ಸಂಶಯಗೊಂಡ ಡಿವೈಎಸ್ಪಿ ಹರಿದಾಸ್ ಮಾರನೆಯ ದಿನವೇ ಪೊಲೀಸ್ ಠಾಣೆಗೆ ಬರಲು ಪಿಳ್ಳೈಗೆ ಸೂಚಿಸಿದರು. ಆತ ಠಾಣೆಗೆ ಬಂದಾಗ ಅವನನ್ನು ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಲಾಯಿತು. ಆತನ ಹಣೆ, ಮೂಗು, ಎರಡೂ ಕೈಗಳು, ಬಲ ಬೆರಳುಗಳು, ಬಲಗಾಲು, ತೊಡೆ ಮುಂತಾದ ಜಾಗಗಳಲ್ಲಿ ಎರಡನೆಯ ಪ್ರಮಾಣದ ಸುಟ್ಟ ಗಾಯಗಳು ಇರುವುದಾಗಿ ವೈದ್ಯರು ವರದಿ ಮಾಡಿದರು. ಇಷ್ಟು ವ್ಯಾಪಕವಾಗಿ ಸುಟ್ಟ ಗಾಯಗಳು ನಿನಗೆ ಹೇಗಾದವು ಎಂದು ಪೊಲೀಸರು ತೀವ್ರರೀತಿಯಲ್ಲಿ ಪ್ರಶ್ನಿಸಿದಾಗ ತಾನೇ ಕಾರಿಗೆ ಬೆಂಕಿ ಹಚ್ಚಿದ್ದಾಗಿಯೂ ಆ ಸಮಯದಲ್ಲಿ ತನಗೆ ಸುಟ್ಟಗಾಯಗಳಾದವೆಂದೂ ಪಿಳ್ಳೈ ಒಪ್ಪಿಕೊಂಡ. ಮೃತವ್ಯಕ್ತಿ ತನ್ನ ಷಡ್ಡಕ ಸುಕುಮಾರನ್ ಅಲ್ಲವೆಂದು ಆತ ಹೇಳಿದಾಗ ತನಿಖಾಧಿಕಾರಿ ಗಾಬರಿಯಾಗಿ ಹಾಗಾದರೆ ಆತ ಯಾರು ಎಂದು ಪ್ರಶ್ನಿಸಿದರು. ಆತ ಯಾರೆಂಬುದು ತನಗೆ ತಿಳಿದಿಲ್ಲ ಎಂದ ಪಿಳ್ಳೈ, ‘ಸುಕುಮಾರನ್ನ ಸಹೋದ್ಯೋಗಿ ಸಾಹುವಿನ ಜತೆ ಸೇರಿ ನಾವೆಲ್ಲರೂ ಈ ಕೊಲೆ ಮಾಡಿದ್ದೇವೆ, ಕೊಲೆಯ ಸೂತ್ರಧಾರಿ ಸುಕುಮಾರನ್ ಪರಾರಿಯಾಗಿದ್ದಾನೆ, ಸಾಹು ಇಂದೋ ನಾಳೆಯೋ ಅಬುಧಾಬಿಗೆ ವಾಪಸಾಗುತ್ತಾನೆ’ ಎಂದ. ಪಿಳ್ಳೈ ಯನ್ನು ಕೂಡಲೇ ಬಂಧಿಸಿ ಸುಕುಮಾರನ್ ಪತ್ತೆಗಾಗಿ ಪೊಲೀಸರನ್ನು ಕಳಿಸಲಾಯಿತು.
