ತಿರುಪತಿ ಲಡ್ಡುಗೆ 311 ವರ್ಷ

ಆಂಧ್ರಪ್ರದೇಶ: ಶ್ರೀ ವೆಂಕಟೇಶ್ವರ ಸ್ವಾಮಿ ದೇವಾಲಯವು ಜಗತ್ತಿನ ಅತ್ಯಂತ ಪ್ರಸಿದ್ಧ ಮತ್ತು ಹೆಚ್ಚು ಭಕ್ತರು ಭೇಟಿ ನೀಡುವ ಪುಣ್ಯಕ್ಷೇತ್ರಗಳಲ್ಲಿ ಒಂದಾಗಿದೆ. ಸುದೀರ್ಘ ಇತಿಹಾಸವನ್ನು ಹೊಂದಿರುವ ತಿರುಮಲ ದೇವಾಲಯವು, ದರ್ಶನದ ನಂತರ ಭಕ್ತರಿಗೆ ಪ್ರಸಾದವಾಗಿ ನೀಡಲಾಗುವ ಐಕಾನಿಕ್ ‘ತಿರುಪತಿ ಲಡ್ಡು’ವಿಗೆ ಜಗತ್ಪ್ರಸಿದ್ಧವಾಗಿದೆ. ಈ ಲಡ್ಡು ಪ್ರಸಾದ 311 ವರ್ಷಗಳ ಸುದೀರ್ಘ ಪರಂಪರೆಯನ್ನು ಪೂರೈಸಿದ್ದು, ಈ ಕುರಿತಾದ ವಿವರ ಇಲ್ಲಿದೆ.

ಜಗತ್ತಿನ ಶ್ರೀಮಂತ ದೇವಾಲಯಗಳ ಪೈಕಿ ಒಂದಾಗಿರುವ ಆಂಧ್ರಪ್ರದೇಶದಲ್ಲಿರುವ ತಿರುಪತಿ ವೆಂಕಟರಮಣ (ಬಾಲಾಜಿ) ಸನ್ನಿಧಿಗೆ ಭೇಟಿ ನೀಡುವವರ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಲೇ ಇದೆ. ವರ್ಷದ ಯಾವುದೇ ದಿನಗಳಲ್ಲಿ ಹೋದರೂ ಜನಸಂದಣಿ. ಅದರಲ್ಲೂ, ಹಬ್ಬ-ಹರಿದಿನ, ಏಕಾದಶಿಯ ಸಮಯದಲ್ಲಿ ಭಕ್ತರ ಪ್ರವಾಹವೇ ಹರಿದುಬರುತ್ತದೆ. ದರ್ಶನಕ್ಕೆ ಸುವ್ಯವಸ್ಥಿತ ಸರತಿಸಾಲು ಸೇರಿದಂತೆ ವಿವಿಧ ವ್ಯವಸ್ಥೆಗಳನ್ನು ಒದಗಿಸಲಾಗಿದೆ. ಕರ್ನಾಟಕದ ಬಹುತೇಕ ಎಲ್ಲ ಜಿಲ್ಲೆಗಳಿಂದಲೂ ಜನರು ದೊಡ್ಡಸಂಖ್ಯೆಯಲ್ಲಿ ತಿರುಪತಿಗೆ ಭೇಟಿ ನೀಡುತ್ತಾರೆ.

