ಏತನ್ಮಧ್ಯೆ ಆಶಾ ತನ್ನ ಮನೆಯಲ್ಲಿಯೇ ಇಂತಹ ಒಂದು ಶಿಶುವನ್ನು ಸಾಕುತ್ತಿರುವುದಾಗಿ ಹೇಳಿದಳು. ತಾನು ಮತ್ತು ತನ್ನ ಸಹಚರರು ಅಲ್ಲಿಯವರೆಗೆ 16 ಶಿಶುಗಳನ್ನು ಮಾರಾಟ ಮಾಡಿರುವುದಾಗಿ ಆಶಾ ತಿಳಿಸಿದಳು. ಆ ಶಿಶುಗಳನ್ನು ಬೆಂಗಳೂರು, ಮಂಗಳೂರು, ಮಡಿಕೇರಿ, ಮೈಸೂರು, ಶಿವಮೊಗ್ಗವಲ್ಲದೆ ಕೇರಳ ರಾಜ್ಯ ಮತ್ತು ಅಮೆರಿಕಗಳಿಗೂ ಮಾರಾಟ ಮಾಡಿರುವುದಾಗಿ ತಿಳಿಯಿತು. ಪೊಲೀಸರಿಗೆ ಬಂದ ಮುಂದಿನ ಸವಾಲೆಂದರೆ ಮಾರಾಟವಾಗಿದ್ದ ಶಿಶುಗಳನ್ನು ಅವುಗಳ ಪಾಲಕರಿಂದ ವಶಪಡಿಸಿಕೊಳ್ಳುವುದು. ಕೆಲವು ಪಾಲಕರು ಆ ಮಕ್ಕಳನ್ನು ತಮ್ಮದೆಂದೇ ಹಲವಾರು ವರ್ಷಗಳ ಕಾಲ ಪ್ರೀತಿಯಿಂದ ಸಾಕಿ ಸಲಹಿದ್ದರು. ಅವರು ಶಿಶು ತಮ್ಮಿಂದ ಅಗಲುವುದನ್ನು ಸಹಿಸುತ್ತಿರಲಿಲ್ಲ. ಅವರೊಂದಿಗೆ ಸಂವೇದನಾಶೀಲರಾಗಿ ವ್ಯವಹರಿಸಿ ಆ ಮಕ್ಕಳನ್ನು ಮರಳಿ ಪಡೆಯಲಾಯಿತು.
