ಷಡಂಗ ಪಾನೀಯ-ಜ್ವರದಲ್ಲಿ ಅತ್ಯುತ್ತಮವಾದ ಕಷಾಯವಾಗಿದ್ದು ಇದು ದಾಹವನ್ನು ನೀಗಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ದೇಹದಲ್ಲಿ ಅಗ್ನಿ(ಜೀರ್ಣಶಕ್ತಿ) ಬಹು ಮುಖ್ಯ. ಎಲ್ಲ ರೋಗಗಳಿಗೂ ಮಂದಾಗ್ನಿಯೇ ಕಾರಣ. ಹಾಗಾಗಿ ಜೀರ್ಣಶಕ್ತಿಯ ವರ್ಧನೆಗಾಗಿ ಹಸಿಶುಂಠಿಯ ಸೇವನೆ ಅಥವಾ ಶುಂಠಿಚಹಾ, ಪುದೀನಾ ಚಹಾ ಸೇವನೆ ಮಾಡುವುದು ಉತ್ತಮ. ಗೋಮೂತ್ರ ಅತ್ಯುತ್ತಮವಾದ ರೋಗಾಣು ನಾಶಕವಾಗಿದು, ಇದನ್ನು ದಿನಾಲೂ ಬೆಳಗಿನ ಜಾವದಲ್ಲಿ 4-5 ಚಮಚದಷ್ಟು ಸೇವಿಸಬಹುದು. ಒಂದು ಚಮಚ ಚ್ಯವನಪ್ರಾಶವನ್ನು ದಿನವೂ ಸೇವಿಸಬೇಕು. ದಿನವೂ ಅರಿಶಿಣ, ಸ್ವಲ್ಪ ಸೈಂಧವಉಪ್ಪನ್ನು ಬಿಸಿನೀರಿನಲ್ಲಿ ಸೇರಿಸಿ ಬಾಯಿಮುಕ್ಕಳಿಸುವುದರಿಂದ ಹಾಗೂ ಗಂಡೂಷಧಾರಣೆ ಮಾಡುವುದರಿಂದ ರೋಗಾಣು ನಮ್ಮ ಗಂಟಲಿನಿಂದ ಶ್ವಾಸಕೋಶವನ್ನು ಸೇರದಂತೆ ತಡೆಗಟ್ಟಬಹುದು. ಸೀತೋಫಲಾದಿ ಚೂರ್ಣದಲ್ಲಿ ಕಲ್ಲುಸಕ್ಕರೆ, ಏಲಕ್ಕಿ, ಹಿಪ್ಪಲಿ, ದಾಲ್ಚಿನಿ ಮುಂತಾದ ದ್ರವ್ಯಗಳಿದ್ದು ಇದನ್ನು ಅರ್ಧಚಮಚದಷ್ಟು ಬಿಸಿನೀರಿನ ಜತೆ ಅಥವಾ ಜೇನುತುಪ್ಪದ ಜತೆ ದಿನಕ್ಕೆ ನಾಲ್ಕೈದು ಬಾರಿ ಸೇವಿಸುವುದರಿಂದ ನೆಗಡಿ, ಕೆಮ್ಮು, ಶ್ವಾಸದ ತೊಂದರೆಯನ್ನು ನಿವಾರಿಸಬಹುದು. ಮೃತ್ಯುಂಜಯರಸ, ಭಯಂಕರ ಜ್ವರವನ್ನೂ ನಾಶ ಮಾಡಿ ದೇಹವನ್ನು ಸುಸ್ಥಿಯಲ್ಲಿ ಇಡುತ್ತದೆ. ಹಾಗೆಯೇ ಸುದರ್ಶನ ಚೂರ್ಣ, ಸುದರ್ಶನಾರಿಷ್ಟ, ಅಮೃತಾರಿಷ್ಟ ಇವು ಜ್ವರದಲ್ಲಿ ಅಮೃತ ಸಮಾನವಾಗಿವೆ.