ತಿರುಪತಿ ವೆಂಕಟರಮಣ ಬಹಳಷ್ಟು ಕುಟುಂಬಗಳಿಗೆ ಮನೆದೇವರು, ಇಷ್ಟದೇವರು ಆಗಿರುವುದರಿಂದ, ವರ್ಷಕ್ಕೊಮ್ಮೆಯಾದರೂ ತಿರುಪತಿಗೆ ಭೇಟಿ ನೀಡಿ ದರ್ಶನ ಪಡೆಯುವ ಸಂಪ್ರದಾಯವನ್ನು ಅಸಂಖ್ಯ ಕುಟುಂಬಗಳು ಚಾಚೂ ತಪ್ಪದೆ ಪಾಲಿಸುತ್ತಿವೆ. ಹೀಗೆ ತಿರುಪತಿಯಲ್ಲಿ ದರ್ಶನದ ಬಳಿಕ, ಅಲ್ಲಿನ ಪ್ರಸಿದ್ಧ ಹಾಗೂ ಸ್ವಾದಿಷ್ಟಕರ ಲಡ್ಡುಪ್ರಸಾದವನ್ನು ಮನೆಗೆ ತಂದು, ಅದನ್ನು ಬಂಧುಮಿತ್ರರಿಗೆ ಹಂಚಿ, ಸಾರ್ಥಕತೆ ಪಡೆದುಕೊಳ್ಳುವ ಭಾವವೇ ಅನನ್ಯ.

ಈ ತಿರುಪತಿ ಲಡ್ಡುಗೆ, ಅದರ ಜತೆ ಬೆಸೆದುಕೊಂಡಿರುವ ಭಕ್ತಿಯ ದಿವ್ಯ ಪರಂಪರೆಗೆ ನೂರಾರು ವರ್ಷಗಳ ಸುದೀರ್ಘ ಇತಿಹಾಸವಿದೆ. ಹೌದು, ದೇವಾಲಯದ ಭಕ್ತರಿಗೆ ಸಿಗುವ ‘ಶ್ರೀವಾರಿ ಲಡ್ಡು ಪ್ರಸಾದ’ಕ್ಕೆ ಆಗಸ್ಟ್ 2ರಂದು 311 ವರ್ಷಗಳು ಪೂರ್ಣಗೊಂಡಿವೆ. ಮೂರು ಶತಮಾನಗಳು ಕಳೆದರೂ ಲಡ್ಡುವಿನ ರುಚಿ ಮಾತ್ರ ಹಾಗೇ ಇದೆ. 1715ರ ಆಗಸ್ಟ್ 2ರಂದು ಮೊದಲ ಬಾರಿಗೆ ಹಳೆಯ ಪೋಟು(ಅಡುಗೆಮನೆ)ನಲ್ಲಿ ದಪ್ಪ ಬೂಂದಿಯ ಮೊದಲ ಲಡ್ಡುವನ್ನು ತಯಾರಿಸಿ ದೇವರಿಗೆ ನೈವೇದ್ಯ ರೂಪದಲ್ಲಿ ಅರ್ಪಿಸಲಾಗಿತ್ತು. ಆ ಸಮಯದಲ್ಲಿ 21 ದಿನಗಳ ಸಿದ್ಧತೆ ಮತ್ತು ಯೋಜನೆಯ ನಂತರ ಈ ಪವಿತ್ರ ಲಡ್ಡುವನ್ನು ತಯಾರಿಸಲಾಗಿತ್ತು. ಆದರೆ ಇಂದು ಎಐ ಆಧಾರಿತ ಯಂತ್ರಗಳು ಶ್ರೀವಾರಿ ಲಡ್ಡೂವಿನ ಕಚ್ಚಾ ಪದಾರ್ಥಗಳಲ್ಲಿನ ಕಲಬೆರಕೆಯನ್ನು ಪತ್ತೆ ಹಚ್ಚಿ, ಪ್ರಸಾದದ ಪಾವಿತ್ರ್ಯ ಕಾಪಾಡಲು ನೆರವಾಗುತ್ತಿವೆ.

