ಮಾನವನಿಂದ ತಿಮಿಂಗಲಗಳ ಶಿಕಾರಿಗೆ ದೊಡ್ಡ ಇತಿಹಾಸವೇ ಇದೆ. ಸುಮಾರು ಸಾವಿರ ವರ್ಷಗಳ ಹಿಂದೆ ಡೆನ್ಮಾರ್ಕಿನ ಭಾಗವಾಗಿರುವ ಗ್ರೀನ್ಲ್ಯಾಂಡ್ ಪ್ರದೇಶದಲ್ಲಿ ವಿಪರೀತ ಚಳಿ ಬೀಳುತ್ತಿದ್ದ ಕಾರಣಕ್ಕೆ ಅಲ್ಲಿ ವಾಸಿಸುತ್ತಿದ್ದ ಎಸ್ಕಿಮೋಗಳನ್ನು ಸೇರಿಸಿದಂತೆ ಸ್ಥಳೀಯರಿಗೆ ಆಹಾರಕ್ಕಾಗಿ ಏನೂ ಬೆಳೆಯುವ ಸಾಧ್ಯತೆಗಳಿರಲಿಲ್ಲ. ಇಂತಹ ಪ್ರತಿಕೂಲ ಪರಿಸ್ಥಿತಿಯಲ್ಲಿ ಅವರುಗಳು ಆಹಾರವಾಗಿ ಕಂಡುಕೊಂಡಿದ್ದು ತಿಮಿಂಗಲಗಳ ಮಾಂಸದ ಅಡುಗೆ. ಸಾಗರದ ಈ ಭಾಗದಲ್ಲಿ ಹೇರಳವಾಗಿ ಸಿಗುತ್ತಿದ್ದ ಈ ಸ್ತನಿಯ ಮಾಂಸದ ರುಚಿ ಕಂಡಿದ್ದೇ ಸೈ ಊಟ, ತಿಂಡಿ ಹೀಗೆ ಎಲ್ಲದಕ್ಕೂ ಅದನ್ನೇ ಬಳಸುವ ಹೊಸ ಟ್ರೆಂಡು ಸ್ಥಳೀಯರಲ್ಲಿ ಆರಂಭವಾಯಿತು. ಕಬ್ಬಿಣಾಂಶ ಮತ್ತು ಪೋ›ಟೀನ್ ಹೊಂದಿರುವ ಮಾಂಸದ ಜೊತೆಗೆ ವಿಟಾಮಿನ್ ಎ, ಸಿ ಮತ್ತು ಡಿಗಳನ್ನು ಭರಪೂರವಾಗಿ ಹೊಂದಿರುವ ಅದರ ಕೊಬ್ಬು ಸಹ ಅವರುಗಳ ತಾಟಿನಲ್ಲಿ ಖಾದ್ಯವಾಗಿ ಜಾಗ ಗಿಟ್ಟಿಸಿಕೊಂಡಿತು. ಇಷ್ಟು ಸಾಲದಕ್ಕೆ ಈ ಕೊಬ್ಬಿನಿಂದ ಮೋಂಬತ್ತಿಗಳನ್ನು ತಯಾರಿಸಬಹುದೆಂದು ಯಾರೋ ಕಂಡುಹಿಡಿದರು. ಮತ್ಯಾರೋ ತಿಮಿಂಗಲಗಳ ಮೂಳೆಗಳಿಂದ ಹಾರೆ ಪಿಕಾಸೆಯಂತಹ ಸಾಧನಗಳ ಜೊತೆಗೆ ಆತ್ಮರಕ್ಷಣೆಯ ಆಯುಧಗಳನ್ನೂ ತಯಾರಿಸಬಹುದೆಂದು ನಿರೂಪಿಸಿದರು.
