ಇಂದಿನ ದಿನಗಳಲ್ಲಿ ಮದುವೆ ಕಾರ್ಯಕ್ರಮವಿರಲಿ, ಗೃಹಪ್ರವೇಶ ಇರಲಿ ಆರ್ಥಿಕ ಸ್ಥಿತಿ ಉತ್ತಮವಿದ್ದರೆ ಎಲ್ಲವೂ ಸಾಂಗವಾಗಿ ನೆರವೇರುತ್ತದೆ. ಮದುವೆ ಮನೆಯಲ್ಲಿ ಶಾಮಿಯಾನದವರು ಶಾಮಿಯಾನ, ಕುರ್ಚಿ, ಅಲಂಕಾರ ಮಾಡಿ ಹೋಗುತ್ತಾರೆ. ಅಡುಗೆಯವರು ಫಲಾಹಾರ, ಊಟ ಬಡಿಸುತ್ತಾರೆ. ಬಂಧುಗಳು, ಗೆಳೆಯರೂ ಅಷ್ಟೇ. ಧಾರಾ ಮುಹೂರ್ತದ ಸಮಯಕ್ಕೆ ಬಂದು ಮದುಮಕ್ಕಳನ್ನು ಆರ್ಶೀವದಿಸಿ, ಊಟ ಮಾಡಿ ತೆರಳುತ್ತಾರೆ. ಒಂದೇ ದಿನದಲ್ಲಿ ಎಲ್ಲವೂ ನಡೆಯುತ್ತದೆ. ಆದರೆ, ಈಗ ಹತ್ತು ಹದಿನೈದು ವರುಷಗಳ ಹಿಂದೆ ಮದುವೆಯೆಂದರೆ 2-3 ತಿಂಗಳಿನಿಂದ ಪ್ರಾರಂಭವಾಗುತ್ತಿತ್ತು. ಚಪ್ಪರ ಹಾಕುವುದು, ಅಡುಗೆ ಸಿದ್ಧತೆ, ಆಮಂತ್ರಣ ಹೀಗೆ ವ್ಯವಸ್ಥೆಗಳಿದ್ದರೆ ನೆಂಟರಿಷ್ಟರು ಒಂದು ವಾರ ಮೊದಲೇ ಬಂದು, ಕಣ್ಣಿಗೆ ತೋಚುವ ಕೆಲಸವನ್ನೆಲ್ಲ ತಮ್ಮ ಮನೆಯ ಕಾರ್ಯಕ್ರಮದಂತೆ ನಿಂತು ಮಾಡುವ ಕಾಲವಿತ್ತು.