ತಿರುಪತಿಯಲ್ಲಿ 311 ವರ್ಷಗಳ ಹಿಂದೆ ಪ್ರಮುಖವಾಗಿ ನಾಲ್ಕು ಪ್ರಕಾರದ ಲಡ್ಡುಗಳನ್ನು ತಯಾರಿಸಲಾಗುತ್ತಿತ್ತು. ತಿರುಪೋ›ಣಂ, ಅಪ್ಪಮಮ್ ಮನೋಹರಮ್ ಮತ್ತು ವಡಾ. ನಾಲ್ಕೂ ಪ್ರಕಾರದ ಲಡ್ಡುಗಳಿಗೂ ತನ್ನದೇ ಆದ ಮಹತ್ವವಿತ್ತು. ಇವುಗಳನ್ನು ಸೌದೆ ಉರಿಯ ಒಲೆಯ ಮೇಲೆ ಬಿಸಿ ಮಾಡಿ ಕಡಲೆಹಿಟ್ಟು ಮತ್ತು ಬೂಂದಿಯಿಂದ 50 ಅಡುಗೆಯವರು ತಯಾರಿಸುತ್ತಿದ್ದರು. ಹೆಚ್ಚಿನ ಕೆಲಸ ಕೈಯಿಂದಲೇ ನಡೆಯುತ್ತಿತ್ತು. ಆ ಸಮಯದಲ್ಲಿ ದಿನಕ್ಕೆ 2ರಿಂದ 3 ಸಾವಿರ ಲಡ್ಡುಗಳು ತಯಾರಾಗುತ್ತಿದ್ದವು. ಈ ಪದ್ಧತಿ 1984ರವರೆಗೆ ನಡೆಯಿತು. ಆನಂತರ ಗ್ಯಾಸ್ ಬಳಕೆ ಪ್ರಾರಂಭವಾದಾಗ ಲಡ್ಡುಗಳ ಸಂಖ್ಯೆ ಹಲವು ಪಟ್ಟು ಹೆಚ್ಚಾಯಿತು. ಭಕ್ತರ ಸಂಖ್ಯೆಯೂ ಸತತವಾಗಿ ಏರಿಕೆಯಾದ ಕಾರಣ, 1996ರ ನಂತರ ಪ್ರತಿದಿನ ಒಂದು ಲಕ್ಷಕ್ಕೂ ಹೆಚ್ಚು ಲಡ್ಡುಗಳನ್ನು ತಯಾರಿಸಲು ಪ್ರಾರಂಭಿಸಲಾಯಿತು. ಪ್ರಸ್ತುತ ಪ್ರತಿದಿನ ದೇವಾಲಯದಲ್ಲಿ ಸರಾಸರಿ 4ರಿಂದ 6 

ಲಕ್ಷ ಲಡ್ಡುಗಳನ್ನು ತಯಾರಿಸಲಾಗುತ್ತಿದೆ. ಬ್ರಹ್ಮೋತ್ಸವ ಮತ್ತು ವಿಶೇಷ ಹಬ್ಬಗಳ ಸಂದರ್ಭದಲ್ಲಿ ಈ ಸಂಖ್ಯೆ 8ರಿಂದ 10 ಲಕ್ಷಕ್ಕೆ ಏರುತ್ತದೆ.

ಬಾಲಾಜಿ ಅಥವಾ ಶ್ರೀನಿವಾಸ ಎಂದೂ ಕರೆಯಲ್ಪಡುವ ಶ್ರೀ ವೆಂಕಟೇಶ್ವರ ಸ್ವಾಮಿಯು 5,000 ವರ್ಷಗಳ ಹಿಂದೆ ತಿರುಮಲವನ್ನು ತನ್ನ ಆವಾಸಸ್ಥಾನವನ್ನಾಗಿ ಮಾಡಿಕೊಂಡನು ಎಂಬ ಐತಿಹ್ಯಗಳಿವೆ. ಹಲವು ತಲೆಮಾರುಗಳಿಂದ ವಿವಿಧ ಪ್ರದೇಶಗಳ ಭಕ್ತರು ಈ ಭವ್ಯ ದೇವಾಲಯದ ನಿರ್ಮಾಣ ಮತ್ತು ವಿಸ್ತರಣೆಗೆ ಕೊಡುಗೆ ನೀಡಿದ್ದಾರೆ. ಪ್ರಸ್ತುತ ಈ ದೇವಾಲಯದ ಸಂಕೀರ್ಣವು 16.2 ಎಕರೆ ಪ್ರದೇಶದಲ್ಲಿ ಹರಡಿಕೊಂಡಿದೆ. ಶೇಷಾಚಲಂ ಬೆಟ್ಟಗಳ ಏಳನೇ ಶಿಖರದಲ್ಲಿರುವ ಈ ದೇವಾಲಯವನ್ನು ‘ಏಳು ಬೆಟ್ಟಗಳ ಒಡೆಯನ ದೇವಾಲಯ’ (ಏಳುಕೊಂಡಲವಾಡ) ಎಂದು ಪ್ರೀತಿಯಿಂದ ಕರೆಯಲಾಗುತ್ತದೆ. ಇದು ಸಮುದ್ರ ಮಟ್ಟದಿಂದ 853 ಮೀಟರ್ ಎತ್ತರದಲ್ಲಿದೆ. ಈ ಏಳು ಬೆಟ್ಟಗಳು ಹಿಂದೂ ಪೌರಾಣಿಕ ನಂಬಿಕೆಯ ಪ್ರಕಾರ ಆದಿಶೇಷನ (ಪವಿತ್ರ ಸರ್ಪ) ಏಳು ಹೆಡೆಗಳನ್ನು ಪ್ರತಿನಿಧಿಸುತ್ತವೆ.

