ಕೆನಡಾ ಮೂಲದ ಸಂಸ್ಥೆಯೊಂದರ ಜೊತೆ ಆಳಸಮುದ್ರ ಗಣಿಗಾರಿಕೆಯ ಒಡಂಬಡಿಕೆ ಮಾಡಿಕೊಂಡಿರುವ ನೌರು ಆ ನಿಟ್ಟಿನಲ್ಲಿ ಕಾರ್ಯಪ್ರವೃತ್ತವಾಗಿದೆ. ನೌರು ಸೇರಿದಂತೆ ಹವಾಯಿ, ಕಿರಿಬಾಟಿ, ಮೆಕ್ಸಿಕೋ ಆಸುಪಾಸಿನ ಕ್ಲಾರಿಯಾನ್ ಕ್ಲಿರ್ಪ³ನ್ ಪ್ರದೇಶವೆಂದು ಹೇಳಲಾಗುವ ದಕ್ಷಿಣ ಪೆಸಿಫಿಕ್ ಸಮುದ್ರದ ತಳದಲ್ಲಿ ಪಾಲಿ ಮೆಟಾಲಿಕ್ ನಾಡ್ಯೂಲ್ಸ್, ಅಂದರೆ ವೈವಿಧ್ಯಮಯ ಲೋಹಗಳ ಉಂಡೆಗಳು ಭಾರಿಪ್ರಮಾಣದಲ್ಲಿ ಲಭ್ಯವಿವೆ. ಈ ಉಂಡೆಗಳು ತಯಾರಾಗಿದ್ದು ಸಮುದ್ರದ ನೀರಿನಲ್ಲಿರುವ ಅತ್ಯಲ್ಪ ಪ್ರಮಾಣದಲ್ಲಿರುವ ಖನಿಜಗಳು ಸಮುದ್ರದತಳದಲ್ಲಿ ಕುಳಿತಿರುವ ಕಲ್ಲು, ಚಿಪ್ಪುಗಳ ಮೇಲೆ ಶತಮಾನಗಳಿಂದ ನಿಧಾನವಾಗಿ ಶೇಖರಣೆಯಾಗುವ ಮೂಲಕ. ಸಮುದ್ರದ ಮೇಲ್ಮೈನ ಕೆಳಗೆ ನಾಲ್ಕರಿಂದ ಆರು ಕಿಮೀನಷ್ಟು ಕೆಳಗೆ ತಾಮ್ರ, ನಿಕ್ಕಲ್, ಸೀಸ, ಕೋಬಾಲ್ಟ್ ಮತ್ತು ಮ್ಯಾಂಗನೀಸನ್ನು ಹೇರಳ ಪ್ರಮಾಣದಲ್ಲಿ ಹೊಂದಿರುವ ಈ ಲಾಡುಗಳನ್ನು ಹೊರತೆಗೆಯಲು ನೌರು ತಯಾರಾಗುತ್ತಿದೆ. ಈ ಬೆಳವಣಿಗೆಗಳ ನಡುವೆ ಕೆಲದಿನಗಳ ಹಿಂದೆಯಷ್ಟೆ ಆಳಸಮುದ್ರ ಗಣಿಗಾರಿಕೆಗೆ ತೊಡಕಾಗಿರುವ ಅಂತಾರಾಷ್ಟ್ರೀಯ ನಿಬಂಧನೆಗಳನ್ನು ಸರಳಗೊಳಿಸಿ ಈ ಕ್ಷೇತ್ರವನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ಡೊನಾಲ್ಡ್ ಟ್ರಂಪ್ ಆದೇಶ ಹೊರಡಿಸಿದ್ದಾರೆ. ನಾರ್ವೆ, ಕುಕ್ ದ್ವೀಪಗಳು, ಬ್ರೆಜಿಲ್, ಭಾರತ ಹೀಗೆ ಸಾಗರವನ್ನು ಹೊಂದಿಕೊಂಡಿರುವ ದೇಶಗಳು ಈಗಾಗಲೇ ಆಳಸಮುದ್ರ ಗಣಿಗಾರಿಕೆಗೆ ತಮ್ಮ ಆಸಕ್ತಿ ತೋರಿವೆ.
