ವಿಭೀಷಣ ಹೇಳಿದ ಆ ಮಾತು ಅದು ರಾವಣನಿಗೆ ಮಾತ್ರ ಸಂಬಂಧಿಸಿ ದ್ದಲ್ಲ. ನಮ್ಮ-ನಿಮ್ಮೆಲ್ಲರ ನಿತ್ಯಜೀವನಕ್ಕೆ ಅನ್ವಯಿಸುವಂತಹದ್ದು. ತಿಳಿವಳಿಕೆ ಇಲ್ಲದ ಚಿಕ್ಕವಯಸ್ಸಿನಲ್ಲಿ ಸ್ನೇಹಿತರು, ಪರಿಚಿತರು ಹರಟೆ ಹೊಡೆಯಲು, ಆಟವಾಡಲು ಕರೆಯುತ್ತಾರೆ. ಆಗ ಅವರ ಮಾತು ನಮಗೆ ಸಿಹಿಯಾಗಿ ಕಾಣಿಸುತ್ತದೆ. ಆದರೆ ಪರಿಣಾಮ ಮಾತ್ರ ಅನರ್ಥವೇ. ತಂದೆ-ತಾಯಿಗಳು, ಗುರುಗಳು ಯಾವಾಗಲೂ ಓದುವಂತೆ, ಬರೆಯುವಂತೆ, ದುಶ್ಟಟಗಳಿಗೆ ಬಲಿಯಾಗದಂತೆ, ಕೆಟ್ಟ ಹಾದಿ ತುಳಿಯದಂತೆ ತಿಳಿಹೇಳುತ್ತಾರೆ. ಆಗ ಅವರ ಮಾತು ನಮಗೆ ಕಹಿ ಎನಿಸುತ್ತದೆ. ಆದರೆ ತತ್ಕಾಲದಲ್ಲಿ ಅವರ ಮಾತು ಕಹಿ ಆದರೂ ನಮ್ಮ ಉಜ್ವಲಭವಿಷ್ಯಕ್ಕೆ ಹಿತಕಾರಿ ಯಾಗಿರುತ್ತದೆ. ತಮ್ಮ ಬೇಳೆ ಬೇಯಿಸಿಕೊಳ್ಳುವುದಕ್ಕೆ ನಮಗೆ ಪ್ರಿಯವಾದದ್ದನ್ನು ಮಾತ್ರವೇ ಹೇಳುವವರು ಸರಳವಾಗಿ ಸಿಗುತ್ತಾರೆ. ಆದರೆ ಅಪ್ರಿಯವಾದರೂ ಹಿತವಾದದ್ದನ್ನು ಹೇಳುವವರು ವಿರಳವಾಗಿ ಸಿಗುತ್ತಾರೆ. ಇದು ಕಹಿಸತ್ಯ! ಹಾಗಾಗಿ, ಪ್ರಾಜ್ಞರು, ತಿಳಿದವರು ಹೇಳಿದ ಹಿತವಚನಕ್ಕೆ ಕಿವಿಯಾಗಿ, ಅದನ್ನು ನಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳೋಣ. ಆ ಮೂಲಕ ಸುಪಥದಲ್ಲಿ ಸಾಗೋಣ.
