ಪಶುಪಾಲನಾ ಇಲಾಖೆಯಲ್ಲಿ ಸಿಬ್ಬಂದಿ ಕೊರತೆಯಿಂದ ಗ್ರಾಮೀಣ ಜಾನುವಾರುಗಳಿಗೆ ಚಿಕಿತ್ಸೆ ಲಭಿಸುತ್ತಿಲ್ಲ. 400 ಪಶು ವೈದ್ಯರನ್ನು ನೇಮಿಸುವುದಾಗಿ ಕಳೆದೆರೆಡು ವರ್ಷದಿಂದ ಭರವಸೆ ನೀಡುತ್ತಿರುವ ಸರ್ಕಾರ ಭರ್ತಿ ಮಾಡುತ್ತಿಲ್ಲ. ಕಳೆದ ಜುಲೈನಲ್ಲಿ ಪಶು ಸಂಗೋಪನಾ ಸಚಿವ ಪ್ರಭು ಚವ್ಹಾಣ್ ಈ ಯೋಜನೆಗೆ ಚಾಲನೆ ನೀಡಿದ್ದಾರೆ. ವಿವಿಧೆಡೆ ಯೋಜನೆ ಜಾಹೀರಾತುಗಳಷ್ಟೇ ಜನರ ಕಣ್ಣಿಗೆ ಕಾಣುತ್ತಿದ್ದು, ಸೇವೆ ದೊರೆಯುತ್ತಿಲ್ಲ. 108 ಮಾದರಿಯಲ್ಲಿ ಕಾಲ್ ಸೆಂಟರ್ ರಚಿಸಿದ್ದು, ಜಾನುವಾರು ತುರ್ತು ಸಂದರ್ಭದಲ್ಲಿ ರೈತರು 1962 ಸಂಖ್ಯೆಗೆ ಕರೆ ಮಾಡಿದಲ್ಲಿ ಅವರು ಇರುವೆಡೆ ಸಂಜೀವಿನಿ ವಾಹನ ತೆರಳಿ ಚಿಕಿತ್ಸೆ ನೀಡಲಿದೆ. ಪ್ರತಿ ವಾಹನದಲ್ಲಿ ಪಶು ವೈದ್ಯ, ಸಹಾಯಕ ಹಾಗೂ ಚಾಲಕ ಇರಬೇಕು. ವಾಹನ ಲೋಕಾರ್ಪಣೆಯಾಗಿ 4 ತಿಂಗಳು ಕಳೆದರೂ ಸಿಬ್ಬಂದಿ ನೇಮವಾಗಿಲ್ಲ.
