ಮೂರು ಮಕ್ಕಳ ತಾಯಿಯಾದರೂ ಅವರ ಮನಸ್ಸು ಬರವಣಿಗೆ ಮೇಲೆಯೇ ನೆಟ್ಟಿತ್ತು. ಓದು ಮತ್ತು ಬರವಣಿಗೆ ಬಗ್ಗೆ ತುಂಬ ತುಡಿತ ಹೊಂದಿದ್ದ ಬಾನುಗೆ ಪತಿ ಮುಷ್ತಾಕ್ ಬೆಂಬಲವಾಗಿ ನಿಂತರು. ಆಗ ಹಿರಿಯ ಪತ್ರಕರ್ತ ಲಂಕೇಶ್ ಅವರ ಸಂಪರ್ಕ ದೊರೆತು, ಅವರ ಅಕ್ಷರ ಲೋಕದ ಪಯಣಕ್ಕೆ ಅದೃಷ್ಟದ ಬಾಗಿಲು ತೆರೆಸಿತು. ಹಾಸನದಿಂದ ಲಂಕೇಶ್ ಪತ್ರಿಕೆಗೆ ಒಂದು ದಶಕ ಕಾಲ ವರದಿಗಾರ್ತಿಯಾಗಿ ಕೆಲಸ ಮಾಡಿದ ಬಾನು ಮುಷ್ತಾಕ್, ಅದರ ಜೊತೆಜೊತೆಗೇ ಕತೆ, ಕವನ ಬರೆಯಲಾರಂಭಿಸಿದರು. ಬಂಡಾಯ ಸಾಹಿತ್ಯ ಅವರ ಬರವಣಿಗೆಗೆ ಮತ್ತೊಂದು ಮೆರುಗು ನೀಡಿತು. ಪ್ರೊ. ಎಂ.ಡಿ. ನಂಜುಂಡಸ್ವಾಮಿ ಅವರ ಸಂಪರ್ಕದ ಮೂಲಕ ರೈತ ಸಂಘಟನೆಯಲ್ಲಿ ಗುರುತಿಸಿಕೊಂಡರು. ಅಷ್ಟೆ ಅಲ್ಲ, ದಲಿತ ಸಂಘಟನೆಯಲ್ಲಿಯೂ ತೊಡಗಿಸಿಕೊಂಡರು. ಇದರಿಂದಾಗಿ ಅವರ ವ್ಯಕ್ತಿತ್ವ ಇನ್ನಷ್ಟು ಮಾಗಲು ಕಾರಣವಾಯಿತು. ವಕೀಲರಾಗಿ ಮಾತ್ರವಲ್ಲ, ಹಾಸನದ ನಗರಸಭೆ ಚುನಾವಣೆಗೆ ಪಕ್ಷೇತರವಾಗಿ ಸ್ಪರ್ಧೆ ಮಾಡಿ ಎರಡು ಬಾರಿ ಸದಸ್ಯರಾಗಿ ಆಯ್ಕೆಯಾಗಿ ಸೇವೆ ಸಲ್ಲಿಸಿದ್ದು ವಿಶೇಷ.