ದೇವಾಲಯದ ವಾಸ್ತುಶಿಲ್ಪವು ದ್ರಾವಿಡ ಶೈಲಿಯಲ್ಲಿದ್ದು, ‘ಆನಂದ ನಿಲಯಂ’ ಎಂದು ಕರೆಯಲ್ಪಡುವ ಗರ್ಭಗುಡಿಯೊಳಗೆ ಪ್ರಧಾನ ದೇವತೆಯು ನಿಂತಿರುವ ಭಂಗಿಯಲ್ಲಿದೆ. ಭಾರತದಾದ್ಯಂತ ಹರಡಿರುವ ಎಂಟು ವಿಷ್ಣು ಸ್ವಯಂಭೂ ಕ್ಷೇತ್ರಗಳಲ್ಲಿ ಒಂದಾಗಿರುವ ಈ ದೇವಾಲಯವು ವೈಷ್ಣವ ಸಂಪ್ರದಾಯದ ಅನುಯಾಯಿಗಳಿಗೆ ಪಾವಿತ್ರ್ಯದ ಸಂಕೇತ. ತಿರುಮಲ ವೆಂಕಟೇಶ್ವರ ದೇವಾಲಯದ ಆಡಳಿತವನ್ನು ‘ತಿರುಮಲ ತಿರುಪತಿ ದೇವಸ್ಥಾನಂ’ (ಟಿಟಿಡಿ) ನಿರ್ವಹಿಸುತ್ತದೆ. ಇದು ದೇವಾಲಯದ ದೈನಂದಿನ ಕಾರ್ಯಚಟುವಟಿಕೆಗಳು ಮತ್ತು ಆಡಳಿತವನ್ನು ನೋಡಿಕೊಳ್ಳುವ ಸ್ವಾಯತ್ತ ಮಂಡಳಿಯಾಗಿದೆ. 

ದೇವಾಲಯದ ಹಣಕಾಸು, ಆಸ್ತಿಗಳು ಮತ್ತು ಚಟುವಟಿಕೆಗಳ ಉಸ್ತುವಾರಿ ವಹಿಸಲು 1933ರಲ್ಲಿ ಮದ್ರಾಸ್ ಪ್ರೆಸಿಡೆನ್ಸಿ (ಈಗಿನ ತಮಿಳುನಾಡು ರಾಜ್ಯ) ಟಿಟಿಡಿಯನ್ನು ರಚಿಸಿತು. ಇಂದು, ಟಿಟಿಡಿಯನ್ನು ಆಂಧ್ರಪ್ರದೇಶ ರಾಜ್ಯ ಸರ್ಕಾರದಿಂದ ನೇಮಕಗೊಳ್ಳುವ ಧರ್ಮದರ್ಶಿ ಮಂಡಳಿ (ಟ್ರಸ್ಟಿಗಳ ಮಂಡಳಿ) ನಡೆಸುತ್ತಿದೆ. ಟಿಟಿಡಿಯ ಮುಖ್ಯ ಆಡಳಿತಾಧಿಕಾರಿಯಾಗಿರುವ ಕಾರ್ಯನಿರ್ವಹಣಾಧಿಕಾರಿ ಅವರು ಜಂಟಿ ಕಾರ್ಯನಿರ್ವಹಣಾ ಧಿಕಾರಿಗಳು, ಮುಖ್ಯ ಕಾವಲು ಮತ್ತು ಭದ್ರತಾಧಿಕಾರಿ, ಹಣಕಾಸು ಸಲಹೆಗಾರರು, ಅರಣ್ಯ ಸಂರಕ್ಷಣಾಧಿಕಾರಿ ಹಾಗೂ ಮುಖ್ಯ ಇಂಜಿನಿಯರ್ ಒಳಗೊಂಡ ತಂಡದ ನೆರವಿನೊಂದಿಗೆ ದೇವಾಲಯದ ಕಾರ್ಯಚಟುವಟಿಕೆಗಳನ್ನು ನಿರ್ವಹಿಸುತ್ತಾರೆ.

