ಬೇಟೆ ಹುಡುಕುತ್ತ ಬಂದ ಹುಲಿಯನ್ನೇ ಹೆದರಿಸಿ ಪುನಃ ಕಾಡಿಗೆ ಕಳುಹಿಸಿ ಅಟ್ಟಹಾಸ ಮೆರೆದ ನೀರುನಾಯಿಗಳ ಬಗ್ಗೆ ನೀವು ಕೇಳಿದ್ದೀರಾ? ಚಿರತೆ ತನ್ನನ್ನು ಬೇಟೆ ಆಡಲು ಧಾವಿಸುತ್ತಿದ್ದು ಎಲ್ಲರೂ ಸುರಕ್ಷಿತ ಜಾಗಕ್ಕೆ ತೆರಳುವಂತೆ ವಾಚ್ ಡಾಗ್ ಥರಾ ಮರದ ತುದಿಯಲ್ಲಿ ಅವಿತು ಮುನ್ಸೂಚನೆ ನೀಡುವ ಲಂಗೂರ್ನ ಚಾಣಾಕ್ಷತನವನ್ನು ನೀವೆಂದಾದರೂ ಗಮನಿಸಿದ್ದೀರಾ?
ಇವು ಬಿಬಿಸಿಯೋ, ನ್ಯಾಷನಲ್ ಜಿಯೋಗ್ರಾಫಿಕ್ ಚಾನೆಲ್ಲೋ ಅಥವಾ ಇನ್ಯಾವುದೋ ಅನಿಮೇಷನ್ ಚಿತ್ರದ್ದೋ ದೃಶ್ಯಗಳಲ್ಲ. ನಮ್ಮ ರಾಜ್ಯದ ಅರಣ್ಯದಲ್ಲೇ ಚಿತ್ರೀಕರಣಗೊಂಡ, ಮೈನವಿರೇಳಿಸುವ ರೋಚಕ ದೃಶ್ಯಗಳ ಸರಣಿ. ಆನೆ, ಲಂಗೂರ್, ಆಟರ್ಸ್, ಕರಡಿ, ಹಾರ್ನ್ಬಿಲ್, ಕ್ರಾಬ್ಗಳು, ಚಿರತೆ, ಬ್ಲಾಕ್ ಪ್ಯಾಂಥರ್ಸ್, ನವಿಲು, ಕಾಡು ಬೆಕ್ಕು, ಡ್ರಾಗನ್, ವಿಷಕಾರಿ ಸರ್ಪಗಳು, ನೂರಾರು ಬಗೆಯ ಕಪ್ಪೆಗಳು, ತರಹೇವಾರಿ ಜಲಚರಗಳು ಕಾಣ ಸಿಗುವ ಏಕೈಕ ಪ್ರದೇಶ ನಮ್ಮ ಕರ್ನಾಟಕ. ಅಷ್ಟು ಮಾತ್ರವಲ್ಲದೇ ಜಗತ್ತಿನ ಯಾವ ಮೂಲೆಯಲ್ಲೂ ಸಿಗದಷ್ಟು ಹುಲಿಗಳು ಬೀಡುಬಿಟ್ಟಿರುವ ತಾಣವಿದು. ಇದೇ ಜ. 17ರಂದು ಬಿಡುಗಡೆಯಾಗಿರುವ ವನ್ಯಜೀವಿಗಳ ಜೀವನ ಆಧಾರಿತ 52 ನಿಮಿಷಗಳ ಸಾಕ್ಷ್ಯಚಿತ್ರ ‘ವೈಲ್ಡ್ ಕರ್ನಾಟಕ’ ಕೇವಲ ಪ್ರಾಣಿ ಪ್ರಿಯರ ಗಮನವನ್ನು ಮಾತ್ರವಲ್ಲದೆ ಸಿನಿಪ್ರಿಯರ ಮನಸ್ಸನ್ನೂ ಸೆಳೆದಿದೆ. ರಾಜ್ಯದ ಬಹುತೇಕ ವನ್ಯಜೀವಿ ತಾಣಗಳಲ್ಲಿ ಚಿತ್ರೀಕರಣ ಮಾಡಲಾಗಿದ್ದು ಡ್ರೋನ್ ಕ್ಯಾಮೆರಾ ಮೂಲಕ ಸೆರೆ ಹಿಡಿದಿರುವ ದೃಶ್ಯಗಳು ಅವಿಸ್ಮರಣೀಯವಾಗಿವೆ. ರಿಕ್ಕಿ ಕೇಜ್ ಹಿನ್ನೆಲೆ ಸಂಗೀತ ಇದರ ಪ್ಲಸ್ ಪಾಯಿಂಟ್. ಸದ್ಯ ಇದು ಕೇವಲ ಇಂಗ್ಲಿಷ್ನಲ್ಲಿ ತೆರೆ ಕಂಡಿದೆ. ಸದ್ಯದಲ್ಲೇ ಕನ್ನಡ ಅವತರಣಿಕೆಯೂ ಬರಲಿದೆ.
