ಶೀತಲ ಸಮರ ಅಂತ್ಯಗೊಂಡು ಸೋವಿಯತ್ ಯೂನಿಯನ್ ಕುಸಿದಾದ ಮೇಲೆ ಭಾರತ ಗತ್ಯಂತರವಿಲ್ಲದೆ ಅಮೆರಿಕದತ್ತ ತಿರುಗಿತು. ಆದಾಗ್ಯೂ, ಆರ್ಥಿಕ ವಿಷಯಗಳು ಮುಂಚೂಣಿಗೆ ಬಂದು ಅಮೆರಿಕ ಮತ್ತದರ ಮಿತ್ರದೇಶಗಳು ಚೀನಾವನ್ನೇ ಓಲೈಸುವುದು ಮುಂದುವರಿದ ಕಾರಣ ಭಾರತ ಜಾಗತಿಕ ರಾಜಕೀಯ-ಆರ್ಥಿಕ ರಂಗದಲ್ಲಿ ಮುಂಚೂಣಿಗೆ ಬರಲಾಗಲೇ ಇಲ್ಲ. ಮುಂದಿನ ಕಾಲು ಶತಮಾನದಲ್ಲಿ ಜಾಗತಿಕ ಭೂ-ಸಾಮರಿಕ, ಭೂ-ಆರ್ಥಿಕ ವಾಸ್ತವಗಳು ಏರುಪೇರಾಗಿ ಹಿಂದಿನ ಸೋವಿಯತ್ ಯೂನಿಯನ್ನ ಸ್ಥಾನದಲ್ಲಿ ಚೀನಾ ಮಹಾಶಕ್ತಿಯಾಗಿ ಬೆಳೆದು ನಿಂತಿತು, ಹೊಸ ಶೀತಲ ಸಮರ ಆರಂಭವಾಯಿತು. ಅದೃಷ್ಟವಶಾತ್ ಇಂದು ಭಾರತ ಜಾಗತಿಕ ರಾಜಕಾರಣದಲ್ಲಿ ತನ್ನ ಸ್ಥಾನವನ್ನು ಸರಿಯಾಗಿ ಗುರುತಿಸಿಕೊಂಡಿದೆ. ಪರಿಣಾಮವಾಗಿ ಭಾರತದ ಸುರಕ್ಷಾ ಹಿತಾಸಕ್ತಿಗಳು ತಮ್ಮವೂ ಸಹ ಎಂದು ಅಮೆರಿಕ, ಬ್ರಿಟನ್, ಫ್ರಾನ್ಸ್, ಜಪಾನ್, ಆಸ್ಟ್ರೇಲಿಯಾ, ತೈವಾನ್ ಮತ್ತು ಆಗ್ನೇಯ ಏಷ್ಯಾದ ಹಲವಾರು ದೇಶಗಳು ಭಾವಿಸತೊಡಗಿವೆ. ಎಂದೋ ಆಗಬೇಕಾಗಿದ್ದದ್ದು ಇದು.