ಲಡ್ಡು ತಯಾರಿಸುವಾಗ ಎಲ್ಲ ಅಡುಗೆಯವರೂ ಏಕಕಂಠದಿಂದ ಮಂತ್ರವನ್ನು ಜಪಿಸುತ್ತಾರೆ. ‘ಪೋಟು’ನಲ್ಲಿ (ದೇವಾಲಯದ ಅಡುಗೆಮನೆ) 250ರಿಂದ 270 ಮುಖ್ಯ ಮತ್ತು ಕುಶಲ ಅಡುಗೆಯವರಿದ್ದಾರೆ. ಇವರನ್ನು ಪಾರಂಪರಿಕವಾಗಿ ‘ಪರಿಚಾರಕರು’ ಎಂದು ಕರೆಯಲಾಗುತ್ತದೆ. ಇವರು ಮುಖ್ಯವಾಗಿ ಸಾಮಗ್ರಿಗಳ ಮಿಶ್ರಣ, ಬೂಂದಿ ಕರಿಯುವುದು ಹಾಗೂ ಪಾವಿತ್ರ್ಯ-ಶುದ್ಧತೆಯನ್ನು ಕಾಯ್ದುಕೊಳ್ಳುವ ಜವಾಬ್ದಾರಿಯನ್ನು ಹೊಂದಿದ್ದಾರೆ. ಇನ್ನುಳಿದ 350ರಿಂದ 400ಕ್ಕೂ ಹೆಚ್ಚು ಸಿಬ್ಬಂದಿ ಸಾಮಗ್ರಿಗಳನ್ನು ಸಾಗಿಸುವುದು, ಬೂಂದಿ ಸೋಸುವುದು, ಲಡ್ಡುಗಳಿಗೆ ಕೈಯಿಂದ ಆಕಾರ ನೀಡುವುದು ಮತ್ತು ಅವುಗಳನ್ನು ಟ್ರೇ ಅಥವಾ ಕನ್ವೇಯರ್ ಬೆಲ್ಟ್​ಗೆ ಲೋಡ್ ಮಾಡುವ ಕೆಲಸಗಳನ್ನು ಮಾಡುತ್ತಾರೆ. 

