ಹೀಗೆ ನಮ್ಮೆಲ್ಲರೊಳಗೂ ಅಪ್ಪಟ ಬಂಗಾರದಿಂದ ಹೊಳೆಯುವ ಒಬ್ಬ ಅದ್ಭುತ ಬುದ್ಧನಿದ್ದಾನೆ. ಪ್ರಾಯಶಃ ಹೊರಜಗತ್ತಿನಿಂದ ರಕ್ಷಣೆ ಹೊಂದಲು ಅವನೂ ಭಯ, ಅಹಂಕಾರ, ಸಂಶಯ, ತಪ್ಪಿತಸ್ಥ ಭಾವನೆಗಳೆಂಬ ಜೇಡಿಮಣ್ಣಿನಿಂದ ಮುಚ್ಚಲ್ಪಟ್ಟಿದ್ದಾನೆ. ಋಣಾತ್ಮಕ ಆಲೋಚನೆ ಹಾಗೂ ಸ್ವಾರ್ಥ, ಲೋಭದ ಕಾರಣ ನಮ್ಮೊಳಗಿನ ಬಂಗಾರದ ಬುದ್ಧ ಬಾಹ್ಯಜಗತ್ತಿಗೆ ಪ್ರಕಟವಾಗುವುದೇ ಇಲ್ಲ. ನಮಗೆ ನಾವೇ ಹೇರಿಕೊಂಡಿರುವ ಸೀಮಿತ ಶಕ್ತಿ, ಸಾಮರ್ಥ್ಯಗಳ ಕುರಿತಾದ ನಂಬಿಕೆಗಳಿಂದ ನಮಗರಿವಿಲ್ಲದೇ ನಮ್ಮೊಳಗೆ ನೆಲೆನಿಂತಿರುವ ಬುದ್ಧ ಬಂಧಿಯಾಗಿರುತ್ತಾನೆ. ತನ್ನ ಬಿಡುಗಡೆಗಾಗಿ ಈ ಬಂಗಾರದ ಬುದ್ಧ ಆಗಾಗ್ಗೆ ಮನವಿ, ಬೇಡಿಕೆ ಸಲ್ಲಿಸುವುದನ್ನು ನಾವು ಗುರುತಿಸದೇ ಹೋಗುತ್ತೇವೆ. ಈ ಜಗತ್ತಿನಲ್ಲಿ ಅಸಂಖ್ಯ ಜನ ಸಾಧಾರಣವಾಗಿ ಬಾಳಿ, ಬದುಕಿ ತಮ್ಮೊಳಗೆ ಅಡಗಿರುವ ಮಹಾನ್ ಪ್ರತಿಭೆ, ಸೃಜನಶೀಲತೆ, ಸಕಾರಾತ್ಮಕ ಶಕ್ತಿಗಳನ್ನರಿಯದೆಯೇ, ಒಂದು ದಿನ ಈ ಜಗತ್ತಿನಿಂದ ಕಣ್ಮರೆಯಾಗುತ್ತಾರೆ. ಆ ರೀತಿ ಆಗಬಾರದೆಂದಲ್ಲಿ ಸ್ವಪ್ರಯತ್ನ, ಛಲ, ನಂಬಿಕೆಗಳೆಂಬ ಉಳಿಯ ಪೆಟ್ಟುಗಳು ಬೀಳಬೇಕು. ಸತ್ಯದ ದರ್ಶನ ಆಗಬೇಕು. ಆಗಲೇ, ಜೇಡಿಮಣ್ಣಿನಂತಿರುವ ಹೊರಸ್ವರೂಪ ಕಳಚಿ ಬಿದ್ದು, ಹೃದಯದೊಳಗೆ ಅಡಗಿರುವ ಬಂಗಾರದ ಬುದ್ಧ ಹೊರಜಗತ್ತಿಗೆ ಪ್ರಕಟವಾಗಿ, ಪ್ರಕಾಶಿಸುತ್ತಾನೆ.
