕರೊನಾ ಲಾಕ್ಡೌನ್ ತೆರವಿನ ನಂತರವೂ ಗರಿಗೆದರುವುದು ಅನುಮಾನ. ಈ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರವೇ ಹೂಡಿಕೆದಾರನ ಪಾತ್ರ ವಹಿಸಬೇಕಾಗುತ್ತದೆ. ಬೃಹತ್ ಪ್ರಮಾಣದಲ್ಲಿ ನರೇಗಾ ಯೋಜನೆ ಮೂಲಕ ಉದ್ಯೋಗ ಸೃಷ್ಟಿಗೆ ಹಣ ವ್ಯಯಿಸಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ರಸ್ತೆ ಸೇರಿ ಮೂಲಸೌಕರ್ಯ ನಿರ್ಮಾಣಕ್ಕೆ ಹೆಚ್ಚಿನ ಹಣ ವ್ಯಯಿಸಲು, ಇಂಧನದಿಂದ ಲಭಿಸಿದ ಹಣವನ್ನು ಕಾಪಾಡಲಾಗುತ್ತಿದೆ. ಈ ಹೂಡಿಕೆಯಿಂದ ದೇಶದಲ್ಲಿ ಮತ್ತೆ ಆರ್ಥಿಕ ಚಟುವಟಿಕೆ ಆರಂಭವಾಗಿ, ಉದ್ಯೋಗ ಸೃಷ್ಟಿಯಾಗುತ್ತದೆ. ಹೀಗೆ ಮಾಡುವುದು ಒಳಿತೋ? ಕಾಂಗ್ರೆಸ್ ರೀತಿಯಲ್ಲಿ ತೈಲ ಬಾಂಡ್ ತಂದು ದೇಶವನ್ನು ಸಾಲಗಾರವಾಗಿಸುವುದು ಒಳಿತೋ?
ಇಷ್ಟೆಲ್ಲ ಹಣವನ್ನು ಕೇಂದ್ರ ಸರ್ಕಾರ ಸಂಗ್ರಹಿಸುತ್ತಿದೆ. ಅದನ್ನು ಹೇಗೆ ಬಳಸುತ್ತಿದೆ ಎಂಬುದನ್ನು ವೀಸಲು ಕಾಂಗ್ರೆಸ್ ಸೇರಿ ಎಲ್ಲ ಪ್ರತಿಪಕ್ಷಗಳಿಗೂ ಅವಕಾಶ ಇದ್ದೇ ಇದೆಯಲ್ಲ? ಕಳೆದ ಏಳು ವರ್ಷದಲ್ಲಿ ಒಂದೂ ಭ್ರಷ್ಟಾಚಾರದ ಕಳಂಕವಿಲ್ಲದೆ ಕೇಂದ್ರ ಸರ್ಕಾರ ನಡೆಯುತ್ತಿದೆ. ಹಾಗೊಂದು ವೇಳೆ ಭ್ರಷ್ಟಾಚಾರ ನಡೆಯುತ್ತಿದೆ ಎಂದು ಪ್ರತಿಪಕ್ಷಗಳಿಗೆ ಕಂಡುಬಂದರೆ ಪ್ರಶ್ನಿಸಲು ಸಂಸತ್ ಇದೆ, ಸಾರ್ವಜನಿಕ ವೇದಿಕೆಗಳಿವೆ, ಮಾಧ್ಯಮಗಳಿವೆ. ಸೂಕ್ತ ರೀತಿಯಲ್ಲಿ ಕೆಲಸ ಕಾರ್ಯಗಳು ಸಾಗಲು ಪ್ರತಿಪಕ್ಷಗಳು ಸಹಕರಿಸಬೇಕು; ಏನಾದರೂ ತೊಂದರೆಯಾದರೆ ಅದರ ಪರಿಹಾರಕ್ಕಾಗಿ ತಮ್ಮ ಸಹಭಾಗಿತ್ವ, ಸಲಹೆ ನೀಡಬೇಕು. ಅದನ್ನು ಬಿಟ್ಟು, ಪೆಟ್ರೋಲ್, ಡೀಸೆಲ್ ಹೆಸರಿನಲ್ಲಿ ಸಮಾಜದಲ್ಲಿ ಬೆಂಕಿ ಹಚ್ಚಿ ಅದರಿಂದ ಮೈ ಕಾಯಿಸಿಕೊಳ್ಳುವ ಹಂತಕ್ಕೆ ಇಳಿಯಬಾರದು. ಏಕೆಂದರೆ ಜನರ ಅಂಗೈಯಲ್ಲೆ ಇಂದು ದತ್ತಾಂಶ, ಮಾಹಿತಿಗಳು ಸಿಗುವ ಮಾಹಿತಿ ತಂತ್ರಜ್ಞಾನ ಯುಗ. ನಿಮ್ಮ ಮಾತುಗಳಲ್ಲಿನ ಟೊಳ್ಳುತನ ಜನರಿಗೆ ನಾಳೆ ಗೊತ್ತಾದರೆ, ಇಂದು ಬೇರೆಯವರ ಮನೆಗೆ ಹಚ್ಚಿದ ಬೆಂಕಿ ನಾಳೆ ನಿಮ್ಮನ್ನೇ ಸುಡುತ್ತದೆ ಎಂಬ ಎಚ್ಚರಿಕೆ ಇರಲಿ.
(ಲೇಖಕರು ಬಿಎಂಟಿಸಿ ಉಪಾಧ್ಯಕ್ಷರು)
