ಕನ್ನಡ, ತೆಲುಗು, ತಮಿಳು, ಮರಾಠಿ ಹಾಗೂ ಸಂಸ್ಕೃತದಲ್ಲಿ ಪ್ರೌಢಿಮೆ ಗಳಿಸಿದ್ದರಿಂದ ದೇಶದ ಎಲ್ಲ ಮೂಲೆಗಳಿಂದ ಬರುವ ಭಕ್ತರ ಸಮಸ್ಯೆಗಳನ್ನು ಕೇಳಿ ಮಾರ್ಗದರ್ಶನ ನೀಡುತ್ತಿದ್ದರು. ಶಾರದೆ ಮತ್ತು ನರಸಿಂಹ ದೇವರ ಧ್ಯಾನದಲ್ಲಿ ಕಾಲ ಕಳೆಯುತ್ತಿದ್ದರು. ಒಮ್ಮೆ ಜಗದ್ಗುರುಗಳು ತಮ್ಮ ಕಿರಿಯ ಶಿಷ್ಯರೊಂದಿಗೆ ಮದುರೈನ ಪ್ರಸಿದ್ಧ ಮೀನಾಕ್ಷೀ ದೇವಾಲಯಕ್ಕೆ ಹೋಗಿದ್ದರು. ಒಂದು ದಿನ ಕಿರಿಯ ಶಿಷ್ಯರು ದೇವಾಲಯದ ಗರ್ಭಗುಡಿಯಲ್ಲಿರುವ ದೇವಿಗೆ ಪೂಜೆ ಮಾಡಬೇಕೆಂದು ಒಳಗೆ ಪ್ರವೇಶ ಮಾಡಲು ಬಯಸಿದರು. ಆದರೆ ಅರ್ಚಕರು ಒಳಗಡೆ ಬಿಡಲಿಲ್ಲ. ಜಗದ್ಗುರುಗಳು ದೇವಾಲಯಕ್ಕೆ ಹೋಗಿ ಎರಡು ತೆಂಗಿನಕಾಯಿ ತರಲು ಹೇಳಿ, ಕೆಲವು ಮಂತ್ರಗಳನ್ನು ಉಚ್ಚರಿಸಿದರು. ದೇವಿ ಮೀನಾಕ್ಷಿಯ ಶಕ್ತಿಯನ್ನು ತೆಂಗಿನಕಾಯಿಗಳಲ್ಲಿ ಆವಾಹನೆ ಮಾಡಿ ಅಲ್ಲಿದ್ದ ಸಾವಿರಾರು ಭಕ್ತರಿಗೆ ತಾವು ದೇವಿಯನ್ನು ತಮ್ಮ ಮಠಕ್ಕೆ ಕರೆದುಕೊಂಡು ಹೋಗುತ್ತಿರುವುದಾಗಿ ಹೇಳಿದರು.