ಲಡ್ಡು ತಯಾರಿಸುವ ಸಮಯದಲ್ಲಿ ಈ ವೈಷ್ಣವ ಬ್ರಾಹ್ಮಣರು ನಿರಂತರವಾಗಿ ‘ಓಂ ನಮೋ ವೆಂಕಟೇಶಾಯ’ ಎಂದು ಜಪಿಸುತ್ತಾರೆ ಅಥವಾ ವಿಷ್ಣು ಸಹಸ್ರನಾಮ ಮತ್ತು ಪವಿತ್ರ ವೈದಿಕ ಸೂಕ್ತಗಳನ್ನು ಪಠಿಸುತ್ತಾರೆ. ದಿನವಿಡೀ 20 ಗಂಟೆಗಳ ಕಾಲ ಲಡ್ಡುಗಳನ್ನು ತಯಾರಿಸಲಾಗುತ್ತದೆ. ಮೂರು ಪ್ರತ್ಯೇಕ ಪಾಳಿಗಳಲ್ಲಿ ನಿಯೋಜನೆಗೊಂಡ ತಂಡಗಳು ಈ ಕಾರ್ಯವನ್ನು ನಿರ್ವಹಿಸುತ್ತವೆ. ಈ ಲಡ್ಡುವನ್ನು ಕಡಲೆಹಿಟ್ಟು, ಸಕ್ಕರೆ, ಹಸುವಿನ ತುಪ್ಪ, ಒಣದ್ರಾಕ್ಷಿ, ಗೋಡಂಬಿ ಮತ್ತು ಏಲಕ್ಕಿಯಂತಹ ಸರಳ ಸಾಮಗ್ರಿಗಳಿಂದ ಸಿದ್ಧಪಡಿಸಲಾಗುತ್ತದೆ. ದೇವಾಲಯದ ಹೊರಗಿನ ಸಂಕೀರ್ಣದಲ್ಲಿರುವ ಪೋಟು ಭಾಗದಲ್ಲಿ ಲಡ್ಡು ತಯಾರಿಕೆ ಪ್ರಾರಂಭವಾಗುತ್ತದೆ. ಮೊದಲಿಗೆ ಕಡಲೆಹಿಟ್ಟಿನ ಮಿಶ್ರಣವನ್ನು ತುಪ್ಪದಲ್ಲಿ ಕರೆದು ಬೂಂದಿ ತಯಾರಿಸಲಾಗುತ್ತದೆ. ನಂತರ ಈ ಬೂಂದಿಯನ್ನು ದೇವಾಲಯದ ‘ಸಂಪಂಗಿ ಪ್ರದಕ್ಷಿಣಂ’ನಲ್ಲಿರುವ ಎರಡನೇ ಪೋಟುಗೆ ಒಯ್ಯಲಾಗುತ್ತದೆ. ಅಲ್ಲಿ ಸಕ್ಕರೆ ಪಾಕ, ತುಪ್ಪ ಮತ್ತು ಇತರ ಸಾಮಗ್ರಿಗಳನ್ನು ಬಳಸಿ ಲಡ್ಡುಗಳನ್ನು ಸಿದ್ಧಪಡಿಸಿ, ಒಣಗಿಸಿ ಭಕ್ತರಿಗೆ ವಿತರಿಸಲಾಗುತ್ತದೆ. 

ಈ ಪ್ರಕ್ರಿಯೆಯನ್ನು ‘ದಿಟ್ಟಂ’ ಎಂದು ಕರೆಯಲಾಗುವ ಬ್ಯಾಚ್​ಗಳಲ್ಲಿ ನಡೆಸಲಾಗುತ್ತದೆ. ಪ್ರತಿಯೊಂದು ಬ್ಯಾಚ್​ನಲ್ಲಿ ಸರಾಸರಿ 5,100 ಲಡ್ಡುಗಳು ತಯಾರಾಗುತ್ತವೆ. ಈ ಲಡ್ಡುಗಳಿಗೆ ಭೌಗೋಳಿಕ ಸೂಚ್ಯಂಕ (ಎಐ ಖಚಜ) ಮಾನ್ಯತೆ ದೊರೆತಿದ್ದು, ಇವುಗಳನ್ನು ತಯಾರಿಸುವ ಮತ್ತು ವಿತರಿಸುವ ಏಕೈಕ ಹಕ್ಕು ತಿರುಮಲ ತಿರುಪತಿ ದೇವಸ್ಥಾನಕ್ಕೆ (ಟಿಟಿಡಿ) ಮಾತ್ರ ಇದೆ. ಇದು ಈ ಪವಿತ್ರ ಪ್ರಸಾದದ ಅನನ್ಯತೆ ಮತ್ತು ಗುಣಮಟ್ಟವನ್ನು ಕಾಯ್ದುಕೊಳ್ಳಲು ನೆರವಾಗಿದೆ. ಲಡ್ಡು ತಯಾರಿಸಲು ಪ್ರತಿದಿನ 10 ಟನ್ ಕಡಲೆ ಹಿಟ್ಟು, 10 ಟನ್ ಸಕ್ಕರೆ, 700 ಕೆಜಿ ಗೋಡಂಬಿ, 150 ಕೆಜಿ ಏಲಕ್ಕಿ, 300-500 ಲೀಟರ್ ತುಪ್ಪ, 500 ಕೆಜಿ ಕಲ್ಲುಸಕ್ಕರೆ ಮತ್ತು 540 ಕೆಜಿ ಒಣದ್ರಾಕ್ಷಿ ಬಳಸಲಾಗುತ್ತದೆ.

