ಮಾಜಿ ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿ ಅವರು ರಾಜಕೀಯದ ಜತೆ ಕೃಷಿಸಂಬಂಧಿ ವಿಚಾರಗಳನ್ನೂ ಆಗೀಗ ಮುನ್ನೆಲೆಗೆ ತರುತ್ತಿರುತ್ತಾರೆ. ಸದ್ಯ ಬಿಡದಿ ಸನಿಹದ ಕೇತಗಾನಹಳ್ಳಿಯ ತಮ್ಮ ತೋಟದ ಮನೆಯಲ್ಲಿ ವಾಸ್ತವ್ಯ ಹೂಡಿರುವ ಅವರು, ಕೃಷಿಯಲ್ಲೂ ತೊಡಗಿಸಿಕೊಂಡಿರುವುದಾಗಿ ಹೇಳಿದ್ದಾರೆ. ಅಷ್ಟೇ ಅಲ್ಲ, ಇಸ್ರೇಲ್ ಕೃಷಿಯ ಪ್ರಯೋಗವನ್ನೂ ನಡೆಸುತ್ತಿರುವುದಾಗಿ ತಿಳಿಸಿದ್ದಾರೆ. ಇದು ಎಷ್ಟರಮಟ್ಟಿಗೆ ಯಶಸ್ವಿಯಾಗುತ್ತದೆಂಬುದನ್ನು ಕಾದುನೋಡಬೇಕಷ್ಟೆ. ಕುಮಾರಸ್ವಾಮಿ ಮಾತ್ರ ಎಂದಲ್ಲ, ಅನೇಕ ಸಂದರ್ಭಗಳಲ್ಲಿ ನಮ್ಮಲ್ಲಿ ಇಸ್ರೇಲ್ ಕೃಷಿ ವಿಷಯ ಪ್ರಸ್ತಾಪ ಆಗುತ್ತಿರುತ್ತದೆ. ನಮ್ಮಲ್ಲಿನ ರೈತರನ್ನು ಅಲ್ಲಿಗೆ ಅಧ್ಯಯನಕ್ಕಾಗಿ ಕರೆದೊಯ್ಯಲಾಗುತ್ತದೆ. ಕೇವಲ ಒಂದು ಕೋಟಿಯಷ್ಟು ಜನಸಂಖ್ಯೆ ಹೊಂದಿರುವ, 20-22 ಸಾವಿರ ಚದರ ಕಿಲೋಮೀಟರ್ ವಿಸ್ತೀರ್ಣ ಉಳ್ಳ ಇಸ್ರೇಲ್, ಕೃಷಿ ವಿಷಯದಲ್ಲಿ ಇಷ್ಟೆಲ್ಲ ಗಮನಸೆಳೆಯುವುದಾದರೂ ಏಕೆ? ಕಾರಣ ಸರಳ. ‘ಅನಿವಾರ್ಯತೆಯು ಅನ್ವೇಷಣೆಗಳ ತಾಯಿ’ ಎಂಬ ಮಾತಿದೆ. ಜನರಿಗೆ ತಮಗೆ ಯಾವುದು ಕೊರತೆ ಅನಿಸುತ್ತದೆಯೋ ಅದನ್ನು ಪರಿಹರಿಸಿಕೊಳ್ಳಲು ಹೊಸ ಹೊಸ ಆವಿಷ್ಕಾರಗಳತ್ತ ಚಿತ್ತ ನೆಡುತ್ತಾರೆ. ಇಸ್ರೇಲ್ಗೆ ಆದದ್ದೂ ಹೀಗೇ. ಮರಳುಗಾಡು ಪ್ರದೇಶವಾದ ಅಲ್ಲಿ ಜಲಪ್ರದೇಶದ ಪ್ರಮಾಣ ಕೇವಲ ಶೇ.2.7ರಷ್ಟು ಇದೆ. ಇದಲ್ಲದೆ, ಜೋರ್ಡಾನ್ ನದಿಯೊಂದೇ ನೀರಿನ ಆಸರೆ. ಈ ನದಿ ಇಸ್ರೇಲ್, ಲೆಬನಾನ್ ಮತ್ತು ಸಿರಿಯಾ ಗಡಿಭಾಗದಲ್ಲಿ ಉಗಮಿಸುತ್ತದೆ. ಈ ಮೂರು ದೇಶಗಳಲ್ಲದೆ ಜೋರ್ಡಾನ್ ಕೂಡ ಈ ನದಿಯನ್ನು ಅವಲಂಬಿಸಿರುವುದರಿಂದ ಈ ನಾಲ್ಕು ದೇಶಗಳ ನಡುವೆ ಜಲಜಗಳ ಇದ್ದಿದ್ದೇ. ಆದ್ದರಿಂದ, ಕಡಿಮೆ ನೀರಿನಲ್ಲಿ ಕೃಷಿ ಮಾಡುವ ಅನಿವಾರ್ಯತೆ ಇಸ್ರೇಲಿಗಿದೆ. ಹೀಗಾಗಿಯೇ ಕೃಷಿಯಲ್ಲಿ ಸಂಶೋಧನೆಗಳು ನಡೆದು, ಹೊಸಹೊಸ ವಿಧಾನಗಳು ಪ್ರಚಲಿತಕ್ಕೆ ಬಂದಿದ್ದು. ಅಧಿಕ ಬೆಳೆ ನೀಡುವ ತಳಿಗಳನ್ನು ಕೂಡ ಅಲ್ಲಿ ಸಂಶೋಧಿಸಲಾಯಿತು. ಉದಾಹರಣೆಗೆ- ಟೊಮೆಟೊ ಗಿಡದಲ್ಲಿ ಎಲೆಗಳಿಗಿಂತ ಹೆಚ್ಚು ಒತ್ತಾಗಿ ಕಾಯಿಗಳು ಬಿಡುವಂಥ ತಳಿಗಳೂ ಇವೆ. ಹಾಗಂತ ಭಾರತವೇನು ಕೃಷಿಯಲ್ಲಿ ಹಿಂದಿಲ್ಲ. ಇಲ್ಲಿಯೂ ಅಭಿವೃದ್ಧಿಯಾಗಿದೆ; ಪ್ರಗತಿಪರ, ಅನ್ವೇಷಕ ಮನೋಭಾವದ ರೈತರು ನಮ್ಮಲ್ಲೂ ಬೇಕಷ್ಟು ಇದ್ದಾರೆ. ಆದರೆ ಇಸ್ರೇಲಿನಂತೆ ನಮ್ಮಲ್ಲಿ ಸಹ ಒಣಭೂಮಿ ಸಾಕಷ್ಟು ಪ್ರಮಾಣದಲ್ಲಿ ಇರುವುದರಿಂದಾಗಿ, ಕಡಿಮೆ ನೀರು ಬಳಸಿ ಕೃಷಿ ಮಾಡುವುದು ಲಾಭದಾಯಕವಾಗುತ್ತದೆ. ಅದೂ ಅಲ್ಲದೆ, ಕಡಿಮೆ ಜಾಗದಲ್ಲಿ ಹೆಚ್ಚು ಬೆಳೆ ತೆಗೆಯುವ ಪದ್ಧತಿ ರೂಢಿಸಿಕೊಂಡರೆ, ದೊಡ್ಡ ಜನಸಂಖ್ಯೆಗೆ ಆಹಾರ ನೀಡಲು ಸಹ ಅನುಕೂಲವಾಗುತ್ತದೆ.