1 

ಪ್ರಸಾದ ತಯಾರಿಸುವ ಎರಡು ಸಾವಿರ ಚದರಡಿಯ ಅಡುಗೆ ಮನೆಯಲ್ಲಿ ಇಂದಿಗೂ ವೈದಿಕ ಮಂತ್ರಗಳ ಘೊಷ ಕೇಳಿಬರುತ್ತದೆ ಮತ್ತು ಶುದ್ಧ ದೇಸಿ ತುಪ್ಪದ ಸುವಾಸನೆ ಪಸರಿಸುತ್ತದೆ. ಇಲ್ಲಿ ಇಂದಿಗೂ ಒಲೆಯ ಮೇಲೆ ಕಡಲೆಹಿಟ್ಟನ್ನು ಬಿಸಿ ಮಾಡಿ ಲಡ್ಡು ತಯಾರಿಸಲು ಮಿಶ್ರಣವನ್ನು ಸಿದ್ಧಪಡಿಸಲಾಗುತ್ತದೆ. 25 ಸಿಬ್ಬಂದಿ (ವೈಷ್ಣವ ಬ್ರಾಹ್ಮಣರು) ದೇವರಿಗಾಗಿ ವಿಶೇಷ ಪ್ರಸಾದವನ್ನು ತಯಾರಿಸುತ್ತಾರೆ.

2 

25 ಸಾವಿರ ಚದರ ಅಡಿಯಲ್ಲಿ ನಿರ್ವಿುಸಲಾಗಿರುವ ಮೂರು ಮಹಡಿಯ ಅಡುಗೆಮನೆಯಲ್ಲಿ ಗ್ಯಾಸ್/ಸ್ಟೀಮ್ಂದ ನಡೆಯುವ ಯಂತ್ರಗಳಿದ್ದು, 700 ವೈಷ್ಣವ ಬ್ರಾಹ್ಮಣರು 4ರಿಂದ 6 ಲಕ್ಷ ಲಡ್ಡುಗಳನ್ನು ಪ್ರತಿನಿತ್ಯ ತಯಾರಿಸುತ್ತಾರೆ.

1. ಆಸ್ಥಾನಂ ಲಡ್ಡು: ವಿಶೇಷ ಸಂದರ್ಭಗಳಲ್ಲಿ ಮಾತ್ರ ತಯಾರಿಸಲಾಗುತ್ತದೆ. ಒಂದು ಲಡ್ಡುವಿನ ತೂಕ 750 ಗ್ರಾಂ.ವರೆಗೆ ಇರುತ್ತದೆ.

2. ಕಲ್ಯಾಣೋತ್ಸವ ಲಡ್ಡು: 700 ಗ್ರಾಂ ತೂಕದ ಈ ಪ್ರಸಾದ ಕಲ್ಯಾಣೋತ್ಸವ ಸೇವೆಯಲ್ಲಿ ಪಾಲ್ಗೊಳ್ಳುವ ಭಕ್ತರಿಗೆ ವಿತರಿಸಲಾಗುತ್ತದೆ.

3. ಪೋ›ಕ್ತಂ ಲಡ್ಡು: 175 ಗ್ರಾಂನ ಈ ಪ್ರಸಾದ ಸಾಮಾನ್ಯ ಶ್ರದ್ಧಾಳುಗಳಿಗೆ ನೀಡಲಾಗುತ್ತದೆ.